രോമവളര്ച്ച ഒരു പ്രശ്നമാകുമ്പോള് ഷേവിംഗ് വളരെ എളുപ്പമുള്ള ഒരു പരിഹാരമാണ്. എന്നാല് അതിന് ശേഷമുള്ള കാര്യങ്ങളോ? ചർമ്മത്തിലെ അസ്വസ്ഥത, ഇൻഗ്രോൺ ഹെയർ, റേസർ ബേൺ, ചർമ്മം അടർന്നുപോകുക എന്നിവയെല്ലാം ഷേവിംഗിന്റെ പൊതുവായ പ്രശ്നങ്ങളാണ്.
ഷേവിംഗിന് മുൻപ് എക്സ്ഫോളിയേറ്റ് ചെയ്യുന്നതിലൂടെ ഈ പ്രശ്നങ്ങളെല്ലാം ഒഴിവാക്കാൻ സാധിക്കും. എപ്പോൾ എക്സ്ഫോളിയേറ്റ് (Exfoliation- ചർമ്മത്തിന്റെ ഉപരിതലത്തിൽ നിന്ന് മൃതകോശങ്ങൾ നീക്കം ചെയ്ത് പുതുമയുള്ളതും മൃദുവും തിളക്കമുള്ളതുമായ ചർമ്മം വെളിപ്പെടുത്തുന്ന പ്രക്രിയയാണ് എക്സ്ഫോളിയേഷൻ) ചെയ്യണം എന്നതാണ് പ്രധാന ചോദ്യം.
ഷേവിംഗിന് മുൻപോ ശേഷമോ?
ഇത് മനസ്സിലാക്കുന്നതിന് എക്സ്ഫോളിയേറ്റിംഗിനും ഷേവിംഗിനും പിന്നിലെ ശാസ്ത്രം മനസ്സിലാക്കേണ്ടത് പ്രധാനമാണ്. എക്സ്ഫോളിയേറ്റിംഗ് ചർമ്മത്തിലെ മൃതകോശങ്ങളെ നീക്കം ചെയ്യാൻ സഹായിക്കും, ഇത് കൂടുതൽ വൃത്തിയുള്ള ഷേവിംഗിനും ഇൻഗ്രോൺ ഹെയർ ഉണ്ടാകാനുള്ള സാധ്യത കുറയ്ക്കാനും അസ്വസ്ഥതകൾ ഇല്ലാതാക്കാനും സഹായിക്കുന്നു. എക്സ്ഫോളിയേറ്റ് ചെയ്യാനുള്ള ശരിയായ സമയം വളരെ പ്രധാനമാണ്. തെറ്റായ സമയത്ത് ചെയ്യുന്നത് കൂടുതൽ പ്രശ്നങ്ങൾക്ക് കാരണമാകും. അതിനാൽ, മിനുസമുള്ളതും ആരോഗ്യമുള്ളതുമായ ചർമ്മം ലഭിക്കാൻ എപ്പോൾ എക്സ്ഫോളിയേറ്റ് ചെയ്യണമെന്ന് നോക്കാം.
എന്തുകൊണ്ട് ഷേവിംഗിന് മുൻപ് എക്സ്ഫോളിയേറ്റ് ചെയ്യണം?
ഷേവിംഗിന് മുൻപ് എക്സ്ഫോളിയേറ്റ് ചെയ്യുന്നത് ആരോഗ്യകരമായ ചർമ്മം ലഭിക്കാൻ ശരിയായ മാർഗമാണ്. ഇത് കൂടുതൽ വൃത്തിയുള്ള ഷേവിംഗിന് സഹായിക്കുകയും ഇൻഗ്രോൺ ഹെയർ ഉണ്ടാകാനുള്ള സാധ്യത കുറയ്ക്കുകയും മുടി മൃദുവാക്കാൻ സഹായിക്കുകയും ചെയ്യുന്നു. ചർമ്മത്തിലെ മൃതകോശങ്ങളെ എക്സ്ഫോളിയേറ്റ് ചെയ്യുന്നത് വഴി റേസർ ചർമ്മത്തിൽ കൂടുതൽ എളുപ്പത്തിൽ നീങ്ങുകയും നല്ല ഫിനിഷിംഗ് ലഭിക്കുകയും ചെയ്യും. ഷേവ് ചെയ്യുന്നതിന് മുൻപ് ശരീരത്തിലെ സുഷിരങ്ങൾ തുറക്കുകയും മുടി മൃദുവാകുകയും ചെയ്യുന്നത് റേസർ ചർമ്മത്തിൽ ഉരസുന്നത് കുറയ്ക്കും. അതേസമയം, ഷേവ് ചെയ്ത ഉടൻ എക്സ്ഫോളിയേറ്റ് ചെയ്യുന്നത് കൂടുതൽ അസ്വസ്ഥതകൾ ഉണ്ടാക്കും. കാരണം ഷേവ് ചെയ്യുമ്പോൾ തന്നെ ചർമ്മത്തിൻ്റെ മുകളിലെ പാളിയിലെ മൃതകോശങ്ങൾ നീക്കം ചെയ്യപ്പെടുന്നുണ്ട്. അതിനാൽ, ഷേവ് ചെയ്ത ശേഷം 24-48 മണിക്കൂർ കഴിഞ്ഞ് എക്സ്ഫോളിയേറ്റ് ചെയ്യുന്നതാണ് നല്ലത്.
ഷേവിംഗ് എങ്ങനെ ശരിയായ രീതിയിൽ ചെയ്യാം?
മികച്ച ഷേവിംഗിനായി, എക്സ്ഫോളിയേഷന് ശേഷം ഷേവിംഗ് ക്രീമോ ജെല്ലോ ഉപയോഗിച്ച് ചർമ്മം മോയിസ്ചറൈസ് ചെയ്യുക. ഒരു മൂർച്ചയുള്ള റേസർ ഉപയോഗിക്കുന്നത് ചർമ്മവുമായുള്ള സമ്പർക്കം കുറയ്ക്കുകയും അതുവഴി അസ്വസ്ഥതകളും വലിവുകളും ഇല്ലാതാക്കുകയും ചെയ്യുന്നു. ഷേവിംഗിന് ശേഷം, സുഗന്ധമില്ലാത്ത മോയിസ്ചറൈസറോ കറ്റാർ വാഴ, ഹയാലൂറോണിക് ആസിഡ് പോലുള്ള ചേരുവകൾ അടങ്ങിയ ലോഷനോ പുരട്ടുക. ഇത് ഈർപ്പം നിലനിർത്താൻ സഹായിക്കും. ആൽക്കഹോൾ അടങ്ങിയ ഉൽപ്പന്നങ്ങൾ ചർമ്മം വരണ്ടതാക്കാനും അസ്വസ്ഥതകൾ ഉണ്ടാക്കാനും സാധ്യതയുള്ളതിനാൽ അത്തരം ഉൽപ്പന്നങ്ങൾ ഒഴിവാക്കുക. ചർമ്മത്തിന് സൗമ്യവും പോഷകഗുണങ്ങളുള്ളതുമായ ഉൽപ്പന്നങ്ങൾ തിരഞ്ഞെടുക്കുക.
എക്സ്ഫോളിയേഷൻ എങ്ങനെ സഹായിക്കുന്നു?
എക്സ്ഫോളിയേഷൻ ചർമ്മത്തിലെ മൃതകോശങ്ങളെ നീക്കം ചെയ്യുകയും രോമങ്ങളെ പുറത്തുകൊണ്ടുവരികയും ഇൻഗ്രോൺ ഹെയറും ചുവന്ന പാടുകളും കുറയ്ക്കുകയും ചെയ്യുന്നു. ശരിയായ സമയത്തുള്ള എക്സ്ഫോളിയേഷൻ ചർമ്മത്തിൽ അസ്വസ്ഥതകൾ ഉണ്ടാക്കാത്ത ഒരു സ്മൂത്ത് ഷേവിംഗ് സാധ്യമാക്കുകയും ചർമ്മത്തെ മിനുസമുള്ളതാക്കുകയും ചെയ്യുന്നു.
