നിങ്ങൾ ശ്രദ്ധിച്ചിട്ടുണ്ടോ, ഷോപ്പിംഗ് മാളുകളിൽ ജനലുകൾ ഉണ്ടാകില്ല. എന്തുകൊണ്ടാണ് ഷോപ്പിംഗ് മാളുകളിൽ ജനലുകൾ ഇല്ലാത്തത്? ഇത് ഒരു വ്യക്തിയുടെ മനശാസ്ത്രവുമായി എങ്ങനെ ബന്ധപ്പെട്ടിരിക്കുന്നുവെന്നും നോക്കാം.
വിനോദത്തിനും ഷോപ്പിംഗിനും വിശ്രമത്തിനുമായി രൂപകൽപ്പന ചെയ്ത ഒരു സ്ഥലത്ത് നമ്മൾ സന്ദർശിക്കുമ്പോൾ, സമയബോധം നഷ്ടപ്പെടാറുണ്ട്. മണിക്കൂറുകളോളം ഒരു മാളിൽ ചെലവഴിക്കുമ്പോൾ സമയം അതിവേഗം കടന്നുപോയത് എന്തുകൊണ്ടാണെന്ന് നിങ്ങൾ ചിന്തിച്ചിട്ടുണ്ടോ? മാളിനുള്ളിൽ പ്രവേശിക്കുമ്പോൾ തന്നെ പുറത്തെ അന്തരീക്ഷത്തിൽ നിന്ന് വ്യത്യസ്തമായ ഒരു ലോകത്തേക്ക് നമ്മൾ എത്തുന്നു. ആകർഷകമായ വെളിച്ചം, തണുത്ത അന്തരീക്ഷം, മനോഹരമായ കാഴ്ചകൾ, പകലാണോ രാത്രിയാണോ എന്നതിനെക്കുറിച്ച് ഒരു സൂചനയും ലഭിക്കാത്ത അവസ്ഥ എന്നിവയാണ് ഇതിന് കാരണം.
ഒരു വ്യക്തിയെ കൂടുതൽ നേരം അവിടെ ചിലവഴിക്കാൻ പ്രേരിപ്പിക്കുന്നതിനാണ് ഇത്തരത്തിൽ രൂപകൽപ്പന ചെയ്തിരിക്കുന്നത്. ഈ സ്ഥലങ്ങൾ, നിങ്ങളുടെ സമയത്തെയും പ്രശ്നങ്ങളെയും മറക്കാൻ സഹായിക്കുന്ന രീതിയിലാണ് ഡിസൈന് ചെയ്തിട്ടുള്ളത്. നിങ്ങളുടെ തീരുമാനങ്ങളെ സ്വാധീനിക്കുകയും, നിങ്ങൾ ഒരു കാര്യത്തിൽ ശ്രദ്ധ കേന്ദ്രീകരിക്കാൻ സഹായിക്കുകയും, വിനോദത്തിനും ഷോപ്പിംഗിനും അനുയോജ്യമായ ഒരു അന്തരീക്ഷം സൃഷ്ടിക്കുകയും ചെയ്യുന്നു.
മാളുകളുടെ രൂപകൽപ്പനയുടെ പിന്നിലെ രഹസ്യം
ഉപഭോക്താക്കളെ ഉത്പ്പന്നങ്ങളോട് താൽപ്പര്യമുള്ളവരാക്കി നിലനിർത്തുന്നതിനാണ് മാളുകൾ നിർമ്മിച്ചിട്ടുള്ളത്. ജനലുകളില്ലാത്തത് ഇതിന്റെ ഒരു പ്രത്യേകതയാണ്. ഇത് യാദൃശ്ചികമല്ല, ലോകമെമ്പാടുമുള്ള ഒരു തന്ത്രമാണിത്. ജനലുകൾ ഒഴിവാക്കുന്നതിനുള്ള പ്രധാന കാരണങ്ങൾ ഇതാ:
- ശ്രദ്ധ വ്യതിചലിക്കാതിരിക്കാൻ: പുറം ലോകം കാണിക്കുന്ന ജനലുകൾ ഉപഭോക്താക്കളുടെ ശ്രദ്ധ വ്യതിചലിപ്പിക്കുകയും സമയം കടന്നുപോകുന്നു എന്നതിനെക്കുറിച്ച് ഓർമ്മിപ്പിക്കുകയും ചെയ്യും. ജനല് ഇല്ലെങ്കില് സന്ദർശകർ എത്ര സമയം കഴിഞ്ഞുവെന്ന് ശ്രദ്ധിക്കാതെ അകത്ത് തുടരുന്നു.
- വെളിച്ചം നിയന്ത്രിക്കാൻ: ജനലുകളില്ലാത്ത മാളുകളിൽ ആകർഷകവും സ്ഥിരവുമായ വെളിച്ചം നിലനിർത്താൻ കൃത്രിമ ലൈറ്റിംഗ് ഉപയോഗിക്കുന്നു. ഇത് കടകളെയും ഉൽപ്പന്നങ്ങളെയും കൂടുതൽ ആകർഷകമായി കാണിക്കാൻ സഹായിക്കുന്നു.
- ചെലവഴിക്കാൻ പ്രേരിപ്പിക്കുന്നു: പകലാണോ രാത്രിയാണോ എന്നതിനെക്കുറിച്ചോ കാലാവസ്ഥയെക്കുറിച്ചോ ഒരു ധാരണയുമില്ലാതെ ആളുകൾ കൂടുതൽ നേരം മാളിനുള്ളിൽ നിൽക്കുകയും കൂടുതൽ ഷോപ്പിംഗ് നടത്തുകയും ചെയ്യണം. കൂടാതെ, ഈ രൂപകൽപ്പന സുരക്ഷ വർദ്ധിപ്പിക്കുകയും ശ്രദ്ധ വ്യതിചലിക്കുന്നത് കുറയ്ക്കുകയും, അതുവഴി മികച്ച ഷോപ്പിംഗ് അനുഭവം നൽകുകയും ചെയ്യുന്നു.
ജനലുകളില്ലാത്തതിൻ്റെ മനശാസ്ത്രപരമായ ഫലം
ഇത്തരം രൂപകൽപ്പന ശാന്തവും സുരക്ഷിതവും കുളിര്മ്മയുള്ളതുമായ ഒരു അന്തരീക്ഷം സൃഷ്ടിക്കുന്നു. പ്രകൃതിദത്തമായ വെളിച്ചമോ പുറംലോകത്തെക്കുറിച്ചുള്ള കാഴ്ചയോ ഇല്ലാത്തപ്പോൾ, ആളുകൾ പുറത്തെ കാര്യങ്ങളെക്കുറിച്ച് ചിന്തിക്കാതെ വാച്ചില് നോക്കാന് മറന്ന് ഷോപ്പിംഗിൽ കൂടുതൽ ശ്രദ്ധ കേന്ദ്രീകരിക്കുന്നു. പ്രത്യേകിച്ചും മാളിനുള്ളിലെ ഏറ്റവും ഗുണനിലവാരമുള്ളവയാണെന്നു തോന്നുന്ന തരത്തിലുള്ള വൈവിധ്യമാര്ന്ന ഉല്പ്പങ്ങളുടെ കണ്ണഞ്ചിക്കുന്ന പ്രദര്ശനവും ലോകോത്തര ബ്രാന്ഡുകളുടെ നിരകളും ഉപഭോക്താവിനെ മറ്റെല്ലാം മറക്കാന് നിര്ബന്ധിതനാക്കുന്നു. കസ്റ്റമേഴ്സിനോടുള്ള മാള് ജീവനക്കാരുടെ വിധേയത്വം നിറഞ്ഞ പെരുമാറ്റവുമൊക്കെ ഈ മാനസികാവസ്ഥയിലേയ്ക്ക് ജനത്തെ എത്തിക്കുന്നു.
