ന്യൂയോര്ക്ക്: നായകളുമായി കൂട്ടുകൂടുന്നത് സ്ത്രീകള്ക്കു ഗുണം ചെയ്യുമെന്നു പഠനം. സ്ത്രീകള് ആഴ്ചയില് ഒരു മണിക്കൂറെങ്കിലും നായയുമായി സമയം ചെലവഴിക്കുന്നത് ‘ടെലോമിയര് ദൈര്ഘ്യം’ എന്നറിയപ്പെടുന്ന കോശങ്ങളുടെ വാര്ധക്യത്തിന്റെ ഒരു പ്രധാന സൂചകത്തെ മന്ദഗതിയിലാക്കുന്നതായി ഫ്ലോറിഡ അറ്റ്ലാന്റിക് യൂണിവേഴ്സിറ്റിയിലെ നഴ്സിങ് അസോസിയേറ്റ് പ്രഫസര് ഡോ. ഷെറില് ക്രൗസ്പാരെല്ലോ പറഞ്ഞു. സ്ത്രീകള്ക്ക് സമ്മര്ദത്തിന്റെ ശാരീരിക പ്രത്യാഘാതങ്ങള് കുറയ്ക്കാനും കോശങ്ങളുടെ ആരോഗ്യം മെച്ചപ്പെടുത്തുന്നതിനും നായകളുടെ സാമിപ്യം സഹായകമാകും. എന്നാല് നായകള്ക്ക് പുരുഷന്മാരിലും സമാനമായ ഫലങ്ങളുണ്ടോ എന്നത് വ്യക്തമായിട്ടില്ല.
‘ഇത്തരം ബന്ധങ്ങള് വൈകാരിക സുരക്ഷയും സ്ഥിരതയും നല്കുന്നു, ഇത് സ്ത്രീകളില് പ്രത്യേകിച്ച് ശക്തമായേക്കാം’- അവര് പറഞ്ഞു. പഠനത്തിനായി, ഗവേഷകര് 32 നും 72 നും ഇടയില് പ്രായമുള്ള 28 സ്ത്രീകളെയാണു തെരഞ്ഞെടുത്തത്. എല്ലാവരും പോസ്റ്റ്ട്രോമാറ്റിക് സ്ട്രെസ് ഡിസോര്ഡര് (പി.ടി.എസ്.ഡി.) ഉള്ളവരായിരുന്നു. ഉത്കണ്ഠാ രോഗമാണു പി.ടി.എസ്.ഡി. സ്ത്രീകളെ രണ്ട് ഗ്രൂപ്പുകളായി തിരിച്ചായിരുന്നു നിരീക്ഷണം.
ഇരു ഗ്രൂപ്പുകളും എട്ട് ആഴ്ചയോളം ഓരോ ആഴ്ചയും ഒരു മണിക്കൂര് വീതം സെഷനുകളില് പങ്കെടുത്തു. ആദ്യ ഗ്രൂപ്പില് അംഗമായവര് നായകള്ക്കൊപ്പം സമയം ചെലവിട്ടു. രണ്ടാമത്തെ ഗ്രൂപ്പ് അവയുടെ വീഡിയോകള് മാത്രമാണു കണ്ടത്.
ഇരു ഗ്രൂപ്പിന്റെയും ഹൃദയമിടിപ്പിന്റെ വ്യതിയാനം ഉള്പ്പെടെയുള്ള സമ്മര്ദത്തിന്റെ ജൈവ സൂചകങ്ങള് ഗവേഷകര് അളന്നു. കോശങ്ങളുടെ വാര്ദ്ധക്യത്തിന്റെ അടയാളമായ ടെലോമിയര് ദൈര്ഘ്യം ഉമിനീര് സാമ്പിളുകളില്നിന്ന് നിര്ണയിച്ചു.
ടെലോമിയറുകള് ക്രോമസോമുകളുടെ അറ്റത്തുള്ള ഡി.എന്.എ യുടെ ഭാഗങ്ങളാണ്.
സമ്മര്ദത്തിന്റെ മാനസിക സൂചകങ്ങള്, പഠനത്തിലുടനീളം പി.ടി.എസ്.ഡി. ലക്ഷണങ്ങള്, ഗ്രഹിച്ച സമ്മര്ദം, ഉത്കണ്ഠ എന്നിവ അളക്കുന്ന ചോദ്യാവലികള് ഉപയോഗിച്ച് വിലയിരുത്തി.
ഫലങ്ങള് അനുസരിച്ച്, ജീവനുള്ള നായകള്ക്കൊപ്പം സമയം ചെലവിട്ടവരുടെ ടെലോമിയര് ദൈര്ഘ്യം വര്ധിച്ചു, ഇത് ജൈവ വാര്ദ്ധക്യം മന്ദഗതിയിലാക്കുന്നതിനെ സൂചിപ്പിക്കുന്നു. എതിര് ഗ്രൂപ്പിലുള്ളവരില്, ടെലോമിയര് ദൈര്ഘ്യം കുറഞ്ഞുവന്നു. അത് വേഗതയേറിയ വാര്ദ്ധക്യത്തെയാണ് സൂചിപ്പിക്കുന്നത്.
മാനസികാരോഗ്യത്തിന്റെ കാര്യത്തില്, ഇരു ഗ്രൂപ്പുകളിലും എട്ട് ആഴ്ചത്തെ കാലയളവില് പി.ടി.എസ്.ഡി. ലക്ഷണങ്ങള്, ഉത്കണ്ഠ, സമ്മര്ദം എന്നിവയില് കാര്യമായ കുറവുണ്ടായി.
എങ്കിലും, മാനസികാരോഗ്യ മെച്ചപ്പെടുത്തലുകള് ഇരു ഗ്രൂപ്പുകളിലും സമാനമായിരുന്നു, ഗവേഷണഫലം ‘ബിഹേവിയറല് സയന്സസ്’ ജേണലില് പ്രസിദ്ധീകരിച്ചിട്ടുണ്ട്. നായകള് ഉള്ളവര്ക്ക് വിഷാദരോഗവും ഉത്കണ്ഠയും കുറയുന്നതായി അരിസോണ സര്വകലാശാലയിലെ ഗവേഷകര് നേരത്തെ കണ്ടെത്തിയിരുന്നു.
