ഡെൽറ്റ എയർലൈൻസ് വിമാനത്തിലെ യാത്രക്കാർക്ക് തികച്ചും വ്യത്യസ്തമായ ഒരു തിരഞ്ഞെടുപ്പ് മുന്നില്‍വച്ച് പൈലറ്റ്. വിമാനത്തിനുള്ളിൽ നായ മൂത്രമൊഴിച്ചതിനെ തുടർന്ന് ശുചീകരണത്തിനായി യാത്ര വൈകിപ്പിക്കുക, അല്ലെങ്കിൽ ദുർഗന്ധം സഹിച്ചുകൊണ്ട് കൃത്യസമയത്ത് യാത്ര തിരിക്കുക. ഏതു വേണമെന്ന് യാത്രക്കാര്‍ക്ക് വോട്ടെടുപ്പിലൂടെ തീരുമാനിക്കാം.
ന്യൂയോർക്കിലെ ലാ ഗ്വാർഡിയ വിമാനത്താവളത്തിൽ നടന്ന ഈ സംഭവത്തിന്റെ വീഡിയോ സോഷ്യൽ മീഡിയയിൽ തരംഗമായി മാറിയിരിക്കുകയാണ്. യാത്രക്കാരുടെ അഭിപ്രായം അറിയാൻ പൈലറ്റ് കൈയടിച്ച് വോട്ട് ചെയ്യാൻ ആവശ്യപ്പെട്ടതായി വീഡിയോ പോസ്റ്റ് ചെയ്ത വ്യക്തി പറഞ്ഞു. തിങ്കളാഴ്ചയാണ് ഈ വീഡിയോ പങ്കുവെച്ചതെങ്കിലും സംഭവം കൃത്യമായി എപ്പോഴാണ് നടന്നതെന്ന് വ്യക്തമല്ല.
“കഴിഞ്ഞ സർവീസിനിടെ ഒരു നായ വിമാനത്തിൽ മൂത്രമൊഴിച്ചെന്നും, ക്ലീനിംഗ് ടീമിനെ വിളിച്ച് വൃത്തിയാക്കുകയോ അല്ലെങ്കിൽ ദുർഗന്ധം സഹിച്ചുകൊണ്ട് കൃത്യസമയത്ത് യാത്ര തിരിക്കുകയോ ചെയ്യാമെന്ന് പൈലറ്റ് വന്ന് അറിയിച്ചു,” ടെലിവിഷൻ അവതാരകയായ ജെന്നിഫർ കോഫി തൻ്റെ ഇൻസ്റ്റാഗ്രാം ഹാൻഡിലിൽ വീഡിയോ പങ്കുവെച്ചുകൊണ്ട് കുറിച്ചു. “കൃത്യസമയത്ത് നാട്ടിലെത്താൻ ദുർഗന്ധം സഹിക്കാൻ തയ്യാറുള്ളവർ എത്രപേരുണ്ടെന്ന് അറിയാൻ അദ്ദേഹം കൈകൾ ഉയർത്തി വോട്ട് ചെയ്യാൻ ആവശ്യപ്പെട്ടു,” അവർ കൂട്ടിച്ചേർത്തു.
കോഫി ഈ വിമാനത്തിൽ യാത്ര ചെയ്തിരുന്നില്ലെങ്കിലും, അവർ പങ്കുവെച്ച വീഡിയോയിൽ യാത്രക്കാർ തങ്ങളുടെ വോട്ട് രേഖപ്പെടുത്താൻ കൈകൾ ഉയർത്തുന്നത് കാണാം. എന്നാൽ ഈ പെട്ടെന്നുള്ള വോട്ടെടുപ്പിൻ്റെ അന്തിമ ഫലം എന്തായിരുന്നു എന്നത് വ്യക്തമല്ല.
വീഡിയോയ്ക്ക് താഴെ നിരവധി ഉപയോക്താക്കൾ കമൻ്റുകളുമായി രംഗത്തെത്തി. “മൃഗങ്ങളെ വിമാനത്തിൽ കയറ്റാതിരിക്കുകയാണ് വേണ്ടത്!! എനിക്ക് എൻ്റെ പൂച്ചകളെ ഇഷ്ടമാണ്, പക്ഷേ ഞങ്ങൾ അവറ്റകളുമായി യാത്ര ചെയ്യാറില്ല!” എന്ന് ഒരാൾ കുറിച്ചു.
എന്നാൽ വിമാനം വൈകിപ്പിക്കാൻ മാത്രം ഇത് വലിയൊരു വിഷയമല്ലെന്നാണ് മറ്റു ചിലരുടെ അഭിപ്രായം. “ഞാൻ കൈ ഉയർത്തും! ഉടൻ തന്നെ യാത്ര തിരിക്കാം!” എന്ന് മറ്റൊരു ഉപയോക്താവ് കമൻ്റ് ചെയ്തു. “അല്പം മണ്ണോ പൂച്ചകൾക്കായി ഉപയോഗിക്കുന്ന മണ്ണോ അതിന് മുകളിൽ വിതറി യാത്ര തുടരൂ,” എന്നായിരുന്നു വേറൊരാളുടെ അഭിപ്രായം.
ഈ സംഭവത്തെക്കുറിച്ച് എയർലൈൻ കമ്പനി ഇതുവരെ ഔദ്യോഗികമായി പ്രതികരിച്ചിട്ടില്ല.
