ന്യൂഡല്ഹി: സാധാരണ കടകളില് 15 മുതല് 20 എണ്ണം വരുന്ന ഒരു പാക്കിന് 10 രൂപയ്ക്ക് ലഭിക്കുന്ന ഒരു സാധനത്തിന് ലക്ഷങ്ങള് വിലയിട്ടാല് എങ്ങനെ? പ്രശസ്ത ഇറ്റാലിയന് ലക്ഷ്വറി ബ്രാന്ഡായ പ്രഡയുടെ ഏറ്റവും പുതിയ ഉത്പന്നമായ ഒരു ബ്രോച്ചിന് 69,000 രൂപയാണ് വില. സേഫ്റ്റി പിന്നിനോട് സാമ്യമുള്ള ആ ആക്സസറിയാണ് ഇപ്പോള് സാമൂഹിക മാധ്യമങ്ങളില് ചര്ച്ചയായിരിക്കുന്നത്.
‘ക്രോഷെ സേഫ്റ്റി പിന് ബ്രോച്ച്’ എന്ന് പേരിട്ടിരിക്കുന്ന ഈ ഉത്പന്നം വര്ണ്ണാഭമായ ക്രോഷെ ത്രെഡ് കൊണ്ട് പൊതിഞ്ഞിരിക്കുന്നു. ഇതിന് മുകളിലായി പ്രഡയുടെ സിഗ്നേച്ചര് ത്രികോണ ലോഗോയുമണ്ട്.
അതിന്റെ വില ഞെട്ടിക്കുന്ന 69,000 രൂപ (775 ഡോളര്) ആണ്. ബ്രോച്ച് പിച്ചളയും പഞ്ഞിയും കൊണ്ടാണ് നിര്മിച്ചിരിക്കുന്നത്, ഏകദേശം 3.15 ഇഞ്ച് വലുപ്പമുണ്ട്.ഈ ബ്രോച്ച് മൂന്ന് വ്യത്യസ്ത കളര് കോമ്പിനേഷനുകളില് ലഭ്യമാണ്. നീലയും തവിട്ടും, ബേബി പിങ്കും പിസ്തേഷ്യ ഗ്രീനും, ഓറഞ്ചും തവിട്ടും എന്നിങ്ങനെയാണ് ഈ കോമ്പിനേഷനുകള്. ഇതിന് ശരത്കാല സീസണിനോട് ചേര്ന്നുള്ള ഭാവമാണ് നല്കുന്നത്. വാങ്ങുന്നവര്ക്ക് ഈ മൂന്ന് സ്റ്റൈലുകളില് ഇഷ്ടമുള്ളത് തെരഞ്ഞെടുക്കാം.
എന്നാല്, വില സംബന്ധിച്ചാണു വിമര്ശനം ഉയര്ന്നത്. ‘ഞാന് ഇത് ചന്ദ്നി ചൗക്കില്നിന്ന് 5 രൂപയ്ക്ക് വാങ്ങി’ ഒരാള് എഴുതി. നേരത്തെ, 1.2 ലക്ഷം രൂപ വിലയിട്ട കോലാപുരി സ്റ്റൈല് ചപ്പല് പുറത്തിറക്കിയതിലൂടെ പ്രഡ വാര്ത്തകളില് ഇടം നേടിയിരുന്നു. മഹാരാഷ്ട്രയിലെ പരമ്പരാഗത കരകൗശല പാദരക്ഷകളില്നിന്ന് പ്രചോദനം ഉള്ക്കൊണ്ട ഈ ചെരുപ്പുകള്, അതിയായ വിലമതിപ്പ് കാരണവും യഥാര്ത്ഥ കരകൗശല വിദഗ്ധരെ വേണ്ടത്ര അംഗീകരിച്ചില്ല എന്ന കാരണത്താലും വിമര്ശിക്കപ്പെട്ടിരുന്നു.
