യുകെയിലെ ഗ്ലോസെസ്റ്റർഷെയറിൽ ചെറിയ വിമാനത്തിന് മുകളിൽ കയറി സാഹസിക യാത്ര നടത്തി 99 കാരിയായ വയോധിക ലോകത്തിലെ ഏറ്റവും പ്രായം കൂടിയ വിംഗ് വാക്കർ ആയി ചരിത്രം സൃഷ്ടിച്ചു. വിൽഷെയറിലെ ഡെവിസസ് എന്ന സ്ഥലത്തെ കെയർ ഹോമിൽ താമസിക്കുന്ന ഹെൽഗ ഡഫി, 97 കാരിയായ ബെറ്റി ബ്രോമേജ് വിംഗ് വാക്ക് പൂർത്തിയാക്കിയത് വാർത്തകളിൽ കണ്ടതിന് ശേഷമാണ് ഈ സാഹസികത ഏറ്റെടുക്കാൻ തീരുമാനിച്ചത്.
ബിബിസി റിപ്പോർട്ട് ചെയ്തതനുസരിച്ച്, സിറൻസെസ്റ്ററിലെ ആർഎഫ്സി റെൻഡ്കോംബ് എയർഫീൽഡിൽ വെച്ചാണ് ഹെൽഗ ചെറിയ വിമാനത്തിന് മുകളിൽ സുരക്ഷാ ബെൽറ്റുകൾ ധരിച്ച് യാത്ര ചെയ്തത്. ഭയത്തിന് പകരം തനിക്ക് വലിയ ആവേശമാണ് തോന്നിയതെന്ന് അവർ പറഞ്ഞു. വളരെ വ്യത്യസ്തമായ ഒരു അനുഭവമായിരുന്നു അതെന്നും വിചിത്രമായ ഒരു അനുഭൂതിയാണ് തനിക്ക് ലഭിച്ചതെന്നും ഹെൽഗ വ്യക്തമാക്കി. വർഷങ്ങളോളം സോമർസെറ്റിലെ ഫ്രോമിൽ താമസിച്ച ശേഷമാണ് അവർ ഡെവിസസിലേക്ക് താമസം മാറിയത്.
ഈ റെക്കോർഡ് നേട്ടത്തിലൂടെ വിൽഷെയർ ആൻഡ് ബാത്ത് എയർ ആംബുലൻസിനായി പണം സമാഹരിക്കാനും ഹെൽഗയ്ക്ക് കഴിഞ്ഞു. ചാരിറ്റിക്കായി അവർ 1,300 പൗണ്ടിലധികം തുക ശേഖരിച്ചു. ഏഴു മക്കളിൽ മൂത്തവളായിരുന്നു ഹെൽഗ. തന്റെ ഈ നേട്ടത്തെക്കുറിച്ച് സംസാരിക്കവെ, ഈ സാഹസികത ഏറ്റെടുക്കാനുള്ള തന്റെ തീരുമാനത്തിൽ അന്തരിച്ച പിതാവ് അഭിമാനിക്കുമായിരുന്നുവെന്ന് അവർ പറഞ്ഞു. “ഞങ്ങളിൽ നിന്ന് മികച്ചതാണ് അദ്ദേഹം പ്രതീക്ഷിച്ചിരുന്നത്. അതുകൊണ്ട് ഞാൻ എപ്പോഴും അതിനായി ശ്രമിച്ചു,” എന്ന് പറഞ്ഞ അവർ, തന്റെ പിതാവ് തന്റെ മൂത്ത മകളിൽ അഭിമാനിക്കുമെന്ന് പ്രതീക്ഷിക്കുന്നതായും കൂട്ടിച്ചേർത്തു.
ഗിന്നസ് വേൾഡ് റെക്കോർഡ് അധികൃതർ എയർഫീൽഡിൽ വെച്ച് ഹെൽഗയ്ക്ക് സർട്ടിഫിക്കറ്റ് നൽകി ആദരിച്ചു. അവരുടെ അനന്തിരവരായ ജാക്കി റോസ്, ജൂലി പ്രീ എന്നിവർ വിമാനയാത്ര കാണാൻ എത്തിയിരുന്നു. ഏറെക്കാലമായി വ്യത്യസ്തമായ എന്തെങ്കിലും ചെയ്യണമെന്ന് ആഗ്രഹിച്ചിരുന്ന സ്വതന്ത്രചിന്താഗതിക്കാരിയായ ഒരു വനിതയാണ് ഹെൽഗയെന്ന് അവർ വിശേഷിപ്പിച്ചു. തനിക്ക് 99 വയസ്സായെങ്കിലും തന്റെ സാഹസിക സ്വഭാവത്തിന് മാറ്റം വന്നിട്ടില്ലെന്ന് തെളിയിക്കുകയാണ് ഹെൽഗ ചെയ്തതെന്ന് ജാക്കി പറഞ്ഞു.
തങ്ങളുടെ അമ്മയുടെ അവസാന യാത്രയ്ക്ക് സഹായിച്ച വിൽഷെയർ ആൻഡ് ബാത്ത് എയർ ആംബുലൻസിനോടുള്ള സ്നേഹസൂചകമായി കൂടിയാണ് ഈ സാഹസികത എന്ന് കുടുംബം വ്യക്തമാക്കി. ചാരിറ്റിയെ പ്രതിനിധീകരിച്ച് എത്തിയ സാം കോൺവേ, ഹെൽഗയുടെ നേട്ടത്തെ പ്രശംസിക്കുകയും അവരെ ഒരു ‘ലെജൻഡ്’ എന്ന് വിശേഷിപ്പിക്കുകയും ചെയ്തു. ഈ അനുഭവം ഹെൽഗ പൂർണ്ണമായി ആസ്വദിച്ചതായും അവർ പറഞ്ഞു. ഹെൽഗയുടെ ഈ റെക്കോർഡ് നേട്ടം അവരുടെ സാഹസിക മനോഭാവത്തെ മാത്രമല്ല, കുടുംബത്തിന് ഏറെ പ്രിയപ്പെട്ട ഒരു കാര്യത്തെ പിന്തുണയ്ക്കാനുള്ള അവരുടെ നിശ്ചയദാർഢ്യത്തെ കൂടിയാണ് അടയാളപ്പെടുത്തുന്നത്.
