നാല്പത് വയസ്സിന് ശേഷം ദിവസേനയുള്ള നടത്തം ഒഴിവാക്കുന്നത് ശരീരത്തിന്റെ ഉപാപചയ പ്രവർത്തനങ്ങളെയും ഹൃദയാരോഗ്യത്തെയും സാരമായി ബാധിക്കുമെന്ന് ഡോക്ടർമാർ മുന്നറിയിപ്പ് നൽകുന്നു. പ്രായമാകുമ്പോൾ ശരീരം സ്വാഭാവികമായും മാറ്റങ്ങൾക്ക് വിധേയമാകാറുണ്ട്. ഈ പ്രായത്തിൽ വ്യായാമം കുറയുമ്പോൾ ശരീരത്തിൽ പഞ്ചസാരയുടെയും കൊഴുപ്പിന്റെയും അളവ് നിയന്ത്രിക്കാനുള്ള ശേഷി കുറയുകയും പേശികളുടെ പിണ്ഡം നഷ്ടപ്പെടുകയും ചെയ്യും. ഇത് ഉപാപചയ പ്രവർത്തനങ്ങളുടെ വേഗത വീണ്ടും കുറയ്ക്കാൻ കാരണമാകുന്നു.
ശരീര ചലനങ്ങൾ കുറയുമ്പോൾ പേശികൾ ഗ്ലൂക്കോസ് ഉപയോഗിക്കുന്നത് കുറയുകയും ഇൻസുലിൻ പ്രതിരോധം വർദ്ധിക്കുകയും ചെയ്യും. ഇത് രക്തത്തിലെ പഞ്ചസാരയുടെ അളവ് കൂട്ടുകയും ടൈപ്പ് 2 പ്രമേഹം, അമിതവണ്ണം, ഫാറ്റി ലിവർ, ഹൃദ്രോഗം എന്നിവയ്ക്കുള്ള സാധ്യത വർദ്ധിപ്പിക്കുകയും ചെയ്യുന്നു. നടത്തം പൂർണ്ണമായി ഒഴിവാക്കുന്നതോടെ അടിവയറ്റിൽ കൊഴുപ്പ് അടിഞ്ഞുകൂടാനുള്ള സാധ്യത വളരെ കൂടുതലാണ്. ഈ വയറിലെ കൊഴുപ്പാണ് പലപ്പോഴും രക്തസമ്മർദ്ദത്തിലേക്കും കൊളസ്ട്രോളിലേക്കും ഹൃദയസംബന്ധമായ മറ്റ് അസുഖങ്ങളിലേക്കും വഴിതെളിക്കുന്നത്.
ദിവസവും 30 മിനിറ്റ് വേഗത്തിൽ നടക്കുന്നത് ശരീരത്തിൽ ഇൻസുലിൻ്റെ പ്രവർത്തനം മെച്ചപ്പെടുത്താനും പേശികൾ കൃത്യമായി ഗ്ലൂക്കോസ് ആഗിരണം ചെയ്യാനും ഭാരം നിയന്ത്രിക്കാനും സഹായിക്കും. കൂടാതെ ഇത് മാനസിക സമ്മർദ്ദം കുറയ്ക്കുകയും ചെയ്യുന്നു. ഇന്ത്യയിലെ പ്രമേഹബാധിതരുടെ എണ്ണം ക്രമാതീതമായി ഉയരുന്നതിന് പ്രധാന കാരണം ഇത്തരം സജീവമല്ലാത്ത ജീവിതശൈലിയാണ്. ജനിതക കാരണങ്ങൾ ഉണ്ടെങ്കിലും ജീവിതശൈലിയിലെ മാറ്റങ്ങളിലൂടെ പ്രമേഹത്തെ വലിയൊരു പരിധി വരെ തടയാനാകും.
നടത്തത്തോടൊപ്പം നല്ല ഭക്ഷണരീതി, 7-8 മണിക്കൂർ ഉറക്കം, ആരോഗ്യകരമായ ശരീരഭാരം, മാനസിക സമ്മർദ്ദം കുറയ്ക്കൽ, ദീർഘനേരം ഒരേ ഇരുപ്പ് ഇരിക്കാതിരിക്കൽ എന്നിവയും ശീലമാക്കണം. നാല്പത് വയസ്സ് തികയുന്നത് ആരോഗ്യക്ഷയത്തിന്റെ തുടക്കമല്ല, മറിച്ച് ശരീരത്തിന് കൂടുതൽ ശ്രദ്ധ നൽകേണ്ട പ്രായമാണ്. അതുകൊണ്ട് തന്നെ ഈ പ്രായത്തിന് ശേഷം ദിവസേനയുള്ള നടത്തം ഒരു ശീലമല്ല, മറിച്ച് ആരോഗ്യം നിലനിർത്താനുള്ള ഒരു പ്രതിദിന ഔഷധമായി തന്നെ കാണണമെന്ന് വിദഗ്ധർ ഓർമ്മിപ്പിക്കുന്നു.
