കാര്യമായ രോഗങ്ങളൊന്നുമില്ലാതെ ദീര്‍ഘകാലം ആരോഗ്യത്തോടെ ജീവിക്കാനാണ് എല്ലാവരും ആഗ്രഹിക്കുന്നത്. ശരീരത്തിന്റെ പ്രതിരോധശേഷി നല്ല തോതില്‍ മെച്ചപ്പെടുത്താനും ഊര്‍ജവും കരുത്തും ഫ്‌ളെക്‌സിബിലിറ്റിയും വര്‍ധിപ്പിക്കാനും വേണ്ട കാര്യങ്ങള്‍ നമ്മള്‍ തന്നെ ചെയ്യണം. കാലാവസ്ഥാ മാറ്റത്തിനനുസരിച്ച് നമ്മുടെ ശരീരത്തിന് ആവശ്യമുള്ള പോഷകങ്ങളിലും മാറ്റം വരുന്നു. രോഗപ്രതിരോധ സംവിധാനം ഈ സമയങ്ങളില്‍ ദുര്‍ബലപ്പെടാം എന്നതിനാല്‍ ആരോഗ്യം മെച്ചപ്പെടുത്താന്‍ പോഷകഗുണങ്ങളുള്ള ഭക്ഷണം കഴിക്കണം. ശരീരത്തില്‍ അയണിന്റെ ആവശ്യകതയും പ്രധാനമാണ്. രക്ത കോശങ്ങളിലൂടെ ഓക്‌സിജന്റെ സുഗമമായ പ്രവാഹം ഉറപ്പുവരുത്തുന്നതിന് ആവശ്യത്തിന് അയണ്‍ ഭക്ഷണക്രമത്തില്‍ ഉള്‍പ്പെടുത്തണം. അയണ്‍ ആഹാരക്രമത്തില്‍ ഉള്‍പ്പെടുത്താന്‍ ഇക്കാര്യങ്ങള്‍ ചെയ്യാം….
- ഡാര്‍ക്ക് ചോക്ക്ലേറ്റ് – പ്രമേഹ രോഗിയല്ലെങ്കില്‍ നിങ്ങള്‍ക്കു പരീക്ഷിക്കാവുന്ന ഒന്നാണ് ഡാര്‍ക്ക് ചോക്ക്ലേറ്റ്. നിങ്ങളുടെ ശരീരത്തിലെ ഇരുമ്പിന്റെ അംശം വര്‍ധിപ്പിക്കുന്നതിന് ഡാര്‍ക്ക് ചോക്ക്ലേറ്റ് സഹായിക്കുമെന്നാണ് ആധുനിക പഠനം അവകാശപ്പെടുന്നത്.
- ഗ്രില്‍ഡ് ഫിഷ് – ഗ്രില്‍ഡ് ഫിഷ് ആഴ്ചയില്‍ മൂന്നുനാലു ദിവസമെങ്കിലും ഉച്ചയൂണിനൊപ്പം മീന്‍ ഉറപ്പാക്കുക. കടല്‍മല്‍സ്യത്തില്‍ ധാരാളം അയണ്‍ അടങ്ങിയിട്ടുള്ളതുകൊണ്ടാണിത്. എണ്ണയില്‍ വറുത്തും പൊരിച്ചും കഴിക്കുന്നത് ഒഴിവാക്കണം.
- ബ്രൊക്കോളി – നമ്മുടെ നാട്ടിലെ പച്ചക്കറി കടകളിലും ഇപ്പോള്‍ ബ്രൊക്കോളി ലഭ്യമായി തുടങ്ങിയിട്ടുണ്ട്. ധാരാളം അയണ്‍ അടങ്ങിയ ബ്രൊക്കോളി പാകത്തിനു വേവിച്ച് നിങ്ങളുടെ രാത്രി ഭക്ഷണത്തോടോപ്പം ശീലമാക്കാം.
- പയറുവര്‍ഗങ്ങള്‍ – പയറുവര്‍ഗങ്ങള്‍ ആഹാരക്രമത്തില്‍ ഉള്‍പ്പെടുത്തുന്നത് നന്നായിരിക്കും. പ്രത്യേകിച്ച് ബീന്‍സ്, സോയ, പീനട്ട് തുടങ്ങിയവ അയണിന്റെ കലവറയാണ്. ഇവ വേവിച്ചും പച്ചയ്ക്കു മുളപ്പിച്ച് സാലഡ് രൂപത്തിലും ഇട ഭക്ഷണമായി കഴിയ്ക്കാം.
- ലീഫ് സാലഡ് – ലീഫ് സാലഡ് എന്നാല്‍ പച്ചക്കറികളും പഴങ്ങളും മാത്രം ചേര്‍ത്ത് ഉണ്ടാക്കണമെന്നില്ല. വേവിച്ച ഇലക്കറികള്‍ ഒലീവ് ഓയിലും ഉപ്പും ചേര്‍ത്ത് അല്‍പം സവാളയും കൊത്തിയരിഞ്ഞിട്ട് ലീഫ് സാലഡ് തയാറാക്കി കഴിച്ചുനോക്കൂ.
- മത്തങ്ങക്കുരു – മത്തങ്ങക്കുരു പലപ്പോഴും നാം വലിച്ചെറിഞ്ഞു കളയുകയാണ് പതിവ്. മത്തങ്ങ പാകം ചെയ്യുമ്പോള്‍ അതിന്റെ കുരു കഴുകിയുണക്കി പൊടിച്ച് വയ്ക്കുക. അരിപ്പൊടിക്കോ ഗോതമ്പുപൊടിക്കോ ഒപ്പം ചേര്‍ത്ത് ഇവ നാലുമണിപ്പലഹാരമായി കഴിക്കാം.
- ഇറച്ചി – ഇറച്ചി കഴിക്കുന്നവര്‍ ആണെങ്കില്‍ ലിവര്‍ പ്രത്യേകം പാകം ചെയ്തു കഴിച്ചു നോക്കൂ. റെഡ് മീറ്റില്‍ ശരീരത്തിനു വേണ്ട അയണ്‍ ധാരാളമായി അടങ്ങിയിട്ടുണ്ട്. ഇതു കഴിച്ചാല്‍ രക്തത്തിലെ ഹീമോഗ്ലോബിന്‍ അളവ് വര്‍ധിക്കും.
