ആനിമേഷൻ കഥാപാത്രങ്ങളെ അനുസ്മരിപ്പിക്കുന്ന വേറിട്ട ഹെയർസ്റ്റൈലിലൂടെ സോഷ്യൽ മീഡിയയിൽ തരംഗമായിരിക്കുകയാണ് ഒരു ഹോണ്ട എഞ്ചിനീയർ. ഹോണ്ടയുടെ ഗവേഷണ വിഭാഗത്തിലെ മുതിർന്ന എഞ്ചിനീയറായ ഷോട്ടാരോ ഒഡാറ്റെയുടെ ചിത്രങ്ങളും വീഡിയോകളുമാണ് ഇന്റർനെറ്റിൽ വൈറലാകുന്നത്. ജനപ്രിയ ആനിമേഷൻ പരമ്പരകളായ ഡ്രാഗൺ ബോൾ, നരുട്ടോ, ഫൈനൽ ഫാന്റസി എന്നിവയിലെ ‘സൂപ്പർ സയാൻ’, ‘ഗോകു’ തുടങ്ങിയ കഥാപാത്രങ്ങളുടെ ഹെയർസ്റ്റൈലിനോടാണ് ആളുകൾ ഇദ്ദേഹത്തിന്റെ ഹെയർസ്റ്റൈലിനെ ഉപമിക്കുന്നത്.
ഹോണ്ടയുടെ അഡ്വാൻസ്ഡ് ഡ്രൈവർ അസിസ്റ്റൻസ് ടെക്നോളജിയെക്കുറിച്ച് (ADAS) വിശദീകരിക്കുന്ന ഔദ്യോഗിക വീഡിയോയിലാണ് ഒഡാറ്റെ ഈ ലുക്കിൽ പ്രത്യക്ഷപ്പെട്ടത്. കൂർത്തതും മുകളിലേക്ക് നിൽക്കുന്നതുമായ ഹെയർസ്റ്റൈലില്‍ അല്പം പോലും മടിയില്ലാതെ സാങ്കേതിക കാര്യങ്ങൾ വിശദീകരിക്കുന്ന അദ്ദേഹത്തിന്റെ ലുക്ക് ഇൻസ്റ്റാഗ്രാം, എക്സ് (X), ടിക് ടോക് തുടങ്ങിയ പ്ലാറ്റ്‌ഫോമുകളിൽ പെട്ടെന്ന് തന്നെ ശ്രദ്ധിക്കപ്പെട്ടു.
വാഹന സുരക്ഷയുമായി ബന്ധപ്പെട്ട് 250-ലധികം പേറ്റന്റുകൾ സ്വന്തമായുള്ള പ്രഗത്ഭനായ ഒരു എഞ്ചിനീയർ കൂടിയാണ് ഒഡാറ്റെ. സ്റ്റിയറിംഗ് സെൻസറുകൾ, ബ്രേക്കിംഗ് സാങ്കേതികവിദ്യ, ഇന്റലിജന്റ് സീറ്റ് ബെൽറ്റ് സിസ്റ്റം എന്നിവയിൽ ഇദ്ദേഹത്തിന്റെ ഗവേഷണങ്ങൾ നിർണ്ണായകമാണ്. ആനിമേഷൻ കഥാപാത്രം യഥാർത്ഥ ജീവിതത്തിലേക്ക് വന്നതുപോലെ ഉണ്ടെന്നാണ് വീഡിയോയ്ക്ക് താഴെ പലരും തമാശയായി കുറിക്കുന്നത്.
