സ്പൈഡർമാൻ വേഷത്തിലെത്തിയ ഒരു അമേരിക്കൻ യുവാവ്, തിരക്കേറിയ റോഡ് മുറിച്ചുകടക്കാൻ ബുദ്ധിമുട്ടിയ ഭിന്നശേഷിക്കാരനെ സഹായിച്ച് യഥാർത്ഥ ഹീറോ ആയിരിക്കുകയാണ്. ആർക്കൻസാസിൽ നിന്നുള്ള ഇരുപതുകാരനായ ക്രിസ്റ്റഫർ ഹെല്ലെന്താൽ ആണ് ഈ താരം.
ജോൺസ്ബെറോയിലെ ഒരു തിരക്കേറിയ ആറുവരിപ്പാതയിലൂടെ കാറിൽ സഞ്ചരിക്കുമ്പോഴാണ് വീൽചെയറിലിരുന്ന വ്യക്തി റോഡ് മുറിച്ചുകടക്കാൻ കഷ്ടപ്പെടുന്നത് ക്രിസ്റ്റഫർ കണ്ടത്. താൻ ജോലി ചെയ്യുന്ന ട്രാമ്പൊളിൻ പാർക്കിലെ ഒരു സൂപ്പർഹീറോ പ്രോഗ്രാമിന് ശേഷം സ്പൈഡർമാൻ വേഷത്തിൽ തന്നെയായിരുന്ന ക്രിസ്റ്റഫർ, ഒട്ടും സമയം കളയാതെ കാറിൽ നിന്നിറങ്ങി സഹായത്തിനെത്തുകയായിരുന്നു.
ട്രാഫിക് ക്യാമറ ദൃശ്യങ്ങളിൽ ട്രാഫിക് സിഗ്നലിൽ വാഹനങ്ങൾ നിർത്തിയിട്ടിരിക്കുമ്പോൾ വീൽചെയറിലുള്ളയാൾ പതിയെ റോഡ് ക്രോസ് ചെയ്യാൻ ശ്രമിക്കുന്നത് കാണാം. ഉടൻ തന്നെ അങ്ങോട്ടേക്ക് ഓടിയെത്തിയ ക്രിസ്റ്റഫർ, ട്രാഫിക് സിഗ്നൽ മാറും മുൻപ് അദ്ദേഹത്തിന്റെ വീൽചെയർ തള്ളി റോഡിന്റെ മറുഭാഗത്ത് സുരക്ഷിതമായി എത്തിക്കുകയായിരുന്നു.
“ഞാൻ സഹായിക്കാം” എന്ന് പറഞ്ഞുകൊണ്ടാണ് ക്രിസ്റ്റഫർ അദ്ദേഹത്തിന്റെ അടുക്കലേക്ക് ഓടിയെത്തിയത്. സിഗ്നൽ മാറി വാഹനങ്ങൾ എത്തുന്നതിന് മുൻപ് അദ്ദേഹത്തെ സുരക്ഷിതനാക്കുക മാത്രമായിരുന്നു തന്റെ മനസ്സിലുണ്ടായിരുന്നതെന്ന് ക്രിസ്റ്റഫർ പിന്നീട് പറഞ്ഞു.
ജോൺസ്ബെറോ പോലീസ് ഡിപ്പാർട്ട്മെന്റ് പങ്കുവെച്ച ഈ ദൃശ്യങ്ങൾ വളരെ പെട്ടെന്നാണ് സോഷ്യൽ മീഡിയയിൽ വൈറലായത്. ക്രിസ്റ്റഫറിന്റെ ഈ സന്ദോഷകരമായ പ്രവൃത്തിയെ പോലീസും പൊതുജനങ്ങളും ഒരുപോലെ പ്രശംസിച്ചു. ചെറുപ്പം മുതലേ സ്പൈഡർമാന്റെ വലിയ ആരാധകനായ താൻ, വേഷമില്ലെങ്കിലും അദ്ദേഹത്തെ സഹായിക്കുമായിരുന്നു എന്ന് ക്രിസ്റ്റഫർ വ്യക്തമാക്കി. ക്രിസ്റ്റഫറിന്റെ സഹപ്രവർത്തകർക്കും ഇതിൽ അത്ഭുതം തോന്നിയില്ല, കാരണം മറ്റുള്ളവരെ സഹായിക്കുന്ന സ്വഭാവക്കാരനാണ് അവൻ എന്നാണ് അവർ പറഞ്ഞത്.
വലിയ കഴിവുകളുള്ളവർ അത് ഉത്തരവാദിത്തത്തോടെ ഉപയോഗിക്കണം എന്ന സ്പൈഡർമാന്റെ പ്രശസ്തമായ ആശയത്തോട് ഉപമിച്ചാണ് ആളുകൾ ഈ സംഭവത്തെ കാണുന്നത്. വേഷം കൊണ്ടല്ല, സമയബന്ധിതമായ ഇടപെടൽ കൊണ്ടാണ് ക്രിസ്റ്റഫർ യഥാർത്ഥ ജീവിതത്തിലെ നായകനായി മാറിയത്.
