ന്യൂയോർക്കിലെ ഒരു അമ്മ താൻ പ്രതീക്ഷിച്ചതിനേക്കാൾ വളരെ വലിയ ഒരു ആൺകുഞ്ഞിന് ജന്മം നൽകിയതിന്റെ അമ്പരപ്പിലും സന്തോഷത്തിലുമാണ്. നവജാതശിശുവിന് സാധാരണ കുഞ്ഞുങ്ങളേക്കാൾ ഇരട്ടി ഭാരമുണ്ടായിരുന്നു, ഇത് കുടുംബത്തിനും ആശുപത്രിയ്ക്കും ഒരു സവിശേഷ നിമിഷമായി മാറി.
ടെറിക്കയ്ക്കും ഷോണിനും തങ്ങളുടെ കുട്ടിക്ക് സാധാരണയേക്കാൾ കൂടുതൽ വലിപ്പമുണ്ടാകുമെന്ന് അറിയാമായിരുന്നു. എന്നാൽ ജനുവരി 31-ന് കെയുഗ മെഡിക്കൽ സെന്ററിൽ ഷോൺ ജൂനിയർ ജനിച്ചപ്പോൾ അവർ ഞെട്ടിപ്പോയി. 5.9 കിലോ തൂക്കമുള്ള ഈ കുഞ്ഞ് ഇറ്റാക്ക ആസ്ഥാനമായുള്ള ഈ ആശുപത്രിയിൽ ഇന്നുവരെ ജനിച്ചതിൽ വച്ച് ഏറ്റവും ഭാരമേറിയ കുട്ടിയാണെന്ന് ‘ന്യൂയോർക്ക് പോസ്റ്റ്’ റിപ്പോർട്ട് ചെയ്തു.
നാല് കുട്ടികളുടെ അമ്മയായ ടെറിക്ക പറയുന്നത്, മകന് കുറച്ച് ഭാരം കൂടുമെന്ന് കരുതിയിരുന്നെങ്കിലും ഇത്രയധികം പ്രതീക്ഷിച്ചില്ലെന്നാണ്. മൂന്ന് മുതൽ ആറ് മാസം വരെ പ്രായമുള്ള കുട്ടികളുടെ വസ്ത്രങ്ങളും ഡയപ്പറുമാണ് അവൻ ഇപ്പോൾ ധരിക്കുന്നത്. ഒരു മൂന്ന് മാസം പ്രായമുള്ള കുഞ്ഞിനാണ് താൻ ജന്മം നൽകിയതെന്ന് തനിക്ക് തോന്നുന്നതായും അവർ പറഞ്ഞു.
അതേ ദിവസം തന്നെ ജനിച്ച മാർഗോട്ട് എന്ന പെൺകുഞ്ഞിനൊപ്പം ഷോൺ ജൂനിയറിനെ കിടത്തിയിരിക്കുന്ന ചിത്രം ആശുപത്രി അധികൃതർ ഫേസ്ബുക്കിൽ പങ്കുവെച്ചു. മാർഗോട്ടിന് വെറും 1.8 കിലോ മാത്രമായിരുന്നു ഭാരം. ക്ലോയിയുടെയും വിക്ടറിന്റെയും മകളാണ് മാർഗോട്ട്. റെക്കോർഡ് ഭാരമുള്ള കുഞ്ഞിനൊപ്പം തന്റെ മകൾ ജനിച്ചത് ആ നിമിഷത്തെ കൂടുതൽ സ്മരണീയമാക്കിയെന്ന് ക്ലോയി പറഞ്ഞു. എല്ലാ കുഞ്ഞുങ്ങളും വ്യത്യസ്ത വലിപ്പത്തിലും ഭാരത്തിലുമാണ് ജനിക്കുന്നതെന്ന് ഇത് കാണിക്കുന്നുവെന്നും അവർ കൂട്ടിച്ചേർത്തു.
ഓരോ കുഞ്ഞും ഓരോ ജനനകഥയും സവിശേഷമാണെന്ന് ആശുപത്രി അധികൃതർ കുറിച്ചു. സെൻട്രലസ് ഹെൽത്തിലെ മറ്റേണൽ ആൻഡ് ചൈൽഡ് ഹെൽത്ത് ഡയറക്ടർ റോബിൻ ടോർഗൽസ്കി പറഞ്ഞത്, കുഞ്ഞിന്റെ ഭാരം കുറവായാലും കൂടുതലായാലും കുടുംബത്തിന് മികച്ച പരിചരണം നൽകാൻ മെഡിക്കൽ ടീം സജ്ജമാണെന്നാണ്.
ഗിന്നസ് വേൾഡ് റെക്കോർഡ്സ് പ്രകാരം, ലോകത്ത് ഇതുവരെ രേഖപ്പെടുത്തിയിട്ടുള്ളതിൽ വച്ച് ഏറ്റവും ഭാരമേറിയ കുഞ്ഞ് 1955-ൽ ഇറ്റലിയിൽ ജനിച്ച 9.97 കിലോ തൂക്കമുള്ള ശിശുവാണ്.
