ഭക്ഷണത്തില്‍ അതീവ ശ്രദ്ധ പുലര്‍ത്തേണ്ടവരാണ് മുലയൂട്ടുന്ന അമ്മമാര്‍. അമ്മയുടെയും കുഞ്ഞിന്റെയും ആരോഗ്യത്തിനു ഏറെ പ്രധാനമാണ് ആഹാരക്രമീകരണങ്ങള്‍. മുലയൂട്ടുന്ന കാലത്ത് കഴിക്കേണ്ടതും ഒഴിവാക്കേണ്ടതുമായ ആഹാരങ്ങള്‍ ഏതൊക്കെയെന്നു നോക്കാം.
മുലയൂട്ടുന്ന അമ്മമാര്‍ ഒഴിവാക്കേണ്ട ഭക്ഷണങ്ങള്‍ ;
- പരിപ്പ്, ഉരുളക്കിഴങ്ങ്, ചെറുപഴം, കടല എന്നീ വായുകോപമുണ്ടാക്കുന്ന ആഹാരങ്ങള്‍ ഒഴിവാക്കണം.
- ധാരാളം എരിവും പുളിയുമുള്ള ആഹാരങ്ങള്‍ ഒഴിവാക്കേണ്ടതാണ്.
- ചായ, കാപ്പി, കഫീന്‍ അടങ്ങിയ മറ്റു പാനീയങ്ങള്‍ എന്നിവയുടെ ഉപയോഗം കുറയ്ക്കുക. അത്തരം പാനീയങ്ങള്‍ ഇരുമ്പിന്റെ ആഗിരണം കുറയ്ക്കും.
- മദ്യം ഒഴിവാക്കുക.
- തണുത്ത പാനീയങ്ങള്‍
- രാസവസ്തുക്കള്‍ ചേര്‍ത്ത മീന്‍ അമ്മയുടെയും കുഞ്ഞിന്റെ ആരോഗ്യത്തെ സാരമായി ബാധിക്കും.
- എണ്ണയില്‍ വറുത്തവയും മസാല അധികം ചേര്‍ത്തവയുമായ വിഭവങ്ങളും ഒഴിവാക്കുക.
മുലയൂട്ടുന്ന അമ്മമാര്‍ കഴിക്കേണ്ട ഭക്ഷണങ്ങള്‍ ;
- ഒമേഗ ത്രീ ഫാറ്റി ആസിഡ് സമ്പുഷ്ടമായ മല്‍സ്യങ്ങള്‍ ആഹാരത്തില്‍ ഉള്‍പ്പെടുത്തണം.
- മാങ്ങ, ഏത്തക്ക, തണ്ണിമത്തന്‍, അപ്രികോട്ട്, ഓറഞ്ച്, മുന്തിരി എന്നിവ കഴിക്കുന്നത് ആരോഗ്യത്തിനും മലശോധനയ്ക്കും സഹായിക്കും.
- ഡയറി ഉല്‍പ്പന്നങ്ങള്‍, ചീസ്, പാല്‍ എന്നിവയിലൂടെ കാല്‍സ്യത്തിന്റെ കുറവ് ഏറെക്കുറെ പരിഹരിക്കാം. ഡയറി ഉല്‍പന്നങ്ങള്‍ കഴിക്കാത്തവര്‍ പച്ചിലക്കറികള്‍ കഴിച്ച് ആവശ്യമായ പോഷകങ്ങള്‍ നേടാം.
- വെള്ളം ധാരാളം കുടിക്കുക.
- ദിവസവും രണ്ടു കപ്പ് പഴങ്ങള്‍ എങ്കിലും കഴിക്കണമെന്നാണ് ഡോക്ടര്‍മാര്‍ നിര്‍ദേശിക്കുന്നത്.
- വൈറ്റമിനുകളും ആന്റിഓക്സിഡന്റുകളും ധാരാളം അടങ്ങിയ പച്ചക്കറികള്‍ കഴിക്കേണ്ടതായിട്ടുണ്ട്. ചീര, കിഴങ്ങുവര്‍ഗങ്ങള്‍, ക്യാരറ്റ് എന്നിങ്ങനെ എല്ലാ പച്ചക്കറികളും അമ്മമാര്‍ കഴിക്കണം. മൂന്നു കപ്പ് പച്ചക്കറികളാണ് മുലയൂട്ടുന്ന അമ്മമ്മാര്‍ കഴിക്കേണ്ടത്.
- മുലയൂട്ടുമ്പോള്‍ അമ്മമാര്‍ക്ക് അധികമായി 25 ഗ്രാം പ്രോട്ടീന്‍ ഓരോ ദിവസവും വേണ്ടതിനാല്‍ പ്രോട്ടീന്‍ ധാരാളമുള്ള ധാന്യങ്ങള്‍, പയറുവര്‍ഗങ്ങള്‍ എന്നിവ ആഹാരത്തിന്റെ ശീലമാക്കണം.
- മുലയൂട്ടുന്ന സമയത്ത് ധാരാളം കാല്‍സ്യം ശരീരം വലിച്ചെടുക്കുന്നതിനാല്‍ മതിയായ അളവില്‍ കാല്‍സ്യത്തിന്റെ കുറവ് ആഹാരത്തിലൂടെ പരിഹരിച്ചില്ലെങ്കില്‍ പിന്‍ക്കാലത്ത് ഒസ്റ്റിയോപൊറോസിസ് പോലെയുള്ള രോഗങ്ങള്‍ വരാനിടയുണ്ട്.
