കാലിഫോര്‍ണിയയില്‍ ശുദ്ധജല തടാകം അപ്രത്യക്ഷമായി 130 വര്‍ഷത്തിന് ശേഷം തിരിച്ചെത്തി. ഒരിക്കല്‍ മിസിസിപ്പി നദിയുടെ പടിഞ്ഞാറുള്ള ഏറ്റവും വലിയ ശുദ്ധജലാശയമായിരുന്ന ഈ തടാകം തിരിച്ചുവരികയും സാന്‍ ജോക്വിന്‍ താഴ്വരയില്‍ അതിന്റെ സ്ഥാനം വീണ്ടെടുക്കുകയും ഏകദേശം 94,000 ഏക്കര്‍ സ്വകാര്യ കൃഷിയിടം വിഴുങ്ങുകയും ചെയ്തു.
19-ആം നൂറ്റാണ്ടിന്റെ അവസാനത്തില്‍ മനുഷ്യരുടെ കൈയേറ്റവും പ്രകൃതിക്കിണങ്ങാത്ത നിര്‍മ്മാണങ്ങളും മൂലമാണ് തടാകം അപ്രത്യക്ഷമായത്. ഇപ്പോള്‍ അത് നാടകീയമായ ഒരു തിരിച്ചുവരവ് നടത്തിയിരിക്കുന്നു. ‘പ്രേത തടാകം’ എന്ന് വിളിക്കപ്പെടുന്ന തുലാരെ തടാകം 1850-കളില്‍ വറ്റിവരളാന്‍ തുടങ്ങി. വറ്റല്‍ പ്രക്രിയ ഒരു സ്വാഭാവിക പ്രതിഭാസമല്ല. മറിച്ച് ബോധപൂര്‍വമായ മനുഷ്യ പ്രവര്‍ത്തനങ്ങളുടെ ഫലമാണ്.
കുടിയേറ്റക്കാര്‍ വെള്ളം തിരിച്ചുവിടുന്നതിനായി നൂറുകണക്കിന് ജലസേചന കനാലുകളും തടങ്ങളും നിര്‍മ്മിച്ചു. ഭൂമിയെ കൃഷിയോഗ്യമായ കൃഷിയിടമാക്കി മാറ്റി. ‘വീണ്ടെടുക്കല്‍’ എന്നറിയപ്പെടുന്ന ഈ പ്രക്രിയ തടാകത്തെ നശിപ്പിക്കുക മാത്രമല്ല തദ്ദേശീയരായ ടാച്ചി യോകുട്ട് ഗോത്രത്തെ കുടിയിറക്കുകയും ചെയ്തു. അവര്‍ ‘പാഷി’ എന്ന് വിളിക്കപ്പെടുന്ന തടാകം അവരുടെ ജീവിതരീതിയുടെ കേന്ദ്രമായിരുന്നു.
തടാകത്തെക്കുറിച്ച് വിപുലമായി പഠിച്ച ഗവേഷകനായ വിവിയന്‍ അണ്ടര്‍ഹില്‍ പറയുന്നതനുസരിച്ച്, കൃഷി ആവശ്യങ്ങള്‍ക്കായി ഭൂമിയുടെ ഉടമസ്ഥാവകാശം ലഭിച്ച കുടിയേറ്റക്കാര്‍ ഭൂമി വറ്റിച്ചു. എന്നിരുന്നാലും, 2023 ലെ വസന്തകാലത്ത് പ്രകൃതിതന്നെ തടാകം വീണ്ടെടുക്കുകയായിരുന്നു.
കാലിഫോര്‍ണിയയിലെ തുടര്‍ച്ചയായ ശീതകാല കൊടുങ്കാറ്റുകളും സിയറ നെവാഡയിലെ ഗണ്യമായ മഞ്ഞുവീഴ്ചയും ചേര്‍ന്ന്, മനുഷ്യനിര്‍മ്മിത ഡ്രെയിനേജ് സംവിധാനങ്ങളെ തകര്‍ക്കുകയും തടാകത്തിന്റെ അടിത്തട്ട് വീണ്ടും നിറയ്ക്കുകയും ചെയ്തു.
ഒരിക്കല്‍ പിസ്ത, ബദാം, പരുത്തി എന്നിവ ഉല്‍പ്പാദിപ്പിച്ചിരുന്ന ആയിരക്കണക്കിന് ഏക്കര്‍ ഫലഭൂയിഷ്ഠമായ കൃഷിയിടങ്ങള്‍ വെള്ളത്തിനടിയിലാക്കി. അതേസമയം തുലാരെ തടാകത്തിന്റെ പുനര്‍ജന്മം വിസ്മയകരമായെങ്കിലും ആശങ്കാജനകമാണ്, കാരണം ഇതുവരെ അവിടെ കൃഷിക്കായി ഉപയോഗിച്ചിരുന്ന രാസവളങ്ങള്‍, കീടനാശിനികള്‍, ഇലക്ട്രിക്കല്‍ ഉപകരണങ്ങള്‍ തുടങ്ങിയ ദോഷകരമായ വസ്തുക്കളും പാരിസ്ഥിതികവും സുരക്ഷാവുമായ ആശങ്കകള്‍ ഉയര്‍ത്തുന്നുണ്ട്. തടാകത്തിന്റെ തിരിച്ചുവരവ് ഈ പ്രദേശത്തെ കൃഷിയെ തടസ്സപ്പെടുത്തിയിട്ടുണ്ടെങ്കിലും, അത് പ്രാദേശിക ആവാസവ്യവസ്ഥയുടെ അത്ഭുതകരമായ പുനരുജ്ജീവനമാണ് കൊണ്ടുവന്നത്.
താറാവുകളും ഈഗ്രേറ്റുകളും മറ്റ് ജലപക്ഷികളും അതിന്റെ തീരത്തേക്ക് ഒഴുകാന്‍ തുടങ്ങിയിരിക്കുന്നു, അതേസമയം തവളകളും ട്യൂള്‍ പുല്ലും തടാകത്തിന്റെ അരികുകളില്‍ തങ്ങളുടെ ആവാസ വ്യവസ്ഥകള്‍ വീണ്ടെടുക്കുന്നു. ഒരുകാലത്ത് ഈ മേഖലയിലെ ഏറ്റവും വലിയ ശുദ്ധജലശേഖരമായിരുന്നു ഇതെങ്കിലും തുലാരെ തടാകത്തിന്റെ ഭാവി അനിശ്ചിതത്വത്തിലാണ്.
