പൂച്ചകളെ ഇഷ്ടപ്പെടാത്തവര്‍ കുറവായിരിക്കും. ഇതാ ജപ്പാനിലെ ടോക്കിയോ ആസ്ഥാനമായുള്ള ക്യുനോട്ടില്‍ 10 പൂച്ചകളെയാണ് എല്ലാവിധ സൗകര്യങ്ങളും നല്‍കി വളര്‍ത്തുന്നത്. ഇതിന് പിന്നിലെ കാരണം വളരെ കൗതുകകരമാണ്. ജീവനക്കാരുടെ ജോലി സമ്മര്‍ദ്ദം കുറയ്ക്കാന്‍ ജോലിക്കിടയില്‍ പൂച്ചകളുമായി ഇടപഴകുകയും കളക്കുകയും ചെയ്യുമ്പോള്‍ അവരുടെ സര്‍ഗാത്മകതയും ഊര്‍ജസ്വലതയും വര്‍ധിക്കുന്നുവെന്നാണ് കമ്പനി അധികൃതരുടെ അഭിപ്രായം.
പൂച്ചയുടെ ജോലി ഇവിടുത്തെ 32 ജീവനക്കാരുമായി കളിക്കുകയെന്നതാണ്. 2004 ലാണ് ‘ഫതുബ’ എന്ന പൂച്ചക്കുട്ടി കമ്പനിയില്‍ എത്തുന്നത്. പിന്നീട് 9 പൂച്ചകള്‍ കൂടി എത്തി. ഇവരില്‍ പ്രായം കൂടിയ ഫതുബയ്ക്ക് ‘ ചെയര്‍കാറ്റ്’ എന്ന പദവി നല്‍കിയിട്ടുണ്ട്. മറ്റ് പൂച്ചകള്‍ മാനേജര്‍, ഗുമസ്ഥന്‍ എന്നീ പോസ്റ്റുകളില്‍ അറിയപ്പെടുന്നുണ്ട്.
പൂച്ചകള്‍ക്ക് സ്വതന്ത്രമായി വിഹരിക്കാനായി 2020 ല്‍ കമ്പനി നാല് നിലകളിലുള്ള കെട്ടിടത്തിലേക്ക് മാറ്റി. ഇതില്‍ രണ്ട് നിലകള്‍ പൂച്ചകള്‍ക്ക് മാത്രമായി മാറ്റിവയ്ക്കുകയായിരുന്നു. അവര്‍ക്ക് കളിക്കാനും ഉറങ്ങാനും ഭക്ഷണം കഴിക്കാനുമൊക്കെ പ്രത്യേകമായ സ്ഥലങ്ങളുമുണ്ട്.
