ഹോങ്കോങ്: അന്താരാഷ്ട്ര സൂപ്പർസ്റ്റാറും ആയോധന കലാകാരനുമായ ജാക്കി ചാൻ അന്തരിച്ചതായി സമൂഹമാധ്യമങ്ങളിൽ വ്യാജ റിപ്പോർട്ടുകൾ. നടൻ ആരോഗ്യവാനായി ജീവിച്ചിരിപ്പുണ്ട്. മരണവാർത്ത അതിവേഗം ഫേസ്ബുക്കിലും എക്സിലും പടരുകയും ലോകമെമ്പാടുമുള്ള ആരാധകരെ ആശങ്കപ്പെടുത്തുകയും ചെയ്തു.
പഴയ പരിക്കുകൾ വലിയ ആരോഗ്യപ്രശ്നങ്ങളായി പരിണമിച്ചെന്നും 71കാരനായ നടൻ മരിച്ചുവെന്നുമാണ് എക്സും ഫേസ്ബുക്കും അടക്കമുള്ള മാധ്യമങ്ങളിൽ പ്രചരിക്കുന്നുണ്ട്. ഹൃദയഭേദകമായ ഈ നഷ്ടം ജാക്കി ചാന്റെ കുടുംബം സ്ഥിരീകരിച്ചുവെന്ന് പോലും വൈറലായ പോസ്റ്റുകളിൽ പറഞ്ഞിരുന്നു. പക്ഷേ പൂർണആരോഗ്യവാനായ ജാക്കി ചാൻ അടുത്ത സിനിമയുടെ തയ്യാറെടുപ്പിലാണ്. സിനിമാ സെറ്റുകളിൽ പതിറ്റാണ്ടുകളായി ഏറ്റ പരിക്കുകളുടെ സങ്കീർണതകളുമായി പോരാടി 71കാരനായ ജാക്കി ചാൻ അന്തരിച്ചു എന്ന തരത്തിലായിരുന്നു പോസ്റ്റുകൾ. മാസങ്ങളായി അദ്ദേഹം ചികിത്സയിലായിരുന്നുവെന്നും അസുഖത്തെ തുടർന്നാണ് മരിച്ചതെന്നും ചിലർ അവകാശപ്പെട്ടു.
നിരവധി മാധ്യമങ്ങൾ ഈ റിപ്പോർട്ടുകൾ പൂർണ്ണമായും അസത്യമാണെന്ന് ഇപ്പോൾ സ്ഥിരീകരിച്ചിട്ടുണ്ട്. അടുത്ത വൃത്തങ്ങൾ പറയുന്നതനുസരിച്ച്, താൻ ആരോഗ്യവാനും സുഖമായിരിക്കുന്നു എന്നും ജാക്കി അറിയിച്ചു.
ഒന്നിലധികം സോഷ്യൽ പ്ലാറ്റ്ഫോമുകളിൽ പ്രത്യക്ഷപ്പെട്ട തെറ്റിദ്ധാരണയുണ്ടാക്കുന്ന പോസ്റ്റുകൾ, ചാന്റെ മരണം അദ്ദേഹത്തിന്റെ കുടുംബം സ്ഥിരീകരിച്ചതായി തെറ്റായി പ്രസ്താവിച്ചു. പോസ്റ്റിന്റെ ഒരു ഭാഗം ഇങ്ങനെയായിരുന്നു, “സെറ്റിൽവെച്ചുണ്ടായ പരിക്കുകളുടെ സങ്കീർണ്ണതകളോടുള്ള പോരാട്ടത്തിനൊടുവിൽ 71-കാരനായ ജാക്കി ചാൻ അന്തരിച്ചു, ഹൃദയഭേദകമായ നഷ്ടം കുടുംബം സ്ഥിരീകരിക്കുന്നു.” ഈ പോസ്റ്റുകൾ പിന്നീട് നീക്കം ചെയ്യപ്പെട്ടു.
ഈ വൈറൽ കിംവദന്തി അദ്ദേഹത്തിന്റെ ആരാധകർക്കിടയിൽ ആശങ്കയുണ്ടാക്കുകയും, അവർ സ്ഥിരീകരണത്തിനായി സോഷ്യൽ മീഡിയയിൽ നിറയുകയും ചെയ്തു. ഇതുവരെ, ജാക്കി ചാനോ അദ്ദേഹത്തിന്റെ ടീമോ ഔദ്യോഗിക പ്രസ്താവനയൊന്നും പുറത്തിറക്കിയിട്ടില്ല. നടൻ ഇതാദ്യമായല്ല വ്യാജ മരണവാർത്തകൾക്ക് ഇരയാകുന്നത്. 2015ലും സമാനമായ വ്യാജവാർത്തകൾ ഓൺലൈനിൽ പ്രചരിച്ചിരുന്നു. അന്ന് ജാക്കി ചാൻ നേരിട്ടെത്തി പ്രതികരിക്കുകയായിരുന്നു.
അടുത്തിടെ, ദി ഷാഡോസ് എഡ്ജ് എന്ന ചിത്രത്തിൽ ജാക്കി ചാൻ അഭിനയിച്ചു. അദ്ദേഹം ഇപ്പോൾ ന്യൂ പോലീസ് സ്റ്റോറി 2, ഡിസൈൻ പി, ഫൈവ് എഗൈൻസ്റ്റ് എ ബുള്ളറ്റ് എന്നിവയുൾപ്പെടെയുള്ള പുതിയ പ്രോജക്റ്റുകളിൽ പ്രവർത്തിച്ചുവരികയാണ്.
എക്കാലത്തും ഏറെ ആരാധകരുള്ള താരമാണ് ജാക്കി ചാൻ. ആയോധനകലകൾ, രസകരമായ ഭാവങ്ങൾ, ധീരമായ സ്റ്റണ്ടുകൾ എന്നിവക്ക് പേരുകേട്ട അദ്ദേഹം 50 വർഷത്തിലേറെയായി ആരാധകരെ രസിപ്പിച്ചുകൊണ്ടിരിക്കുകയാണ്. ഡ്രങ്കൺ മാസ്റ്റർ, പൊലീസ് സ്റ്റോറി, റഷ് അവർ, ദി കരാട്ടെ കിഡ് തുടങ്ങിയ ഹിറ്റ് സിനിമകൾ ജാക്കി ചാനെ ആഗോള സൂപ്പർസ്റ്റാറാക്കി. കോമഡിയും ആക്ഷനും ഫ്ലെക്സിബിളായി ചെയ്യുന്നതിനാൽ എല്ലാ പ്രായത്തിലുമുള്ള ഫാൻസും ജാക്കി ചാനുണ്ട്.
