എന്തുകൊണ്ടാണ് താന് കുട്ടിക്രിക്കറ്റിലെ ഏറ്റവും മൂല്യമേറിയ ബാറ്ററായി മാറുന്നതെന്ന് ഓസീസ് ക്രിക്കറ്റ് താരം മാക്സ്വെല് തെളിയിച്ചു. കുട്ടി ക്രിക്കറ്റിന്റെ ചരിത്രത്തിലെ ഏറ്റവും മികച്ച ബാറ്റര്മാരില് ഒരാളായ ഗ്ളെന് മാക്സ്വെല് വീണ്ടും റെക്കോഡിട്ടു. മേജര് ലീഗ് ക്രിക്കറ്റില് ലോസ് ഏഞ്ചല്സ് നൈറ്റ് റൈഡേഴ്സിനെതിരെ 48 പന്തില് മിന്നുന്ന സെഞ്ച്വറി നേടിയാണ് ഗ്ലെന് മാക്സ്വെല് റെക്കോര്ഡുകള് തകര്ത്തത്. തന്റെ എട്ടാം ടി20 സെഞ്ചുറിയില് 13 സിക്സറുകള് പറത്തിയ മാക്സ്വെല് മികച്ച ടി20 കളിക്കാരില് ഒരാളായി തന്റെ അധികാരം സ്ഥാപിച്ചു.
ലോസ് ഏഞ്ചല്സ് നൈറ്റ് റൈഡേഴ്സിനെതിരെ വാഷിംഗ്ടണ് ഫ്രീഡത്തിന് വേണ്ടിയാണ് ഗ്ലെന് മാക്സ്വെല് കളിക്കുന്നത്. മന്ദമായി തുടങ്ങി കത്തിക്കയറിയ മാക്സവെല് ആദ്യ 15 പന്തില് 11 റണ്സാണ് നേടിയത്. എന്നാല് പിന്നീട് ഗീയര്മാറ്റിയ അദ്ദേം 48 പന്തില് സെഞ്ച്വറിയും നേടി. മാക്സ്വെല് 13 സിക്സറുകളും രണ്ട് ഫോറുകളും അടിച്ചു. ലോസ് ഏഞ്ചല്സ് നൈറ്റ് റൈഡേഴ്സിനെതിരെ സെഞ്ച്വറി നേടിയ മാക്സ്വെല് ടി20 ക്രിക്കറ്റില് 10,500 റണ്സ് തികച്ചു. മാക്സ്വെല്ലിന്റെ ടി20 ക്രിക്കറ്റിലെ അദ്ദേഹത്തിന്റെ എട്ടാമത്തെ സെഞ്ച്വറിയാണിത്, അങ്ങനെ 10,500 റണ്സും 170-ലധികം വിക്കറ്റുകളും ഒന്നിലധികം ടി20 സെഞ്ചുറികളും തികച്ച ലോകത്തിലെ ഏക കളിക്കാരനായി അദ്ദേഹം മാറി.
കീറോണ് പൊള്ളാര്ഡും ഷൊയ്ബ് മാലിക്കും ടി20യില് 10000 റണ്സും 150ലധികം വിക്കറ്റുകളും നേടിയ മറ്റ് താരങ്ങളാണ്. പൊള്ളാര്ഡിന് ഒരു സെഞ്ച്വറി ഉള്പ്പെടെ 13,599 റണ്സും 326 വിക്കറ്റുകളും ഉണ്ട്, മാലിക്കിന് 13,571 റണ്സും 187 വിക്കറ്റുകളും ഉണ്ട്. ബാറ്റിംഗ് മികവിനൊപ്പം പന്ത് കൈകാര്യം ചെയ്യുന്നതിലും മാക്സ്വെല് ഏറെ മിടുക്കനാണ്. ടി20 ക്രിക്കറ്റില് 178 വിക്കറ്റുകളും ഓസീസ് ഓള്റൗണ്ടറുടെ പേരിലുണ്ട്. മാക്സ്വെല്ലിന്റെ തകര്പ്പന് സെഞ്ചുറിയുടെ പിന്ബലത്തില് ഫ്രീഡം 20 ഓവറില് 208-5 എന്ന സ്കോറാണ് നേടിയത്.
