പതിവായി ഡോക്ടറെ കണ്ട് പരിശോധനകൾ നടത്തുന്നതിനൊപ്പം വീട്ടിൽ വെച്ചുതന്നെ ആരോഗ്യസ്ഥിതി നിരീക്ഷിക്കുന്നത് ആരോഗ്യപ്രശ്നങ്ങൾ നേരത്തെ കണ്ടെത്താൻ സഹായിക്കും. കുട്ടികളും പ്രായമായവരുമുള്ള ഇന്ത്യൻ ഭവനങ്ങളിൽ അത്യാവശ്യ ഘട്ടങ്ങളിൽ ഉപയോഗപ്രദമാകുന്ന അഞ്ച് പ്രധാന മെഡിക്കൽ ഉപകരണങ്ങൾ വീട്ടിൽ കരുതിയിരിക്കേണ്ടത് വളരെ പ്രധാനമാണ്.
ഡിജിറ്റൽ തെർമോമീറ്റർ ആണ് ഇതിൽ ആദ്യത്തേത്. ശരീര താപനില പെട്ടെന്നും കൃത്യമായും അറിയാൻ ഇത് സഹായിക്കുന്നു. പഴയ മെർക്കുറി തെർമോമീറ്ററുകളെ അപേക്ഷിച്ച് ഇത് ഏറെ സുരക്ഷിതമാണ്. നെറ്റിയിൽ വെച്ച് ഉപയോഗിക്കുന്ന ഇൻഫ്രാറെഡ് തെർമോമീറ്ററുകൾ ഉറങ്ങുന്ന കുട്ടികളിൽ പോലും ബുദ്ധിമുട്ടില്ലാതെ ഉപയോഗിക്കാം.
ഉയർന്ന രക്തസമ്മർദ്ദം കൃത്യസമയത്ത് കണ്ടെത്താൻ ബ്ലഡ് പ്രഷർ മോണിറ്റർ അല്ലെങ്കിൽ ബി.പി. അപ്പാരറ്റസ് അത്യാവശ്യമാണ്. ക്ലിനിക്കുകളിൽ പോകാതെ തന്നെ വീട്ടിലിരുന്ന് ഹൃദയാരോഗ്യം കൃത്യമായി നിരീക്ഷിക്കാൻ ഇത് സഹായിക്കും. ശാന്തമായി ഇരുന്നുകൊണ്ട് ഹൃദയഭാഗത്തിന് നേരെ കഫ് വെച്ച വേണം ബി.പി. അളക്കാൻ.
വായു മലിനീകരണവും ശ്വാസകോശ സംബന്ധമായ പ്രശ്നങ്ങളും വർദ്ധിച്ചുവരുന്ന സാഹചര്യത്തിൽ നെബുലൈസർ വളരെ പ്രയോജനകരമാണ്. ദ്രാവകരൂപത്തിലുള്ള മരുന്നുകളെ നീരാവിയാക്കി ശ്വാസകോശത്തിലേക്ക് എത്തിക്കാൻ ഇത് സഹായിക്കുന്നു. ഉപയോഗശേഷം നെബുലൈസറിന്റെ മാസ്കും കപ്പും കഴുകി ഉണക്കാൻ പ്രത്യേകം ശ്രദ്ധിക്കണം.
ലോകത്തിന്റെ പ്രമേഹ തലസ്ഥാനമായി അറിയപ്പെടുന്ന ഇന്ത്യയിൽ ഗ്ലൂക്കോമീറ്റർ ഓരോ വീട്ടിലും ഉണ്ടായിരിക്കേണ്ട ഒന്നാണ്. പ്രമേഹമുള്ളവർക്കും പ്രീ-ഡയബറ്റിസ് ഉള്ളവർക്കും രക്തത്തിലെ പഞ്ചസാരയുടെ അളവ് കൃത്യമായി പരിശോധിക്കാനും നിയന്ത്രിക്കാനും ഇത് സഹായിക്കുന്നു. ഗ്ലൂക്കോമീറ്റർ പരിശോധനയ്ക്കായി ഉപയോഗിക്കുന്ന സ്ട്രിപ്പുകൾ കാലാവധി കഴിഞ്ഞവയാകരുത് എന്ന് പ്രത്യേകം ഓർക്കുക.
കോവിഡ് മഹാമാരിക്ക് ശേഷം വീടുകളിൽ പരിചിതമായ മറ്റൊരു ഉപകരണമാണ് പൾസ് ഓക്സിമീറ്റർ. രക്തത്തിലെ ഓക്സിജന്റെ അളവ് എത്രയെന്ന് കൃത്യമായി അറിയാൻ ഇത് സഹായിക്കുന്നു. വിരൽ ഈ ഉപകരണത്തിൽ വെച്ചാൽ പെട്ടെന്ന് തന്നെ ഫലം ലഭിക്കും. ശ്വാസകോശ സംബന്ധമായ അസുഖങ്ങളുള്ളവർക്ക് ഓക്സിജൻ അളവ് കുറയുമ്പോൾ തന്നെ തിരിച്ചറിഞ്ഞ് ഡോക്ടറുടെ സഹായം തേടാൻ ഇത് ഉപകരിക്കും.
മെഡിക്കൽ ഉപകരണങ്ങൾ കേടുകൂടാതെ സൂക്ഷിക്കാൻ ചില കാര്യങ്ങൾ ശ്രദ്ധിക്കേണ്ടതുണ്ട്. ഗ്ലൂക്കോമീറ്റർ സ്ട്രിപ്പുകളുടെ കാലാവധി എപ്പോഴും പരിശോധിക്കുക. ദീർഘകാലത്തേക്ക് ഉപയോഗിക്കാതിരിക്കുകയാണെങ്കിൽ ബാറ്ററികൾ ഊരിമാറ്റണം. വർഷത്തിലൊരിക്കൽ നിങ്ങളുടെ ബി.പി. മോണിറ്റർ ഡോക്ടറുടെ ക്ലിനിക്കിലെ മെഷീനുമായി ഒത്തുനോക്കി കൃത്യത ഉറപ്പുവരുത്തുകയും വേണം.
