കോഡ് എഴുതുക, ചിത്രങ്ങൾ ഉണ്ടാക്കുക, സംഗീതം ചിട്ടപ്പെടുത്തുക എന്നതിനപ്പുറം നമ്മുടെ കോശങ്ങൾക്കുള്ളിലേക്ക് കടക്കുകയാണ് ആർട്ടിഫിഷ്യൽ ഇന്റലിജൻസ് . സിലിക്കൺ വാലി സ്റ്റാർട്ടപ്പായ റെട്രോ ബയോസയൻസുമായി സഹകരിച്ച്, പ്രോട്ടീൻ സീക്വൻസുകൾ, ബയോളജിക്കൽ ടെക്സ്റ്റ്, 3D മോളിക്യുലാർ ഘടനകൾ എന്നിവയിൽ മാത്രം പരിശീലനം നേടിയ GPT-4b മൈക്രോ എന്ന പ്രത്യേക AI സൃഷ്ടിച്ചതായി ഓപ്പൺഎഐ പ്രഖ്യാപിച്ചു.
പരമ്പരാഗത ചാറ്റ്ബോട്ടുകളിൽ നിന്ന് വ്യത്യസ്തമായി, റീജനറേറ്റീവ് മെഡിസിന്റെ കേന്ദ്രബിന്ദുവായ പ്രോട്ടീനുകൾ പുനർരൂപകൽപ്പന ചെയ്യുന്നതിനാണ് GPT-4b മൈക്രോ നിർമ്മിച്ചിരിക്കുന്നത്. മുതിർന്ന കോശങ്ങളെ സ്റ്റെം സെല്ലുകളാക്കി മാറ്റാനുള്ള കഴിവുള്ള യമനക ഘടകങ്ങൾ (Yamanaka factors) എന്നറിയപ്പെടുന്ന പ്രോട്ടീനുകളെ പുനർരൂപകൽപ്പന ചെയ്യുക എന്ന വെല്ലുവിളി നിറഞ്ഞ ജോലിക്കായി ഗവേഷകർ ഈ സിസ്റ്റം ഉപയോഗിച്ചു. ഈ പ്രോട്ടീനുകൾക്ക് നൊബേൽ സമ്മാനം ലഭിച്ചിരുന്നു.
ഓപ്പൺഎഐ ബ്ലോഗ്പോസ്റ്റിൽ ഇങ്ങനെ പറയുന്നു, “ഇൻഡ്യൂസ്ഡ് പ്ലൂരിപൊട്ടന്റ് സ്റ്റെം സെൽസ് (iPSCs) ഉണ്ടാക്കുന്നതിനും കോശങ്ങളെ പുനരുജ്ജീവിപ്പിക്കുന്നതിനും സഹായിച്ച യമനക ഘടകങ്ങളെ പുനർരൂപകൽപ്പന ചെയ്യുന്നതിനായി GPT-4b മൈക്രോയെ ഉപയോഗിക്കാൻ കഴിഞ്ഞതിൽ ഞങ്ങൾ സന്തുഷ്ടരാണ്. കാഴ്ചക്കുറവ്, പ്രമേഹം, വന്ധ്യത, അവയവങ്ങളുടെ കുറവ് എന്നിവ ചികിത്സിക്കുന്നതിനായുള്ള മരുന്നുകൾ വികസിപ്പിക്കാനും ഇത് ഉപയോഗിച്ചിട്ടുണ്ട്.”
“ലാബ് പരിശോധനയിൽ, ഈ പുനർരൂപകൽപ്പന ചെയ്ത പ്രോട്ടീനുകൾ സ്റ്റെം സെൽ റീപ്രോഗ്രാമിംഗ് മാർക്കറുകളുടെ 50 മടങ്ങ് ഉയർന്ന എക്സ്പ്രഷൻ കൈവരിച്ചു.”
ഈ ഫലം ഇരു ടീമുകളെയും അത്ഭുതപ്പെടുത്തി. AI സൃഷ്ടിച്ച പ്രോട്ടീനുകൾ ലാബ് പരിശോധനയിൽ ഒറിജിനലിനെക്കാൾ മികച്ച പ്രകടനം കാഴ്ചവെച്ചു. പുനർരൂപകൽപ്പന ചെയ്ത ഘടകങ്ങൾ ഉപയോഗിച്ച കോശങ്ങൾ സ്റ്റെം സെൽ മാർക്കറുകളുടെ 50 മടങ്ങ് ഉയർന്ന എക്സ്പ്രഷൻ കാണിക്കുകയും ഡിഎൻഎ കേടുപാടുകൾ വളരെ വേഗത്തിൽ നന്നാക്കുകയും ചെയ്തു. ചുരുക്കത്തിൽ, AI നിർമ്മിച്ച പ്രോട്ടീനുകൾക്ക് പ്രായമായ കോശങ്ങളെ ചെറുപ്പമായി കാണിക്കാൻ സാധിച്ചു. ഇത് മനുഷ്യന്റെ വാർദ്ധക്യം വൈകിപ്പിക്കാനോ അല്ലെങ്കിൽ മാറ്റാനോ സഹായിക്കുന്ന ചികിത്സാരീതികളിലേക്കുള്ള വലിയൊരു ചുവടുവെപ്പാണ്.
ദീർഘായുസ്സിനെക്കുറിച്ചുള്ള ഗവേഷണത്തിനും റീജനറേറ്റീവ് മെഡിസിനും ഇത് ഒരു സുപ്രധാന നിമിഷമാണ്. കാരണം ഇവിടെ AI വെറുമൊരു വിശകലനത്തിനുള്ള ഉപകരണം മാത്രമല്ല, ജീവശാസ്ത്രപരമായ മുന്നേറ്റങ്ങളുടെ ഒരു സഹ-നിർമ്മാതാവ് കൂടിയാണ്.
