Hollywood

കാത്തിരിപ്പിന് വിരാമം! ബോണ്ടിനു പുതിയ മുഖം; റോബർട്ട് പാറ്റിൻസൺ അടുത്ത ജെയിംസ് ബോണ്ട്

ലോകമെമ്പാടുമുള്ള സിനിമാ പ്രേക്ഷകരെ ആവേശത്തിലാഴ്ത്തി പുതിയ ജെയിംസ് ബോണ്ടിനെ ഔദ്യോഗികമായി പ്രഖ്യാപിച്ചു. ഹോളിവുഡിലെ മുൻനിര താരങ്ങളിലൊരാളായ റോബർട്ട് പാറ്റിൻസൺ ആയിരിക്കും ഇനി വിഖ്യാത ബ്രിട്ടീഷ് ചാരനായി വെള്ളിത്തിരയിലെത്തുക. ഹാരി പോട്ടറിലെ സെഡ്രിക്കായും ട്വിലൈറ്റിലെ എഡ്വേർഡായും ബാറ്റ്മാനായുമൊക്കെ പ്രേക്ഷകരുടെ പ്രിയങ്കരനായ പാറ്റിൻസൺ, ബോണ്ടിനെ തന്റെ തനതായ ശൈലിയിൽ എങ്ങനെയാകും അവതരിപ്പിക്കുക എന്ന ആകാംക്ഷയിലാണ് ആരാധകർ.

ജെയിംസ് ബോണ്ട് ഫ്രാഞ്ചൈസിയുടെ ഔദ്യോഗിക സോഷ്യൽ മീഡിയ പേജുകളിലൂടെയാണ് പുതിയ താരത്തെ പരിചയപ്പെടുത്തിയത്. ജെയിംസ് ബോണ്ടായി വേഷമിടുന്ന എട്ടാമത്തെ നടനാണ് നാൽപ്പതുകാരനായ പാറ്റിൻസൺ.

കറുത്ത സ്യൂട്ടണിഞ്ഞ് ഇരുട്ടിൽ നിന്നും കൈത്തോക്കുമായി പുറത്തേക്ക് വരുന്ന പാറ്റിൻസണെയാണ് പ്രഖ്യാപന വീഡിയോയിൽ കാണാനാകുന്നത്. പശ്ചാത്തലത്തിൽ പ്രശസ്തമായ 007 തീം സംഗീതവും കേൾക്കാം. ‘ഐഡന്റിറ്റി കൺഫേംഡ്’ എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്. ‘ജെയിംസ് ബോണ്ട് തിരിച്ചെത്തും’ എന്ന വാചകത്തോടെയാണ് ഈ ക്ലിപ്പ് അവസാനിക്കുന്നത്.

പുതിയ സിനിമയുടെ പേര്, ചിത്രീകരണം തുടങ്ങുന്ന തീയതി, മറ്റ് അഭിനേതാക്കൾ എന്നിവയെക്കുറിച്ചുള്ള വിവരങ്ങൾ നിർമ്മാതാക്കൾ ഇതുവരെ പുറത്തുവിട്ടിട്ടില്ല. ‘ഡ്യൂൺ’ സിനിമകളിലൂടെ പ്രശസ്തനായ ഡെനി വില്ലെന്യൂവാണ് അടുത്ത ബോണ്ട് ചിത്രം സംവിധാനം ചെയ്യുന്നത്.

ജെയിംസ് ബോണ്ടായി സ്റ്റുഡിയോ തന്നെ തിരഞ്ഞെടുത്തതിലുള്ള വലിയ സന്തോഷം പാറ്റിൻസൺ പങ്കുവെച്ചു. സിനിമാ ലോകത്തെ ഏറ്റവും ഐതിഹാസികമായ കഥാപാത്രങ്ങളിലൊന്നാണ് ജെയിംസ് ബോണ്ടെന്നും 007 ഏജന്റിന്റെ വേഷം ഏൽപ്പിക്കപ്പെട്ടത് ജീവിതത്തിലെ വലിയൊരു അംഗീകാരമാണെന്നും താരം പറഞ്ഞു. സംവിധായകൻ ഡെനി വില്ലെന്യൂവിനും ആമസോൺ എംജിഎം സ്റ്റുഡിയോസിനും അദ്ദേഹം നന്ദി അറിയിക്കുകയും ചെയ്തു.

രണ്ട് പതിറ്റാണ്ടുകൾക്ക് ശേഷമാണ് ജെയിംസ് ബോണ്ട് വേഷത്തിലേക്ക് പുതിയൊരു നടൻ എത്തുന്നത്. 2006-ൽ പുറത്തിറങ്ങിയ ‘കാസിനോ റോയൽ’ എന്ന ചിത്രത്തിലൂടെയാണ് ഡാനിയൽ ക്രെയ്ഗ് ബോണ്ടായി അരങ്ങേറ്റം കുറിച്ചത്. തുടർന്ന് ‘ക്വാണ്ടം ഓഫ് സൊലേസ്’, ‘സ്കൈഫോൾ’, ‘സ്പെക്ട്രെ’, ‘നോ ടൈം ടു ഡൈ’ എന്നീ ചിത്രങ്ങളിലും അദ്ദേഹം ബോണ്ടായി തിളങ്ങി.

2021-ലാണ് അവസാന ബോണ്ട് സിനിമയായ ‘നോ ടൈം ടു ഡൈ’ റിലീസ് ചെയ്തത്. ഷോൻ കോണറി, ഡേവിഡ് നിവൻ, ജോർജ് ലേസൻബി, റോജർ മൂർ, തിമോത്തി ഡാൾട്ടൺ, പിയേഴ്സ് ബ്രോസ്നൻ, ഡാനിയൽ ക്രെയ്ഗ് എന്നിവരാണ് പാറ്റിൻസണിന് മുൻപ് ജെയിംസ് ബോണ്ടായി വേഷമിട്ട താരങ്ങൾ.

‘ഹാരി പോട്ടർ ആൻഡ് ദ ഗോബ്ലറ്റ് ഓഫ് ഫയർ’ എന്ന ചിത്രത്തിലൂടെ ശ്രദ്ധേയനായ പാറ്റിൻസൺ ട്വിലൈറ്റ് സിനിമാ പരമ്പരയിലൂടെയാണ് ലോകമെമ്പാടും പ്രശസ്തനായത്. പിന്നീട് ഡിസി ചിത്രങ്ങളിൽ ബാറ്റ്മാനായും അദ്ദേഹം തിളങ്ങി. ‘ദ് ഒഡീസി’, ‘ഡ്രാമ’, ‘പ്രൈംടൈം’ എന്നിവയാണ് പാറ്റിൻസണിന്റേതായി ഈ വർഷം റിലീസായ സിനിമകൾ. ‘ഡ്യൂൺ 3’ ആണ് താരത്തിന്റെ അടുത്തതായി പുറത്തിറങ്ങാനുള്ള ചിത്രം.