രാഷ്ട്രപിതാവും മുന്പ്രധാനമന്ത്രിയുമായ ഷെയ്ഖ് മുജീബുര് റഹ്മാന്റെ ഓര്മകള് പോലും തുടച്ചുനീക്കാനുള്ള ശ്രമം തുടര്ന്ന് ബംഗ്ലാദേശ് ഭരണകൂടം. ഇതിന്റെ ഭാഗമായി കറന്സി നോട്ടുകളില്നിന്ന് മുജീബുര് റഹ്മാന്റെ ചിത്രം നീക്കി.
രാജ്യംവിട്ട മുന് പ്രധാനമന്ത്രി ഷെയ്ഖ് ഹസീനയുടെ പിതാവാണ് മുജീബുര് റഹ്മാന്. ഹസീനയുടെ പുറത്താക്കലിനു പിന്നാലെ കഴിഞ്ഞ വര്ഷമാണ് ബംഗ്ലദേശ് കേന്ദ്ര ബാങ്ക് പുതിയ നോട്ടുകള് പുറത്തിറക്കുന്ന കാര്യം പ്രഖ്യാപിച്ചത്.
പുതുതായി രൂപകല്പന ചെയ്ത നോട്ടുകളില് മനുഷ്യരുടെ ചിത്രങ്ങള് ഉണ്ടാകില്ലെന്ന് ബംഗ്ലാദേശ് ബാങ്ക് വക്താവ് ആരിഫ് ഹൊറൈസന് ഖാന് പറഞ്ഞു. പ്രകൃതിരമണീയമായ കാഴ്ചകളും പരമ്പരാഗത ചരിത്രപ്രാധാന്യമുള്ള സ്ഥലങ്ങളും ആയിരിക്കും ഉള്പ്പെടുത്തുകയെന്നും അദ്ദേഹം വ്യക്തമാക്കി.
ഹൈന്ദവ, ബുദ്ധ ക്ഷേത്രങ്ങളും അന്തരിച്ച ചിത്രകാരന് സൈനുല് ആബിദീന്റെ കലാസൃഷ്ടികളുമാണ് പുതുതായി രൂപകല്പന ചെയ്ത കറന്സികളില് ഉള്പ്പെടുത്തിയിരിക്കുന്നത്. 1971ലെ വിമോചന യുദ്ധത്തില് മരിച്ചവരെ ആദരിക്കുന്ന ദേശീയ രക്തസാക്ഷി സ്മാരകത്തിന്റെ ചിത്രവും പുതിയ കറന്സിയില് ഉള്പ്പെടുത്തിയേക്കുമെന്ന് രാജ്യാന്തര മാധ്യമങ്ങള് റിപ്പോര്ട്ട് ചെയ്യുന്നു.
