ഉത്തർപ്രദേശിലെ ഹാപ്പൂരിൽ നടന്ന ജന്മദിനാഘോഷത്തിനിടെ യുവാക്കളുടെ സംഘം തിരക്കുള്ള ദേശീയപാതയിൽ അപകടകരമായ സ്റ്റണ്ടുകൾ നടത്തിയത് ആശങ്കയ്ക്കിടയാക്കി. നിർത്തിയിട്ടിരുന്ന കാറിന്റെ ബോണറ്റിൽ വെച്ച് യുവാവ് വാൾ ഉപയോഗിച്ച് അഞ്ച് കേക്കുകൾ മുറിക്കുന്നതിന്റെയും കൂട്ടുകാർ അത് ആഘോഷിക്കുന്നതിന്റെയും വീഡിയോ സോഷ്യൽ മീഡിയയിൽ വൈറലായി.
ദേശീയപാത 9-ൽ (NH-9) ‘രാജാ കി ഹവേലി’ ഹോട്ടലിന് സമീപമാണ് സംഭവം നടന്നത്. പൊതുജനങ്ങളുടെ സുരക്ഷയ്ക്കും ഗതാഗത നിയമങ്ങൾക്കും ഭീഷണിയായ ഈ ആഘോഷത്തിന്റെ ദൃശ്യങ്ങൾ വലിയ രീതിയിൽ വിമർശനം നേരിട്ടു.
ഒരു വീഡിയോയിൽ, തന്റെ കാറിന് സമീപം നിൽക്കുന്ന യുവാവ് ബോണറ്റിൽ വെച്ചിരിക്കുന്ന അഞ്ച് കേക്കുകൾ വാൾ കൊണ്ട് മുറിക്കുന്നത് കാണാം. ഈ സമയം ചുറ്റും നിൽക്കുന്ന സുഹൃത്തുക്കൾ ഉറക്കെ ആർത്തുവിളിക്കുകയും പാര്ട്ടി പോപ്പറുകൾ പൊട്ടിച്ച് ആഘോഷിക്കുകയും ചെയ്യുന്നുണ്ട്. യുവാവ് തന്റെ ഇൻസ്റ്റാഗ്രാം അക്കൗണ്ടിൽ പോസ്റ്റ് ചെയ്യുകയും പിന്നീട് നീക്കം ചെയ്യുകയും ചെയ്ത വീഡിയോ പെട്ടെന്നുതന്നെ വൈറലാവുകയായിരുന്നു.
കേക്കുമുറിക്കലിന് പുറമേ മറ്റ് നിരവധി അപകടകരമായ സ്റ്റണ്ടുകളും ഇവിടെ നടന്നിരുന്നു. ഓടുന്ന കാറിന്റെ ജനലിലൂടെ പുറത്തേക്ക് ആഞ്ഞുനിൽക്കുന്ന യുവാക്കളെയും റോഡിൽ അപകടകരമായ രീതിയിൽ ബൈക്ക് ഓടിക്കുന്നവരെയും മറ്റ് വീഡിയോകളിൽ കാണാം. തിരക്കുള്ള പാതയിലെ ഇത്തരം പ്രവൃത്തികൾ ഇവരുടെ മാത്രമല്ല, മറ്റ് യാത്രക്കാരുടെയും ജീവന് വലിയ ഭീഷണിയാണ് ഉയർത്തിയത്.
വീഡിയോ വൈറലായതിന് പിന്നാലെ ബാബുഗഢ് പോലീസ് സംഭവത്തിൽ ഉൾപ്പെട്ട എട്ടുപേരെ അറസ്റ്റ് ചെയ്തു. ഹിന്ദു രക്ഷാ ദൾ ജില്ലാ പ്രസിഡന്റും അറസ്റ്റിലായവരിൽ ഉൾപ്പെടുന്നു. ആഘോഷങ്ങൾക്ക് ഉപയോഗിച്ച കാറും ബൈക്കും പോലീസ് കസ്റ്റഡിയിലെടുത്തു. ഒക്ടോബർ 29-നാണ് സംഭവം ശ്രദ്ധയിൽപ്പെട്ടതെന്നും തുടർന്ന് നടപടി സ്വീകരിക്കുകയായിരുന്നുവെന്നും ഹാപ്പൂർ സൂപ്രണ്ട് ഓഫ് പോലീസ് അറിയിച്ചു.
അറസ്റ്റിന് പിന്നാലെ, പ്രതികൾ സ്റ്റേഷനിൽ കൈകൂപ്പി നിൽക്കുന്നതിന്റെ വീഡിയോകളും പുറത്തുവന്നിട്ടുണ്ട്. വാഹനങ്ങളും ആയുധങ്ങളും ഉപയോഗിച്ച് പൊതുനിരത്തുകളിൽ നടത്തുന്ന ഇത്തരം അശ്രദ്ധമായ ആഘോഷങ്ങൾ വലിയ അപകടങ്ങൾക്ക് കാരണമാകുമെന്ന മുന്നറിയിപ്പാണ് ഈ സംഭവം നൽകുന്നത്.
