ചായയ്ക്കും കാപ്പിക്കും ഡിസ്പോസിബിൾ കപ്പുകൾ ഉപയോഗിക്കുന്ന ശീലം നമുക്കുണ്ട് . ഡിസ്പോസിബിൾ പേപ്പർ കപ്പുകൾ ആരോഗ്യത്തിന് നല്ലതാണെന്ന് ആളുകൾ വിശ്വസിക്കുന്നു. കൂടാതെ പ്ലാസ്റ്റിക് കപ്പുകള്‍ ഉപയോഗിക്കുമ്പോഴുള്ള പാരിസ്ഥിതികപ്രശ്നങ്ങള്‍ക്കും പരിഹാരമാണ്.
എന്നാൽ ഡോക്ടർമാർ ഇതിന് വിപരീത അഭിപ്രായമാണ് പങ്കുവയ്ക്കുന്നത് . പേപ്പർ കപ്പുകൾ നിർമ്മിക്കാൻ ആരോഗ്യത്തിന് വളരെ അപകടകരമായ പല തരത്തിലുള്ള രാസവസ്തുക്കളും പ്ലാസ്റ്റിക്കുകളും ഉപയോഗിക്കുന്നുണ്ടെന്ന് വിദഗ്ധർ പറയുന്നു . ഇതുമായി ബന്ധപ്പെട്ട്, ന്യൂഡൽഹി പിഎസ്ആർഐ ഹോസ്പിറ്റലിലെ സീനിയർ കൺസൾട്ടന്റ് ഹെമറ്റോളജിസ്റ്റും ഓങ്കോളജിസ്റ്റുമായ ഡോ. അമിത് ഉപാധ്യായ പറയുന്നത് പേപ്പർ കപ്പ് ആരോഗ്യത്തിന് അപകടകരമാണെന്നാണ് .
കപ്പ് കടലാസ് കൊണ്ടാണ് നിർമ്മിച്ചതെങ്കിൽ, അതിൽ വെള്ളമോ ഏതെങ്കിലും ദ്രാവകമോ അധികസമയം തങ്ങിനിൽക്കാൻ കഴിയില്ല. അത്തരമൊരു സാഹചര്യത്തിൽ, വാട്ടർപ്രൂഫിംഗിനായി, കപ്പിന്റെ ഉള്ളിൽ വളരെ നേർത്ത പ്ലാസ്റ്റിക് കൊണ്ട് പൂശുന്നു, അതിനെ മൈക്രോപ്ലാസ്റ്റിക് എന്നാണ് വിളിക്കുന്നത് . മൈക്രോപ്ലാസ്റ്റിക് നമ്മുടെ ആരോഗ്യത്തിന് ഹാനികരമാണ് . കാപ്പിയോ ചൂടുവെള്ളമോ പോലുള്ള ഏതെങ്കിലും ചൂടുള്ള പാനീയം ഈ കപ്പുകളിലേക്ക് ഒഴിക്കുമ്പോൾ, ഈ പാളിയിൽ നിന്ന് മൈക്രോ പ്ലാസ്റ്റിക്കിന്റെ വളരെ ചെറിയ കണികകൾ പുറത്തുവരാൻ തുടങ്ങും. ഈ കണങ്ങൾ വളരെ ചെറുതാണ്, അവ ഒരു മൈക്രോസ്കോപ്പ് ഉപയോഗിച്ച് മാത്രമേ കാണാൻ കഴിയൂ. ഇവ നമ്മുടെ ആരോഗ്യത്തിന് അങ്ങേയറ്റം ഹാനികരമാണ്.
ഐഐടി ഖരഗ്പൂർ കുറച്ച് വർഷങ്ങൾക്ക് മുമ്പ് ഒരു പഠനം നടത്തുകയുണ്ടായി, ഇത്തരത്തിൽ ഒരു പേപ്പർ കപ്പിൽ ചൂടുള്ള പാനീയം 15 മിനിറ്റ് സൂക്ഷിച്ചാൽ ഏകദേശം 20,000 മുതൽ 25,000 വരെ മൈക്രോപ്ലാസ്റ്റിക് കണികകൾ അടങ്ങിയിരിക്കുമെന്ന് ഈ പഠനം കണ്ടെത്തി. ഈ കണികകൾ ശരീരത്തിൽ പ്രവേശിച്ച് ഹോർമോൺ അസന്തുലിതാവസ്ഥയും ക്യാൻസറും പോലുള്ള ഗുരുതരമായ രോഗങ്ങൾ സൃഷ്ടിക്കുന്നു.
എന്താണ് മികച്ച ഓപ്ഷൻ?
ഇത്തരമൊരു സാഹചര്യം നിലനിൽക്കുന്നതിനാൽ പേപ്പർ കപ്പുകൾ ഉപയോഗിക്കുന്നത് പരമാവധി ഒഴിവാക്കണം. പകരം, പോർസലൈൻ അല്ലെങ്കിൽ സ്റ്റെയിൻലെസ് സ്റ്റീൽ കപ്പുകൾ ഉപയോഗിക്കുക. പുറത്ത് നിന്ന് ചായയോ കാപ്പിയോ കുടിക്കുകയാണെങ്കിൽ, കളിമൺ കപ്പുകൾ മികച്ച ഓപ്ഷനുകളിലൊന്നാണ്. അല്ലെങ്കിൽ വീണ്ടും വീണ്ടും ഉപയോഗിക്കാവുന്ന കപ്പുകൾ എപ്പോഴും കൈവശം വയ്ക്കുക. ഇത് പരിസ്ഥിതിക്ക് മാത്രമല്ല നമ്മുടെ ആരോഗ്യത്തിനും കൂടുതൽ ഗുണം ചെയ്യും.
