ജപ്പാനിലെ ഏറ്റവും വടക്കേയറ്റത്തെ പ്രധാന ദ്വീപായ ഹൊക്കൈഡോയുടെ തീരത്ത്, നിരവധി കൊലയാളി തിമിംഗലങ്ങള് മഞ്ഞുകട്ടയില് കുടുങ്ങിയതിനാല് രക്ഷപ്പെടാന് കഴിയാതെ വലഞ്ഞു. ഷിറെറ്റോക്കോ പെനിന്സുലയിലെ റൗസു എന്ന പട്ടണത്തിന് സമീപമുള്ള മത്സ്യത്തൊഴിലാളികള്, ഓര്കാസ് എന്നും വിളിക്കപ്പെടുന്ന കൊലയാളി തിമിംഗലങ്ങളെ ഒരു കിലോമീറ്റര് ദൂരത്തിലാണ് കടല്ത്തീരത്ത് കണ്ടത്.
16 മുതല് 17 വരെ തിമിംഗലങ്ങളുടെ കൂട്ടം കടന്നുകയറുന്ന മഞ്ഞുപാളികള്ക്കിടയില് വായുവിനായി പുറത്തേക്ക് വരുന്നത് ഡ്രോണ് ദൃശ്യങ്ങളില് നിന്നും വ്യക്തമായി. അതേസമയം ഉച്ചയോടെ, തിമിംഗലങ്ങള് കാഴ്ചയില് നിന്ന് അപ്രത്യക്ഷമാകുകയും ചെയ്തു. ‘ഐസ് പൊട്ടുന്നതും അവര് അങ്ങനെ രക്ഷപ്പെടുന്നതും കാത്തിരിക്കുകയല്ലാതെ ഞങ്ങള്ക്ക് മറ്റ് മാര്ഗമില്ല,’ ജപ്പാനിലെ പബ്ലിക് ബ്രോഡ്കാസ്റ്ററായ എന്എച്ച്കെയോട് ഒരു റൗസു മുനിസിപ്പല് ഉദ്യോഗസ്ഥന് പറഞ്ഞു.
റഷ്യയുടെ ഫാര് ഈസ്റ്റിലെ അമുര് നദിയില് നിന്ന് ഉത്ഭവിച്ച് ഒഖോത്സ്ക് കടലിനു കുറുകെ സഞ്ചരിക്കുന്ന ഡ്രിഫ്റ്റ് ഐസ്, തിങ്കളാഴ്ചയാണ് ഉപദ്വീപിന്റെ വടക്കന് ഭാഗത്തുള്ള ഷാരിക്ക് സമീപം ആദ്യമായി നിരീക്ഷിക്കപ്പെട്ടതെന്ന് ജാപ്പനീസ് ദിനപത്രമായ യോമിയുരി ഷിംബുന് റിപ്പോര്ട്ട് ചെയ്യുന്നു. പിന്നീട് തെക്കോട്ട് നീങ്ങി ചൊവ്വാഴ്ച രാവിലെയോടെ റൗസുവിലെത്തി.
കാറ്റിന്റെ അഭാവം മഞ്ഞുപാളികള് ഏറെക്കുറെ നിശ്ചലമാകാന് കാരണമായെന്നും ഇത് കുടുങ്ങിക്കിടക്കുന്ന തിമിംഗലങ്ങളുടെ സ്ഥിതി കൂടുതല് വഷളാക്കുമെന്നും ഉദ്യോഗസ്ഥര് ചൂണ്ടിക്കാട്ടി. 2005-ല് സമാനമായ ഒരു സംഭവത്തില്, കൊലയാളി തിമിംഗലങ്ങളുടെ ഒരു പോഡ് റൗസുവിന് പുറത്തുള്ള കടല് ഹിമത്തില് കുടുങ്ങി, രക്ഷാപ്രവര്ത്തനം സാധ്യമായില്ല.