വീട്ടമ്മമാരുടെ അടുക്കളയിലെ ഏറ്റവും വലിയ പ്രശ്‌നം എന്നത് പാത്രങ്ങള്‍ വൃത്തിയാക്കുക എന്നതാണ്. പ്രത്യേകിച്ച് കരിഞ്ഞ് അടിയില്‍ പിടിച്ച പാത്രങ്ങളെങ്ങാനും ആണെങ്കില്‍ ജോലി ഇരട്ടിയുമായി. ഇന്ന് മിക്കവരും നോണ്‍സ്റ്റിക് പാത്രങ്ങളാണ് ഉപയോഗിക്കുന്നതെങ്കിലും ചില സമയത്ത് ഇത് പ്രാവര്‍ത്തികമാകുകയില്ല. പാചകം ചെയ്യുമ്പോള്‍ കൃത്യമായ അളവില്‍ വെള്ളം ചേര്‍ത്ത് പച്ചക്കറികള്‍ എന്നിവ വേവിയ്ക്കുയാണെങ്കില്‍ ഭക്ഷണങ്ങള്‍ അടിയില്‍ പിടിയ്ക്കുന്ന പ്രശ്‌നം ഉണ്ടാകുകയില്ല.
വെള്ളം കുറഞ്ഞാല്‍ കറികളും ചോറും അടിയില്‍ വേഗത്തില്‍ പിടിക്കാന്‍ സാധ്യത കൂടുതലാണ്. ഇടയ്ക്ക് ഇളക്കി കൊടുക്കാനും അല്ലെങ്കില്‍ തുറന്ന് ഇത് നോക്കുകയും ചെയ്യണം.തീ എല്ലായ്പ്പോഴും മീഡിയത്തില്‍ വെക്കുക. തീ കൂട്ടി വെക്കുന്നത് വേഗത്തില്‍ ഭക്ഷണ സാധനങ്ങള്‍ പാത്രത്തിന്റെ അടിയില്‍ പിടിക്കുന്നതിന് കാരണമാണ്. കട്ടിയുള്ള പാത്രത്തില്‍ പാചകം ചെയ്യാന്‍ ശ്രദ്ധിക്കുക. ഇത് അടിയില്‍ വേഗത്തില്‍ പിടിക്കാതിരിക്കാന്‍ സഹായിക്കും. ഭക്ഷണം അടിയില്‍ പിടിച്ചാല്‍ പാത്രം വൃത്തിയാക്കാനായി ഇക്കാര്യങ്ങള്‍ ചെയ്യാം…..
- വിനാഗിരി – കരി പിടിച്ച പാത്രം വേഗത്തില്‍ വൃത്തിയാക്കി എടുക്കാന്‍ വിനാഗിരി നല്ലതാണ്. കുറച്ച് വിനാരിഗി ചേര്‍ത്ത വെള്ളത്തില്‍ പാത്രം മുക്കി വെക്കുന്നത് അടിയില്‍ പിടിച്ചത് വേഗത്തില്‍ ഇളക്കി കളയാന്‍ സാധിക്കും. അതുമല്ലെങ്കില്‍ ബേക്കിംഗ് സോഡയും വിനാഗിരിയും മിക്സ് ചെയ്ത് അത് പാത്രം കരിഞ്ഞ ഭാഗത്ത് പുരട്ടി വെക്കാവുന്നതാണ്. ഒരു മണിക്കൂര്‍ കഴിഞ്ഞ് നിങ്ങള്‍ക്ക് ഇത് കഴുകി എടുക്കാവുന്നതാണ്. ഇത് പാത്രം വേഗത്തില്‍ ക്ലീനാക്കി കിട്ടാന്‍ സഹായിക്കുന്നതാണ്. വിനാഗിരിക്ക് പകരം വേണമെങ്കില്‍ ചെറുനാരങ്ങയുടെ നീരും ഉപയോഗിക്കാം. ഏതായാലും ഗുണം ലഭിക്കുന്നതാണ്.
- ബേക്കിംഗ് സോഡ – മിക്ക വീടുകളിലും ബേക്കിംഗ് സോഡ ഉണ്ടാകണമെന്നില്ല. നിങ്ങളുടെ കൈവശം ബേക്കിംഗ് സോഡ ഉണ്ടെങ്കില്‍ അതും കുറച്ച് സോപ്പും പൊടിയും ചേര്‍ത്ത് മിക്സ് ചെയ്ത് പാത്രത്തിന്റെ കരി പിടിച്ച ഭാഗത്ത് നന്നായി നല്ല കട്ടിയില്‍ തേച്ച് പിടിപ്പിക്കുക. ഒരു ഒരു മണിക്കൂര്‍ കഴിഞ്ഞ് പാത്രം നല്ല സോഫ്റ്റ് സ്‌ക്രബര്‍ ഉപയോഗിച്ച് കഴുകി എടുക്കുക. പാത്രം ക്ലീനാകുന്നത് വരെ നിങ്ങള്‍ക്ക് ഈ പ്രക്രിയ തുടരാവുന്നതാണ്. പാത്രം കഴുകി എടുക്കുമ്പോള്‍ അമിതമായി ഉരച്ച് കഴുകാതിരിക്കാനും ശ്രദ്ധിക്കണം.
- തിളപ്പിക്കാം – പലരും ഭക്ഷണസാധനങ്ങള്‍ അടിയില്‍ പിടിച്ച് കരിഞ്ഞാല്‍ അത് നല്ല സ്‌ക്രബര്‍ ഉപയോഗിച്ച് ഉരച്ച് നീക്കം ചെയ്യാന്‍ ശ്രമിക്കും. എന്നാല്‍, ഇത്തരത്തില്‍ സ്‌ക്രബര്‍ ഉപയോഗിച്ച് അമിതമായി ഉരയ്ക്കുന്നത് പാത്രങ്ങളില്‍ പോറല്‍ വീഴാനും ഇത് വേഗത്തില്‍ അടിയില്‍ പിടിക്കുന്നതിനും കാരണമാകും. അതിനാല്‍, ഇത്തരം അബദ്ധങ്ങള്‍ ഒരിക്കലും ചെയ്യരുത്. പകരം, നിങ്ങള്‍ക്ക് വളരെ എളുപ്പത്തില്‍ അധികം ആയാസമില്ലാതെ ചെയ്യാന്‍ സാധിക്കുന്ന ഒരു മാര്‍ഗ്ഗമുണ്ട്. ഇതിനായി നിങ്ങള്‍ അടിയില്‍ പിടിച്ച് കരിഞ്ഞ പാത്രത്തില്‍ കുറച്ച് വെള്ളവും സോപ്പ് ലിക്വിഡും ചേര്‍ത്ത് നന്നായി തിളപ്പിക്കുക. നന്നായി തിളച്ച് കഴിഞ്ഞ് വെള്ളം ചൂടാറി കഴിയുമ്പോള്‍ നിങ്ങള്‍ക്ക് സക്രബര്‍ വെച്ച് കഴുകി എടുക്കാവുന്നതാണ്. പാത്രം നല്ലപോലെ ക്ലീനായി വരുന്നത് വരെ ഈ പ്രക്രിയ നിങ്ങള്‍ക്ക് തുടരാം. ഇത് പാത്രത്തിന് കേടുപാടുകള്‍ ഇല്ലാതെ വേഗത്തില്‍ തന്നെ അടിയില്‍ പിടിച്ച കരിയും ഭക്ഷണാവശിഷ്ടങ്ങളും അടര്‍ന്ന് പോരുന്നതിന് സഹായിക്കും.
