ശിവഭക്തരായ ഹൈന്ദവരുടെ ഏറ്റവും പവിത്രമായ മാസങ്ങളിൽ ഒന്നാണ് ശ്രാവൺ അഥവാ സാവൻ മാസം. ജൂൺ 29-ന് ആരംഭിച്ച ഈ പുണ്യമാസം വളരെ ഭക്തിനിർഭരമായാണ് ആഘോഷിക്കപ്പെടുന്നത്. ഭക്തർ രണ്ടാമത്തെ ശ്രാവണ സോമവാരം ആചരിക്കുകയാണ്. ഈ അവസരത്തിൽ, ലോകത്തിലെ ഏറ്റവും വലിയ ശിവപ്രതിമയായ ‘വിശ്വാസ് സ്വരൂപം’ (സ്റ്റാച്യു ഓഫ് ബിലീഫ്) സ്ഥിതി ചെയ്യുന്ന രാജസ്ഥാനിലെ രാജ്സമന്ദ് ജില്ലയിലുള്ള നാഥദ്വാരയുടെ മനോഹരമായ ദൃശ്യങ്ങൾ രാജസ്ഥാൻ ടൂറിസം വകുപ്പ് പങ്കുവെച്ചു.
ശ്രാവണ സോമവാരത്തോടനുബന്ധിച്ച് സോഷ്യൽ മീഡിയയിലാണ് രാജസ്ഥാൻ ടൂറിസം ടീം ഈ വീഡിയോ പങ്കുവെച്ചത്. “ശ്രാവണ മാസം ആഴത്തിലുള്ള ഭക്തിയാണ് നൽകുന്നത്, നാഥദ്വാര ആ ആത്മീയ ചൈതന്യത്തിന്റെ മനോഹരമായ പ്രതിഫലനമായി മാറുന്നു. ആരവല്ലി പർവ്വതനിരകൾക്ക് മുന്നിൽ ഗാംഭീര്യത്തോടെ നിലകൊള്ളുന്ന ‘വിശ്വാസ് സ്വരൂപം’, അനുഗ്രഹം തേടാനും ഭക്തിയുമായി ബന്ധപ്പെടാനും സഞ്ചാരികളെ ക്ഷണിക്കുന്നു. ഈ ശ്രാവണ മാസത്തിൽ നിങ്ങളുടെ യാത്ര നാഥദ്വാരയിലേക്കാവട്ടെ” എന്ന് രാജസ്ഥാൻ ടൂറിസം കുറിച്ചു.
ലോകത്തിലെ ഏറ്റവും വലിയ ഇരുന്ന് ധ്യാനിക്കുന്ന ശിവപ്രതിമയാണ് നാഥദ്വാരയിലെ ‘വിശ്വാസ് സ്വരൂപം’. 369 അടി (112 മീറ്റർ) ഉയരമുള്ള ഈ ചെമ്പ് പ്രതിമ 2022 ഒക്ടോബർ 29-നാണ് ഉദ്ഘാടനം ചെയ്തത്. 20 കിലോമീറ്റർ അകലെ നിന്നുപോലും കാണാൻ കഴിയുന്നത്ര കൂറ്റനാണ് ഈ ശില്പം. ക്ഷേത്രങ്ങൾക്ക് പുറമെ സമ്പന്നമായ സാംസ്കാരിക പാരമ്പര്യത്തിനും ദേവോപസന കലകൾക്കും പേരുകേട്ട സ്ഥലമാണ് നാഥദ്വാര. തനത് കരകൗശല വസ്തുക്കളും പ്രസിദ്ധമായ പിച്ചവായ് ചിത്രകലയും കണ്ടറിയാൻ ധാരാളം സഞ്ചാരികളാണ് ഇവിടെ എത്തുന്നത്.
