മലയാള സിനിമയിലെ പ്രമുഖ നടനും ഭാര്യയും ചേർന്ന് തനിക്കെതിരെ പെയ്ഡ് പിആർ വർക്ക് നടത്തുന്നുവെന്ന് നടൻ ജോജു ജോർജ് ആരോപിച്ചത് വലിയ വിവാദമായിരുന്നു. തന്റെ ഇൻസ്റ്റഗ്രാം ലൈവിലൂടെ പ്രതികരിച്ച ജോജു, ഇരുവരെയും കൂടാതെ ഇൻഡസ്ട്രിയിലെ മറ്റു പല പ്രമുഖ താരങ്ങളും ഇത്തരം പ്രവർത്തനങ്ങൾ നടത്തുന്നുണ്ടെന്നും വ്യക്തമാക്കിയിരുന്നു. ഇതോടെ ആ താരദമ്പതികൾ ആരാണെന്നതിനെക്കുറിച്ചുള്ള ചർച്ചകൾ സോഷ്യൽ മീഡിയയിൽ തകൃതിയായി നടക്കുകയാണ്.
ഇതിനിടെ ഈ ദമ്പതികളെക്കുറിച്ച് സൂചന നൽകിക്കൊണ്ട് വ്ലോഗർ ലക്ഷ്മി മേനോൻ രംഗത്തെത്തി. ജോജുവിന്റെ ചിത്രത്തോടൊപ്പം, “ഇത് ആ പെൺകോന്തനായ ഭർത്താവിന്റെയും അവളുടെയും സ്ഥിരം കലാപരിപാടിയല്ലേ, നമ്മൾ അതിനും മുകളിലാണ് ചേട്ടാ” എന്ന് ലക്ഷ്മി ഇൻസ്റ്റഗ്രാമിൽ കുറിച്ചെങ്കിലും പിന്നീട് ഈ സ്റ്റോറി പിൻവലിക്കുകയുണ്ടായി.
തന്റെ പുതിയ ചിത്രമായ ‘വരവ്’ തിയേറ്ററുകളിൽ പ്രദർശനം തുടരുന്നതിനിടെ അതിനെതിരെ നടക്കുന്ന ആസൂത്രിത നെഗറ്റീവ് ക്യാമ്പെയ്നുകളെക്കുറിച്ച് സംസാരിക്കാനാണ് ജോജു ലൈവിൽ എത്തിയത്. ഷാജി കൈലാസ് സംവിധാനം ചെയ്ത ഈ ചിത്രത്തിൽ അർജുൻ അശോകൻ, മുരളി ഗോപി, ബാബുരാജ്, സാനിയ ഇയ്യപ്പൻ, ദീപക് പറമ്പോൽ എന്നിവരും പ്രധാന വേഷങ്ങളിലുണ്ട്.
