ന്യൂഡല്ഹി: ദുബായ് എയര് ഷോയ്ക്കിടെ തേജസ് യുദ്ധവിമാനം തകര്ന്ന് വീരമൃത്യുവരിച്ച വിങ് കമാന്ഡര് നമന്ഷ് സ്യാലിന് നിറകണ്ണുകളോടെ അന്ത്യാഭിവാദ്യമര്പ്പിച്ച് ഭാര്യയും വ്യോമസേനാ വിങ് വിങ് കമാന്ഡറുമായ അഫ്സാന്. ആറു വയസുകാരി മകള് ആര്യയ്ക്കൊപ്പമാണ് അഫ്സാന് ഭര്ത്താവിന് അവസാന സല്യൂട്ട് നല്കിയത്. വികാരനിര്ഭരമായ രംഗങ്ങള് സംസ്കാരച്ചടങ്ങില് പങ്കെടുക്കാനെത്തിയവരുടെ കണ്ണുകളെയും ഈറനണിയിച്ചു.
നമന്ഷിന്റെ മൃതദേഹം അദ്ദേഹത്തിന്റെ ജന്മനാടായ ഹിമാചല്പ്രദേശിലെ പട്യാല്ക്കറിലെത്തിച്ചാണ് പൂര്ണസൈനിക ബഹുമതികളോടെ സംസ്കാരച്ചടങ്ങുകള് നടത്തിയത്. നൂറുകണക്കിനാളുകളാണ് അദ്ദേഹത്തിന് അന്തിമോപചാരമര്പ്പിക്കാന് പട്യാല്ക്കറിലെത്തിയത്. മറ്റു വ്യോമസേനാ ഉദ്യോഗസ്ഥര്ക്കൊപ്പം യൂണിഫോമിലെത്തിയാണ് ഭാര്യ അഫ്സാനും നമന്ഷ് സ്യാലിന് അന്ത്യാഭിവാദ്യം അര്പ്പിച്ചത്.
ദുബായ് എയര്ഷോയുടെ ഭാഗമായി വ്യോമാഭ്യാസത്തിനിടെ കഴിഞ്ഞ വെള്ളിയാഴ്ചയാണ് തേജസ് പോര്വിമാനം തകര്ന്ന് പൈലറ്റ് വിങ് കമാന്ഡര് നമന്ഷ് സ്യാല്(37) മരിച്ചത്.
അഭ്യാസപ്രകടനത്തിന്റെ ഭാഗമായി അല് മഖ്തൂം രാജ്യാന്തര വിമാനത്താവളത്തിനു മുകളിലൂടെ പറക്കവേയാണ് വിമാനം തകര്ന്നുവീണത്. അത്യാധുനിക സുരക്ഷാ സംവിധാനങ്ങളുള്ള വിമാനം അപകടത്തില്പ്പെട്ടതിനെക്കുറിച്ച് വ്യോമസേന അന്വേഷണം പ്രഖ്യാപിച്ചിട്ടുണ്ട്.
