ബൈബിളില് പരാമര്ശിക്കുന്ന ശിലോഹാംകുളം കണ്ടെത്തിയെന്നു പുരാവസ്തു ഗവേഷകര്. ബൈബിളില് പുതിയ നിയമത്തില് യോഹന്നാന്റെ പുസ്തകത്തില് ഒന്പതാം അധ്യായത്തിലാണു ശിലോഹാം കുളത്തെക്കുറിച്ചുള്ള പരാമര്ശമുള്ളത്. ജന്മനാ അന്ധനായ വ്യക്തിയുടെ കണ്ണില് ചേറു പുരട്ടിയശേഷം ശിലോഹാം കുളത്തില് കണ്ണുകഴുയാന് യേശു നിര്ദേശിച്ചെന്നാണു ബൈബിളിലുള്ള പരാമര്ശം.കണ്ണുകഴുകിയപ്പോള് അദ്ദേഹത്തിനു കാഴ്ച ലഭിച്ചു. പുരാതന ജറുസലേം നഗരത്തിന്റെ ഹൃദയഭാഗത്ത്, ശിലോഹാം കുളത്തിന്റെ മുന് സ്ഥാനം അടയാളപ്പെടുത്തുന്ന ഒരു വലിയ അണക്കെട്ട് പുരാവസ്തു ഗവേഷകര് കണ്ടെത്തി.യഹൂദാ രാജാക്കന്മാരായ യോവാശിന്റെയും അമസ്യയുടെയും കാലത്താണ് ആ ഘടന നിര്മിച്ചത്. ഏകദേശം 2800 വര്ഷം പഴക്കമുള്ളതാണ് ആ ഘടന.
ഇസ്രായേല് പുരാവസ്തു അതോറിറ്റി(ഐ.എ.എ)യിലെ ഖനന ഡയറക്ടര് ഇറ്റാമര് ബെര്ക്കോയാണു ഗവേഷണത്തിനു നേതൃത്വം നല്കിയത്. ‘ഇതുവരെ ബൈബിളിലെ വചനങ്ങളില് മാത്രമേ ശിലോഹായിലെ കുളത്തിന്റെ നിലനില്പ്പിനെക്കുറിച്ച് നാം വായിച്ചിട്ടുള്ളൂ. ഇപ്പോള് നമുക്ക് അതിന്റെ സ്പര്ശ്യമായ അവശിഷ്ടങ്ങളും 2800 വര്ഷം മുമ്പുള്ള ആരംഭവും കാണാന് കഴിയും. അക്കാലത്തെ അണക്കെട്ട്, 11 മീറ്ററിലധികം ഉയരമുള്ളതും രാജാക്കന്മാരായ യോവാശിന്റെയും അമസ്യയുടെയും കാലത്ത് നിര്മിച്ചതുമാണ്.’- അദ്ദേഹം പറഞ്ഞു.
‘പുരാതന ജറുസലേമിലെ ഏറ്റവും താഴ്ന്ന ഭാഗമാണിത്. എല്ലാ വെള്ളവും, എല്ലാ ഒഴുക്കും, നഗരത്തിന്റെ ഈ കേന്ദ്രീകൃത വലിയ ഡ്രെയിനേജ് ബേസിനിലേക്ക് ഒഴുകുന്നു. ഈ അണക്കെട്ട് ഇല്ലായിരുന്നെങ്കില്, ഈ ചാനലിലൂടെ ഒഴുകുന്ന വെള്ളം കിഡ്രോണ് താഴ്വരയിലൂടെ നേരിട്ട് ചാവുകടലിലേക്ക് ഒഴുകുമായിരുന്നു.’- അദ്ദേഹം പറഞ്ഞു. മതിലിന്റെ അസാധാരണ നിര്മാണം അതിനെ വളരെ ചെറിയ സമയ ഇടവേളയിലേക്ക് തിയ്യതി നിശ്ചയിക്കാന് സഹായിച്ചുവെന്ന് വൈസ്മാന് ഇന്സ്റ്റിറ്റ്യൂട്ട് ഓഫ് സയന്സിലെ ജോഹന്നാ റെജവും എലിസബെത്ത ബോറെറ്റോയും പറഞ്ഞു. ഈ സമയത്ത് അസാധാരണമായി കുറഞ്ഞ മഴ ലഭിച്ചത് കാലാവസ്ഥാ വ്യതിയാനത്തിന് പ്രതികരണമായി കുളം നിര്മിച്ചതാണെന്ന് സൂചിപ്പിക്കുന്നു.
യോഹന്നാന്റെ സുവിശേഷം ഒന്പതാം അധ്യായത്തില് പറയുന്നത് ഇങ്ങനെ:
- അവന് കടന്നുപോകുമ്പോള് പിറവിയിലെ കുരുടനായോരു മനുഷ്യനെ കണ്ടു.
2 അവന്റെ ശിഷ്യന്മാര് അവനോടു: റബ്ബീ, ഇവന് കുരുടനായി പിറക്കത്തക്കവണ്ണം ആര് പാപം ചെയ്തു? ഇവനോ ഇവന്റെ അമ്മയപ്പന്മാരോ എന്നു ചോദിച്ചു.
3 അതിന്നു യേശു: അവന് എങ്കിലും അവന്റെ അമ്മയപ്പന്മാരെങ്കിലും പാപം ചെയ്തിട്ടല്ല, ദൈവപ്രവൃത്തി അവങ്കല് വെളിവാകേണ്ടതിന്നത്രേ.
4 എന്നെ അയച്ചവന്റെ പ്രവൃത്തി പകല് ഉള്ളേടത്തോളം നാം ചെയ്യേണ്ടതാകുന്നു;ആര്ക്കും പ്രവര്ത്തിച്ചുകൂടാത്ത രാത്രി വരുന്നു;
5 ഞാന് ലോകത്തില് ഇരിക്കുമ്പോള് ലോകത്തിന്റെ വെളിച്ചം ആകുന്നു എന്നു ഉത്തരം പറഞ്ഞു.
6 ഇങ്ങനെ പറഞ്ഞിട്ടു അവന് നിലത്തു തുപ്പി തുപ്പല്കൊണ്ടു ചേറുണ്ടാക്കി ചേറു അവന്റെ കണ്ണിന്മേല് പൂശി
7 നീ ചെന്നു ശിലോഹാംകുളത്തില് കഴുകുക എന്നു അവനോടു പറഞ്ഞു;ശിലോഹാം എന്നതിന്നു അയക്കപ്പെട്ടവന് എന്നര്ത്ഥം. അവന് പോയി കഴുകി… എന്നാണു ബൈബിളിലുള്ളത്.
