പഞ്ചാബിലെ വോട്ടർ പട്ടികയിൽ സ്വാതന്ത്ര്യസമര സേനാനി ഭഗത് സിങ്ങിന്റെ ചിത്രം ഉൾപ്പെട്ട സംഭവം വലിയ രാഷ്ട്രീയ വിവാദത്തില്‍. എന്നാൽ ഈ പിഴവ് നേരത്തെ തന്നെ കണ്ടെത്തുകയും തിരുത്തുകയും ചെയ്തിട്ടുണ്ടെന്ന് ജില്ലാ ഭരണകൂടം വ്യക്തമാക്കി.
ലുധിയാന ഈസ്റ്റ് നിയമസഭാ മണ്ഡലത്തിലെ വോട്ടർ പട്ടികയിലെ പാർട്ട് 38-ൽ, സീരിയൽ നമ്പർ 422-ലെ വോട്ടറുടെ പേരിന് നേരെ ഭഗത് സിങ്ങിന്റേതിന് സമാനമായ ചിത്രം കണ്ടെത്തിയതിനെ തുടർന്നാണ് കോൺഗ്രസ് നേതാവ് അമരിന്ദർ സിങ് രാജാ വോറിങ് ഈ വിഷയം പുറത്തുകൊണ്ടുവന്നത്. സംഭവത്തിൽ കടുത്ത അമർഷം രേഖപ്പെടുത്തിയ അദ്ദേഹം, ഇനി ഇതുമാത്രമേ കാണാൻ ബാക്കിയുണ്ടായിരുന്നുള്ളൂ എന്ന് സോഷ്യൽ മീഡിയയിൽ കുറിച്ചു.
എന്നാൽ ഈ അവകാശവാദം തെറ്റിദ്ധരിപ്പിക്കുന്നതാണെന്ന് ലുധിയാന ജില്ലാ ഇലക്ടറൽ ഓഫീസർ വ്യക്തമാക്കി. മുൻപത്തെ വോട്ടർ പട്ടികയിൽ വന്ന തെറ്റായ ചിത്രമാണ് ഓഗസ്റ്റ് 13, 2026-ൽ പ്രസിദ്ധീകരിച്ച കരട് പട്ടികയിലും കടന്നുകൂടിയതെന്ന് അദ്ദേഹം വിശദീകരിച്ചു. സ്പെഷ്യൽ ഇന്റൻസീവ് റിവിഷൻ (SIR) പരിശോധനയ്ക്കിടെ തന്നെ ഈ പിഴവ് കണ്ടെത്തുകയും തിരുത്തുകയും ചെയ്തിട്ടുണ്ട്. ശരിയായ ചിത്രത്തോടു കൂടിയ അന്തിമ വോട്ടർ പട്ടിക തയ്യാറായിക്കഴിഞ്ഞുവെന്നും അത് ഒക്ടോബർ 12-ന് പ്രസിദ്ധീകരിക്കുമെന്നും ഭരണകൂടം അറിയിച്ചു.
ഹരിയാനയിലെ വോട്ടർ പട്ടികയിൽ ക്രമക്കേടുകൾ നടന്നിട്ടുണ്ടെന്ന കോൺഗ്രസ് നേതാവ് രാഹുൽ ഗാന്ധിയുടെ ആരോപണങ്ങൾക്കും, പതിനായിരക്കണക്കിന് വോട്ടുകൾ വെട്ടിമാറ്റുന്നതുമായി ബന്ധപ്പെട്ട് പഞ്ചാബ് ബിജെപി നേതാവ് നടത്തിയെന്ന പറയപ്പെടുന്ന പരാമർശങ്ങൾക്കും പിന്നാലെ വോട്ടർ പട്ടിക വീണ്ടും വലിയ ചർച്ചയാകുന്നതിനിടയിലാണ് പുതിയ വിവാദവും ഉയർന്നുവന്നിരിക്കുന്നത്.
