കഴിഞ്ഞ ശനിയാഴ്ച ഉത്തർപ്രദേശിലെ നോയിഡയിലുണ്ടായ ശക്തമായ കാറ്റും കനത്ത മഴയും ജനജീവിതം ഏറെ ദുരിത പൂർണമാക്കിയിരുന്നു. ഇതിനിടയിലാണ് ഹൈ ടെൻഷൻ വയറിന് മുകളിൽ കുടുങ്ങിയ ഇരുമ്പ് സൈൻബോർഡ് വ്യാപകമായ ശ്രദ്ധ പിടിച്ചുപറ്റിയത്.
സെക്ടർ 20 ലാണ് അസാധാരണമായ ദൃശ്യം അരങ്ങേറിയത്. ശക്തമായ കാറ്റിനെ തുടർന്ന് സൈൻ ബോർഡ്, വായുവിൽ ആടിയുലയുന്ന കാഴ്ചയാണ് കാണുന്നത്. സംഭവം കണ്ട് നിരവധിപേരാണ് സ്ഥലത്ത് തടിച്ചുകൂടിയത്. ഇതിനിടയിലാണ്, ഒരു ഇലക്ട്രിസിറ്റി ബോർഡ് തൊഴിലാളി ഹൈ ടെൻഷൻ വയറിനു മുകളിലേക്ക് കയറി തൂങ്ങിക്കിടന്ന മെറ്റൽ ബോർഡ് നീക്കം ചെയ്യാൻ ശ്രമിച്ചത്.
വൈറലായ ദൃശ്യങ്ങളിൽ, ജീവനക്കാരൻ ബോർഡിൽ ചവിട്ടുന്നതും കൈകൾ ഉപയോഗിച്ച് വയറിൽ നിന്ന് മോചിപ്പിക്കുന്നതും കാണാം. പിരിമുറുക്കമുള്ള കുറച്ച് നിമിഷങ്ങൾക്ക് ശേഷം, അദ്ദേഹം ബോർഡ് വിജയകരമായി വേർപെടുത്തുകയും ജനക്കൂട്ടം സന്തോഷിക്കുകയും ചെയ്യുന്നു.
വീഡിയോ വൈറലായതോടെ നിരവധി സോഷ്യൽ മീഡിയ ഉപഭോക്താക്കളാണ് തൊഴിലാളിയുടെ ധീരത അഭിനന്ദിച്ച് രംഗത്തെത്തിയത്.
വലിയ ഒരു ദുരന്തം ഒഴിവാക്കിയ അദ്ദേഹത്തെ പലരും “സൂപ്പർമാൻ”എന്നാണ് വിശേഷിപ്പിച്ചത്.
അതിനിടെ, സെക്ടർ 27 ൽ, കൊടുങ്കാറ്റിന്റെ സമ്മർദ്ദത്തിൽ ട്രാഫിക് സിഗ്നൽ തൂൺ മറിഞ്ഞുവീണ് ഗതാഗതം തടസ്സപ്പെട്ടിരുന്നു. ഭാഗ്യവശാൽ, പ്രദേശത്ത് പരിക്കുകളൊന്നും റിപ്പോർട്ട് ചെയ്തിട്ടില്ല.
നോയിഡയിലുടനീളം, കാലാവസ്ഥാ വ്യതിയാനത്തെത്തുടർന്ന് മരങ്ങൾ വീണതിൻ്റെയും വൈദ്യുത തൂണുകൾ തകർന്നതിന്റെയും നിരവധി റിപ്പോർട്ടുകളാണ് ഉദ്യോഗസ്ഥർക്ക് ലഭിച്ചിട്ടുള്ളത്. ഉത്തരേന്ത്യയിൽ ക്രമരഹിതമായ കാലാവസ്ഥാ പാറ്റേണുകൾ തുടരുന്നതിനിടയിലാണ് ഈ സംഭവങ്ങൾ അരങ്ങേറിയത്., തീവ്രമായ ചൂടിൽ നിന്നു മഴയിലേക്കുള്ള പെട്ടെന്നുള്ള മാറ്റം, കാലാവസ്ഥാ വ്യതിയാനത്തെക്കുറിച്ചും നഗര തയ്യാറെടുപ്പിനെക്കുറിച്ചും പുതിയ ആശങ്കകൾ ഉയർത്തുകയാണ്.
