നടന്‍ പൃഥ്വിരാജ് സംവിധാനം ചെയ്യുന്ന മലയാളത്തിലെ ബ്രഹ്മാണ്ഡ സിനിമയാകുമെന്ന് കരുതുന്ന എല്‍2 – എംപുരാനില്‍ ഹോളിവുഡ് സിനിമാക്കാരുടെ എണ്ണം കൂടുന്നു. എമ്പുരാന്റെ നിര്‍മ്മാതാക്കള്‍ കഴിഞ്ഞ കുറച്ച് ആഴ്ചകളായി ചിത്രത്തിലെ സഹകഥാപാത്രങ്ങളെ ദിവസേന പ്രഖ്യാപിച്ചുകൊണ്ടിരിക്കെ ചിത്രത്തില്‍ മിഷേല്‍ മെനുഹിന്‍ എന്ന കഥാപാത്രത്തെ ആന്‍ഡ്രിയ തിവാദര്‍ അവതരിപ്പിക്കുന്നു എന്നതാണ് അവരില്‍ നിന്നുള്ള ഏറ്റവും പുതിയ വിവരം.
അനൗണ്‍സ്‌മെന്റ് വീഡിയോയില്‍, താരം തന്റെ കഥാപാത്രത്തെ ‘എംഐ6-ല്‍ ജോലി ചെയ്യുന്ന എസ്എഎസ് ഓപ്പറേറ്റര്‍, ഖുറേഷി-അബ്‌റാമിന്റെ പിന്നാലെ പോകുന്നു’ എന്നാണ് വിശേഷിപ്പിച്ചത്. തന്റെ കഥാപാത്രത്തിന്റെ ദൗത്യം വ്യക്തിപരമാണെന്നും ‘ശരിക്കും ഉയര്‍ന്ന’ പങ്കാളിത്തം സിനിമയില്‍ ഉണ്ടെന്നും അവര്‍ കൂട്ടിച്ചേര്‍ത്തു. ലൂസിഫറില്‍ കടന്നുപോകുമ്പോള്‍ പറഞ്ഞ അതേ കഥാപാത്രമായിരിക്കാം മിഷേല്‍. ലൂസിഫറിന്റെ ആദ്യ രംഗത്തില്‍, ഒരു ഉദ്യോഗസ്ഥന്‍ മിഷേലിനെ വിളിച്ച് ഖുറേഷി-അബ്‌റാമിനെ പിന്തുടരാന്‍ പറയുന്നു. 2019-ലെ സിനിമയുടെ അവസാനത്തിലാണ് ഈ രംഗം വനരുന്നത്.
ഈ കഥാപാത്രത്തെ അവതരിപ്പിച്ച അനുഭവത്തെക്കുറിച്ച് തിവാദര്‍ പറഞ്ഞു, ‘ഞങ്ങളുടെ സംവിധായകന്‍ പൃഥ്വിരാജ് സുകുമാരനോട് ഞാന്‍ വളരെ നന്ദിയുള്ളവനാണ്. അദ്ദേഹത്തിന്റെ നിശ്ചയദാര്‍ഢ്യവും നേതൃപാടവവും അദ്ദേഹത്തിന്റെ കാഴ്ചപ്പാടുകള്‍ എല്ലായ്‌പ്പോഴും ആശയവിനിമയം ചെയ്യാനുള്ള കഴിവും എനിക്ക് വളരെയധികം പ്രചോദനം നല്‍കുകയും വളരെയധികം ആത്മവിശ്വാസം നല്‍കുകയും ചെയ്തു. പ്രത്യേകിച്ചും ഇന്ത്യയിലെ സെറ്റാണ് ഞാന്‍ ഇതുവരെ സന്ദര്‍ശിച്ചതില്‍ വച്ച് ഏറ്റവും വലിയ സെറ്റ്.’
‘ഇതിഹാസതാരം മോഹന്‍ലാലിനൊപ്പം’ പ്രവര്‍ത്തിക്കാനുള്ള അവസരത്തിന് താരം നന്ദിയും പറഞ്ഞു. കില്ലിംഗ് ഈവ്, വാരിയര്‍ നണ്‍ തുടങ്ങിയ പരമ്പരകളിലെ കഥാപാത്രങ്ങള്‍ക്ക് തിവാദര്‍ അറിയപ്പെടുന്നു. ഇതിനൊപ്പം സ്പാനിഷ് സിനിമകളിലും കൊക്കകോള അടക്കമുള്ള പരസ്യങ്ങളിലൂടെയും പ്രത്യക്ഷപ്പെട്ടിട്ടുള്ള അവര്‍ റുമേനിയന്‍ വംശജയായ ബ്രിട്ടീഷ് നടിയാണ്. ഇവരെ കൂടാതെ ഫ്രഞ്ച് നടന്‍ എറിക്ക് എബോണിയും എല്‍ 2 ; എംപുരാനില്‍ വേഷമിടുന്നുണ്ട്. ഗെയിംഓഫ് ത്രോണ്‍ നടനെയും നേരത്തേ അണിയറക്കാര്‍ പ്രഖ്യാപിച്ചിരുന്നു.
