സാന്വിച്ചിന് പകരം ഒരു ദോശ റാപ്പ് കഴിച്ചാലോ? ബെംഗളൂരു എയർപോർട്ടിൽ നിന്നുള്ള ഒരു വീഡിയോ, പ്രശസ്തമായ ദോശയെ യാത്രക്കാർക്ക് എളുപ്പത്തിൽ കഴിക്കാൻ പറ്റുന്ന രീതിയിലുള്ള പുതിയ രൂപത്തിലേക്ക് മാറ്റിയിരിക്കുന്നതിൻ്റെ ദൃശ്യങ്ങൾ പങ്കുവെച്ചിരിക്കുന്നു. ‘ദി രാമേശ്വരം കഫേ’യിലാണ് ഈ പുതിയ പരീക്ഷണം നടന്നിരിക്കുന്നത്.
ബെംഗളൂരു എയർപോർട്ടിലെ രാമേശ്വരം കഫേ അടുക്കളയിൽ തയ്യാറാക്കുന്ന ഈ ദോശ ഒരു റാപ്പ് പോലെയാണ് മാറ്റിയെടുക്കുന്നത്. പരമ്പരാഗത ദോശയുടെ രുചി ചോരാതെ, അതിൽ ഉരുളക്കിഴങ്ങ് മസാലയും ചമ്മന്തിയും നിറച്ച് യാത്രക്കാർക്ക് എളുപ്പത്തിൽ കഴിക്കാൻ പാകത്തിലാണ് ഇത് തയ്യാറാക്കിയിരിക്കുന്നത്.
ആവശ്യമായ ചേരുവകൾ വെച്ച ശേഷം, ദോശ ഒരു റാപ്പ് പോലെ ശ്രദ്ധാപൂർവ്വം ചുരുട്ടി വാഴയിലയിലും ഫോയിൽ പേപ്പറിലും പൊതിഞ്ഞാണ് നൽകുന്നത്. പ്ലേറ്റോ സ്പൂണോ ആവശ്യമില്ലാതെ, യാത്രക്കാർക്ക് എവിടെയിരുന്നും ദോശ വളരെ വൃത്തിയായി കഴിക്കാൻ ഇത് സഹായിക്കുന്നു. തിരക്കിനിടയിൽ ഫ്ലൈറ്റ് പിടിക്കാൻ ഓടുന്നവർക്ക് പരമ്പരാഗത ദോശ എളുപ്പത്തിൽ കഴിക്കാൻ കഴിയുന്ന മികച്ചൊരു ആശയമാണിത്. ഫ്ലൈറ്റിൽ കയറുന്നതിന് മുൻപുള്ള പ്രഭാതഭക്ഷണത്തിനോ യാത്രയ്ക്കിടയിലെ ലഘുഭക്ഷണത്തിനോ എയർപോർട്ടുകളിൽ ലഭിക്കുന്ന സാധാരണ സാൻവിച്ചുകൾക്കും മറ്റ് പായ്ക്ക് ചെയ്ത ഭക്ഷണങ്ങൾക്കും നല്ലൊരു പകരക്കാരനാണ് ഈ ദോശ റാപ്പ്.
ഈ ദോശ റാപ്പ് കഴിച്ചതിനെക്കുറിച്ചുള്ള തങ്ങളുടെ അനുഭവങ്ങൾ നിരവധി സോഷ്യൽ മീഡിയ ഉപയോക്താക്കൾ കമൻ്റ് ബോക്സിൽ പങ്കുവെച്ചിട്ടുണ്ട്. “ഇത് വളരെ സൗകര്യപ്രദവും സ്വാദിഷ്ടവുമാണ്” എന്ന് ഒരു ഉപയോക്താവ് പറഞ്ഞു. മറ്റൊരാൾ ഇതൊരു “നല്ല ആശയമാണ്” എന്ന് വിശേഷിപ്പിച്ചു. “കാണാൻ വളരെ ടേസ്റ്റി ആയിട്ടുണ്ട്” എന്നായിരുന്നു മറ്റൊരാളുടെ അഭിപ്രായം. കൂടാതെ നിരവധി പേർ സ്മൈലി ഇമോജികളും ഹാർട്ട് ഇമോജികളും പങ്കുവെച്ചു.
രാമേശ്വരം കഫേയുടെ തനതായ ദക്ഷിണേന്ത്യൻ രുചികൾ
പാരമ്പരാഗതമായ രുചികൾ നഷ്ടപ്പെടുത്താതെ, ആധുനിക ഭക്ഷണശീലങ്ങൾക്ക് അനുസരിച്ച് ഇന്ത്യൻ ഭക്ഷണങ്ങളെ എങ്ങനെ മാറ്റിയെടുക്കാം എന്നതിൻ്റെ ഉദാഹരണമാണ് ഈ ദോശ റാപ്പ്. തനതായ ദക്ഷിണേന്ത്യൻ വിഭവങ്ങളിലൂടെ വലിയൊരു ആരാധകവൃന്ദത്തെ സ്വന്തമാക്കിയ സ്ഥാപനമാണ് രാമേശ്വരം കഫേ.
ദോശയും ഇഡ്ഡലിയും മുതൽ അവരുടെ പ്രശസ്തമായ നെയ്യ് പൊടി വിഭവങ്ങൾ വരെ, ദക്ഷിണേന്ത്യൻ തനിമയാർന്ന രുചികൾ വിളമ്പുന്നതിൽ ഈ റെസ്റ്റോറൻ്റ് ഏറെ ശ്രദ്ധിക്കപ്പെട്ടിട്ടുണ്ട്. ബെംഗളൂരുവിൻ്റെ ഭക്ഷണരുചികൾ ആസ്വദിക്കാൻ എത്തുന്ന സഞ്ചാരികൾക്കിടയിലും ഈ കഫേ വളരെ ജനപ്രിയമാണ്.
