ഫിഫ ലോകകപ്പ് വിജയാഘോഷ ചിത്രങ്ങൾ സോഷ്യൽ മീഡിയയിൽ പങ്കുവെച്ചതിന് സ്പാനിഷ് യുവതാരം ലമീൻ യമാലിന്റെ കാമുകിയും ഇൻഫ്ലുവൻസറുമായ ഇനസ് ഗാർഷ്യ സാന്റോസിനെതിരെ കടുത്ത സൈബർ ആക്രമണം. ലോകകപ്പിന് തൊട്ടുമുമ്പ് പ്രണയത്തിലായ ഇരുവരും, ഫൈനലിൽ അർജന്റീനയെ സ്പെയിൻ തോൽപ്പിച്ച ശേഷം ഗ്രൗണ്ടിൽ വെച്ച് ലോകകപ്പ് ട്രോഫിയുമേന്തി ചിത്രങ്ങൾ പകർത്തിയിരുന്നു.
എന്നാൽ യമാൽ ഇനസിനെ ഒഴിവാക്കാൻ ശ്രമിച്ചുവെന്ന് ആരോപിച്ച് ഒരു വിഭാഗം ആളുകൾ രംഗത്തെത്തുകയായിരുന്നു. ഈ ബന്ധം അധികകാലം മുന്നോട്ടുപോകില്ലെന്നും യമാലിന്റെ ജീവിതത്തിലെ വെറുമൊരു പെൺകുട്ടി മാത്രമായി ഇനസ് മാറുമെന്നും പലരും എക്സ് പ്ലാറ്റ്ഫോമിൽ കുറിച്ചു.
സൈബർ ആക്രമണം രൂക്ഷമായതോടെ ഇനസ് ശക്തമായ ഭാഷയിൽ തന്നെ പ്രതികരിച്ചു. തനിക്കെതിരെയുള്ള വിമർശനങ്ങൾ തന്നെ ഏറെ വേദനിപ്പിച്ചെന്നും വ്യക്തിപരമായി അധിക്ഷേപിക്കാനാണ് പലരും ശ്രമിക്കുന്നതെന്നും ഇനസ് പറഞ്ഞു. ആരുടെയും ഒന്നും താൻ തട്ടിയെടുത്തിട്ടില്ലെന്നും വിമർശിക്കുന്നതിൽ തെറ്റില്ലെങ്കിലും അതിന് പരിധിയുണ്ടെന്നും അവർ ഓർമ്മിപ്പിച്ചു. താനും മറ്റുള്ളവരെപ്പോലെ സ്വന്തം ജീവിതം സന്തോഷത്തോടെ നയിക്കാൻ ആഗ്രഹിക്കുന്ന വ്യക്തിയാണെന്നും, ആളുകൾ വിദ്വേഷത്തിന് പകരം അൽപ്പം അനുകമ്പയും മനുഷ്യത്വവും കാണിക്കണമെന്നും ഇനസ് സോഷ്യൽ മീഡിയയിൽ കുറിച്ചു.
ഈ വർഷം ബാർസിലോന ക്ലബ്ബിന്റെ വിരുന്നിൽ ഇരുവരും ഒന്നിച്ചെത്തിയതോടെയാണ് പ്രണയം പരസ്യമായത്. ടിക് ടോക്കിലും ഇൻസ്റ്റഗ്രാമിലുമായി ദശലക്ഷത്തിലധികം ഫോളോവേഴ്സുള്ള ഫാഷൻ ഇൻഫ്ലുവൻസറാണ് ഇനസ്. ലോകകപ്പ് സെമിയിലും ഫൈനലിലും സ്പെയിനെ പിന്തുണയ്ക്കാൻ ഇനസ് ഗാലറിയിലുണ്ടായിരുന്നു. നേരത്തെ അർജന്റീനിയൻ ഗായിക നിക്കി നിക്കോളയുമായുള്ള ബന്ധം പിരിഞ്ഞ ശേഷമാണ് യമാൽ ഇനസുമായി അടുപ്പത്തിലാകുന്നത്. 2023-ൽ ബാർസിലോനയിലൂടെ അരങ്ങേറിയ ലമീൻ യമാൽ നിലവിൽ സ്പാനിഷ് ടീമിലെയും ബാഴ്സയിലെയും നിർണായക താരമാണ്.
