ഫോം നഷ്ടമായ അവസ്ഥയിലും ടീമില്‍ തുടരുന്നതിന് രൂക്ഷ വിമര്‍ശനം ഉയരുമ്പോള്‍ ഇംഗ്‌ളണ്ടിന് എതിരേയുള്ള രണ്ടാം ടെസ്റ്റിലും നനഞ്ഞ പടക്കമായി ശുഭ്മാന്‍ ഗില്‍. ഇംഗ്‌ളണ്ടിന്റെ ഇന്ത്യാ പരമ്പരയിലെ രണ്ടാം മത്സരത്തിലെ ആദ്യ ഇന്നിംഗ്‌സില്‍ 34 റണ്‍സുമായി താരം പുറത്തായി. ഏകദിനത്തിലൂം ടി20 യിലും വമ്പനടികള്‍ നടത്തുന്ന ഗില്ലിനെ ദീര്‍ഘ ഇന്നിംഗ്‌സുകള്‍ വേണ്ട ടെസ്റ്റിന് കൊള്ളില്ല എന്ന് മുന്‍ താരങ്ങളടക്കം രൂക്ഷ വിമര്‍ശനം നടത്തുമ്പോഴാണ് രണ്ടാം ടെസ്റ്റിലെയും ആദ്യ ഇന്നിംഗ്‌സില്‍ പരാജയപ്പെട്ടത്.
46 പന്തുകളില്‍ 34 റണ്‍സുമായി നിന്ന ഗില്‍ ആന്‍ഡേഴ്‌സന്റെ പന്തില്‍ ഫോക്‌സ് പിടികൂടി പുറത്താകുകയായിരുന്നു. അഞ്ചു ബൗണ്ടറികള്‍ ഇയാളുടെ ബാറ്റില്‍ നിന്നും പിറന്നു. ഇന്ത്യന്‍ ക്രിക്കറ്റിന്റെ ഭാവി, വിരാട് കോലിയുടെ പിന്‍ഗാമി, ഭാവി ഇന്ത്യന്‍ നായകന്‍ എന്നെല്ലാം വിശേഷിപ്പിക്കപ്പെട്ട ഗില്ലിന്റെ പുറത്താകല്‍ എതിരാളികള്‍ ആഘോഷിക്കുകയാണ്. ഇംഗ്ലണ്ടിനെതിരായ ഒന്നാം ടെസ്റ്റില്‍ ആദ്യ ഇന്നിംഗ്‌സില്‍ 23ഉം രണ്ടാം ഇന്നിംഗ്‌സില്‍ രണ്ടും റണ്‍സെടുത്ത് പുറത്തായപ്പോള്‍ തന്നെ ഗില്ലിനെതിരേ രൂക്ഷ വിമര്‍ശനം ഉയര്‍ന്നിരുന്നു.
കഴിഞ്ഞവര്‍ഷം മിന്നും ഫോമിലായിരുന്ന ഗില്‍ ഐപിഎല്ലിനുശേഷം നടന്ന ഏഷ്യാ കപ്പില്‍ ബംഗ്ലാദേശിനെതിരെ സെഞ്ചുറി നേടിയശേഷം ഫോം മങ്ങിയ നിലയിലാണ്. പരിക്കിന് ശേഷം മടങ്ങിവന്ന ഏകദിന ലോകകപ്പിലും ദക്ഷിണാഫ്രിക്കന്‍ പരമ്പരയിലും താരത്തിന് തിളങ്ങാനായിരുന്നില്ല. അദ്ദേഹം ഓസ്‌ട്രേലിയയ്‌ക്കെതിരേ ടെസ്റ്റില്‍ സെഞ്ച്വറി നേടിയ അഹമ്മദാബാദിലെ ഫ്‌ളാറ്റ് പിച്ചില്‍ മാത്രം റണ്ണടിക്കാന്‍ അറിയാവുന്ന താരം എന്ന നിലയിലാണ് ഗില്ലിനെ ചിലര്‍ പരിഹസിക്കുന്നത്. തുടര്‍ച്ചയായി പരാജയമായിട്ടും ഗില്ലിന് വീണ്ടും വീണ്ടും അവസരം നല്‍കുന്നത് മറ്റ് പ്രതിഭകളുടെ അവസരം നശിപ്പിക്കുകയാണെന്നാണ് മുന്‍ താരങ്ങള്‍ നടത്തുന്ന വിമര്‍ശനം.
സര്‍ഫറാസ് ഖാനെയും രജത് പാടീദാറിനെപ്പോലയുമുള്ള പ്രതിഭകള്‍ കാത്തിരിക്കുമ്പോള്‍ കുറഞ്ഞപക്ഷം സ്പിന്നര്‍മാരെ കളിക്കാനറിയുന്ന ആര്‍ക്കെങ്കിലും രണ്ടാം ടെസ്റ്റില്‍ അവസരം നല്‍കണണെന്നും ആരാധകര്‍ ആവശ്യപ്പെടുന്നു. കഴിഞ്ഞ വര്‍ഷം ടെസ്റ്റില്‍ ഓസ്‌ട്രേലിയക്കെതിരെ സെഞ്ചുറി നേടിയശേഷം കളിച്ച ഒമ്പത് ഇന്നിംഗ്‌സില്‍ ഒറ്റ അര്‍ധസെഞ്ചുറി പോലും ഗില്ലിന് കണ്ടെത്താനായിട്ടില്ല. ഓസ്‌ട്രേലിയക്കെതിരേ അഹമ്മദാബാദില്‍ 128 റണ്‍സടിച്ചശേഷം ടെസ്റ്റിലെ ഗില്ലിന്റെ ഉയര്‍ന്ന സ്‌കോര്‍ 29 ആണ്.
കഴിഞ്ഞ 10 ഇന്നിംഗ്‌സില്‍ രണ്ട് തവണ മാത്രമാണ് ഗില്‍ രണ്ടക്കം കടക്കാതെ പുറത്തായത്. പക്ഷെ ഒരുതവണ പോലും അര്‍ധസെഞ്ചുറി പോലും തികക്കാനായില്ല. 2023 – 24 വര്‍ഷം ഗില്‍ കളിച്ച ടെസ്റ്റ് മത്സരങ്ങളില്‍ 21,അഞ്ച്, 128, 13, 18, ആറ്, 10, 29, രണ്ട്, 26, 23, പൂജ്യം എന്നിങ്ങനെയാണ് കഴിഞ്ഞ ഒമ്പത് ടെസ്റ്റ് മത്സരങ്ങളില്‍ ഗില്‍ കണ്ടെത്തിയ സ്‌കോര്‍. കഴിഞ്ഞ 10 ടെസ്റ്റ് ഇന്നിംഗ്‌സുകളിലായി 17.77 ശരാശരിയില്‍ 160 റണ്‍സാണ് താരം എടുത്തത്. മികച്ച തുടക്കങ്ങള്‍ ലഭിച്ചിട്ടും അത് വലിയ ഇന്നിംഗ്‌സ് ആക്കി മാറ്റാനാവാത്തതാണ് ഗില്ലിന്റെ യഥാര്‍ത്ഥ പ്രശ്‌നം.
