ഒരിക്കല്‍ നിര്‍ബന്ധിത ബാലവിവാഹത്തിന്റെ വക്കിലെത്തിയ പെണ്‍കുട്ടി ആന്ധ്രയിലെ ഇന്റര്‍മീഡിയേറ്റ് പരീക്ഷയില്‍ ടോപ്പ് സ്‌കോററായി. ബാല വിവാഹം ഉള്‍പ്പെടെ എല്ലാ പ്രതിബന്ധങ്ങളെയും നിശ്ചയദാര്‍ഡ്യം കൊണ്ടു മറികടന്ന കുര്‍ണൂല്‍ ജില്ലയിലെ അഡോണി മണ്ഡലത്തിലെ പെഡ്ഡ ഹരിവനം സ്വദേശിയായ നിര്‍മ്മല എന്ന പെണ്‍കുട്ടിയാണ് ജീവിതത്തിലെ വമ്പന്‍ വിജയങ്ങളില്‍ ഒന്ന് നേടിയത്.
പ്രതികൂല സാഹചര്യങ്ങളെ അഭിമുഖീകരിക്കുന്ന അവളുടെ യാത്ര ശ്രദ്ധേയമായ ധൈര്യവും ദൃഢനിശ്ചയവുമാണ്. ദരിദ്ര പശ്ചാത്തലത്തില്‍ ജനിക്കുകയും വളരുകയും ചെയ്ത നിര്‍മ്മല പ്രതിസന്ധികളെ മനക്കരുത്തു കൊണ്ടു നേരിടുകയായിരുന്നു. മൂന്ന് സഹോദരിമാരെ ഇതിനകം വിവാഹം കഴിച്ച മാതാപിതാക്കളുടെ സമ്മര്‍ദ്ദവും ഉണ്ടായിരുന്നിട്ടും, നിര്‍മ്മല തന്റെ വിദ്യാഭ്യാസം ഉപേക്ഷിക്കാന്‍ തയ്യാറായില്ല. സാമ്പത്തിക ഞെരുക്കവും അടുത്തുള്ള ജൂനിയര്‍ കോളേജിന്റെ അഭാവവും കാരണം മാതാപിതാക്കള്‍ അവളുടെ സ്‌കൂള്‍ വിദ്യാഭ്യാസം അവസാനിപ്പിക്കാന്‍ ശ്രമിച്ചപ്പോള്‍, പ്രാദേശിക നിയമസഭാംഗമായ വൈ സായിപ്രസാദ് റെഡ്ഡിയുടെ ഔട്ട്‌റീച്ച് പ്രോഗ്രാമിലൂടെയുള്ള സഹായം നിര്‍മ്മല തേടി.
ഇപ്പോള്‍ അവളുടെ നേട്ടത്തിന്, വിദ്യാഭ്യാസ മന്ത്രാലയവും ആശംസകള്‍ അറിയിച്ചിരിക്കുകയാണ്. ഔദ്യോഗിക സോഷ്യല്‍ മീഡിയ ചാനലുകള്‍ വഴി അവരുടെ വിജയം പോസ്റ്റ് ചെയ്യുകയും ചെയ്തു. ” ഇന്ത്യയിലെ പിന്നാക്ക വിഭാഗങ്ങള്‍ക്കായി വിദ്യാഭ്യാസ മന്ത്രാലയം നടത്തുന്ന കസ്തൂര്‍ബാ ഗാന്ധി ബാലിക വിദ്യാലയത്തില്‍ നിന്നുള്ള കുര്‍ണൂലില്‍ താമസിക്കുന്ന ജി. നിര്‍മ്മലയ്ക്ക് അഭിനന്ദനങ്ങള്‍. ആന്ധ്രാപ്രദേശ് ഇന്റര്‍മീഡിയറ്റ് ബോര്‍ഡിന്റെ ഒന്നാം വര്‍ഷ ഇന്റര്‍മീഡിയറ്റ് പരീക്ഷയില്‍ ഒന്നാം സ്ഥാനം നേടി” അതില്‍ കുറിച്ചു.
അവളുടെ ദുരവസ്ഥ കണ്ട് മനസ്സലിഞ്ഞ റെഡ്ഡി തന്റെ അവസ്ഥ ജില്ലാ കളക്ടര്‍ ജി സൃജനയുടെ ശ്രദ്ധയില്‍ പെടുത്തുകയും ശൈശവ വിവാഹത്തില്‍ നിന്ന് സൃജന നിര്‍മ്മലയെ രക്ഷിക്കുകയും ചെയ്തു. ജില്ലാ ഭരണകൂടത്തിന്റെ ഇടപെടലോടെ, അവളെ പിന്നീട് അസ്പാരിയിലെ കസ്തൂര്‍ബാ ഗാന്ധി ബാലികാ വിദ്യാലയത്തില്‍ ചേര്‍ത്തതോടെ അവളുടെ പരിവര്‍ത്തിത യാത്രയ്ക്ക് തുടക്കമായി.
കസ്തൂര്‍ബാ ഗാന്ധി ബാലികാ വിദ്യാലയത്തില്‍ എത്തിയത് മുതല്‍, നിര്‍മ്മലയുടെ അര്‍പ്പണബോധത്തിനും സ്ഥിരോത്സാഹത്തിനും അതിരുകളില്ലായി. അവള്‍ അഭിമുഖീകരിച്ച വെല്ലുവിളികള്‍ക്കിടയിലും, അവള്‍ പഠനത്തില്‍ മികവ് പുലര്‍ത്തി, ഈ വര്‍ഷത്തെ ഇന്റര്‍മീഡിയറ്റ് പരീക്ഷകളില്‍ 440-ല്‍ 421 മാര്‍ക്കുകള്‍ സ്‌കോര്‍ ചെയ്താണ് ഒന്നാമതെത്തിയത്.
നിര്‍മ്മലയുടെ സ്വപ്നങ്ങള്‍ വ്യക്തിപരമായ വിജയത്തിനപ്പുറം അനേകം പെണ്‍കുട്ടികള്‍ക്ക് പ്രചോദനമാണ്. ശൈശവ വിവാഹങ്ങളെ ചെറുക്കാനും തന്നെപ്പോലുള്ള പെണ്‍കുട്ടികളെ അവരുടെ അഭിലാഷങ്ങള്‍ പിന്തുടരാനും സഹായിക്കുക എന്ന ലക്ഷ്യത്തോടെ ഒരു ഐപിഎസ് ഓഫീസറാകാനാണ് നിര്‍മ്മലയുടെ ആഗ്രഹം.
