ദിവസവും 100 പുഷ്-അപ്പുകളോ 100 സ്ക്വാട്ടുകളോ ചെയ്യുന്ന ബോഡിവെയ്റ്റ് ഫിറ്റ്നസ് ചലഞ്ചുകൾ ഇന്ന് ആളുകൾക്കിടയിൽ വളരെ ജനപ്രിയമാണ്. ഈ രണ്ട് വ്യായാമങ്ങളും ശരീരത്തിന് കരുത്ത് നൽകാൻ മികച്ചതാണെങ്കിലും, വയറിലെയും നടുവിലെയും പേശികളുടെ (Core) ബലത്തിന് ഇതിൽ ഏതാണ് കൂടുതൽ നല്ലതെന്ന സംശയം പലർക്കുമുണ്ട്. പ്ലാങ്ക് അല്ലെങ്കിൽ ക്രഞ്ചസ് പോലുള്ള വ്യായാമങ്ങൾ മാത്രമാണ് കോർ പേശികളെ സഹായിക്കുന്നതെന്നാണ് ഭൂരിഭാഗം ആളുകളും കരുതുന്നത്. എന്നാൽ പുഷ്-അപ്പുകളും സ്ക്വാട്ടുകളും ചെയ്യുമ്പോഴും നമ്മുടെ ശരീരത്തിന്റെ മധ്യഭാഗത്തെ പേശികൾ ശക്തമായി പ്രവർത്തിക്കുന്നുണ്ട്.
ശരീരത്തിന്റെ ബാലൻസ് നിലനിർത്താനും, നല്ല പോസ്ചറിനും, നടുവേദന ഒഴിവാക്കാനും കോർ പേശികളുടെ കരുത്ത് അത്യന്താപേക്ഷിതമാണ്. പുഷ്-അപ്പുകൾ പ്രധാനമായും നെഞ്ച്, തോൾ, കൈകൾ എന്നിവയ്ക്കുള്ള വ്യായാമമാണെങ്കിലും, ശരീരം വളയാതെ നേരെ നിർത്താൻ വയറിലെയും നടുവിലെയും പേശികൾ തുടർച്ചയായി പ്രവർത്തിക്കേണ്ടി വരുന്നു. അതുപോലെ സ്ക്വാട്ടുകൾ കാലുകൾക്കുള്ള വ്യായാമമാണെങ്കിലും, ശരീരം നിവർന്നു നിൽക്കാനും ബാലൻസ് കിട്ടാനും കോർ പേശികൾ സഹായിക്കുന്നു.
സാധാരണ ബോഡിവെയ്റ്റ് വ്യായാമങ്ങൾ മാത്രം താരതമ്യം ചെയ്യുമ്പോൾ, സ്ക്വാട്ടുകളേക്കാൾ കൂടുതൽ നേരിട്ട് കോർ പേശികളെ ഉത്തേജിപ്പിക്കുന്നത് പുഷ്-അപ്പുകളാണ്. കാരണം, പുഷ്-അപ്പ് ചെയ്യുമ്പോൾ ശരീരം മുഴുവൻ ഒരേപോലെ നേരെ നിർത്താൻ കോർ പേശികളിൽ തുടർച്ചയായ സമ്മർദ്ദം ഉണ്ടാകുന്നു. അതേസമയം, സ്ക്വാട്ടുകളിൽ കൂടുതൽ ഭാരവും കാലുകളിലെയും ഇടുപ്പിലെയും പേശികളാണ് താങ്ങുന്നത്. അതിനാൽ, ബോഡിവെയ്റ്റ് വ്യായാമത്തിലൂടെ മാത്രം കോർ പേശികൾക്ക് കരുത്ത് കൂട്ടാനാണ് ലക്ഷ്യമെങ്കിൽ 100 പുഷ്-അപ്പുകളാണ് കൂടുതൽ ഫലപ്രദം.
എന്നാൽ, എണ്ണത്തേക്കാൾ പ്രധാനം അത് ശരിയായ രീതിയിൽ ചെയ്യുക എന്നതാണ്. ശരിയല്ലാത്ത രീതിയിൽ 100 തവണ ചെയ്യുന്നത് തോൾ, കൈക്കുഴ, മുട്ട്, നടുവ് എന്നിവിടങ്ങളിൽ പരിക്കുകൾ ഉണ്ടാക്കാൻ ഇടയാക്കും. തുടക്കക്കാർ ഒരേസമയം 100 എണ്ണം ചെയ്യാൻ ശ്രമിക്കാതെ 10-15 എണ്ണം വീതം ഘട്ടംഘട്ടമായി എണ്ണം കൂട്ടുന്നതാണ് സുരക്ഷിതം. കൂടാതെ, പുഷ്-അപ്പുകളോ സ്ക്വാട്ടുകളോ മാത്രം ചെയ്യുന്നതിന് പകരം പ്ലാങ്ക്, സൈഡ് പ്ലാങ്ക് തുടങ്ങിയ വ്യായാമങ്ങളും, നല്ല ഭക്ഷണവും, ആവശ്യത്തിന് ഉറക്കവും ശീലമാക്കുന്നത് കോർ പേശികളുടെ ആരോഗ്യത്തിന് കൂടുതൽ മെച്ചം ചെയ്യും.
