മുംബൈയിലെ ഒരു വിചിത്രമായ വാടകത്തർക്കമാണ് ഇപ്പോൾ സോഷ്യൽ മീഡിയയിൽ വലിയ ചർച്ചയായിരിക്കുന്നത്. ആർട്ടിസ്റ്റും ഇൻഫ്ലുവൻസറുമായ വാഗ്മിത സിങ് പങ്കുവെച്ച ഒരു വീഡിയോയിലാണ് ഈ വിവരമുള്ളത്. തന്റെ കൂട്ടുകാരിക്ക് ഒരു ഫ്ലാറ്റ് വാടകയ്ക്ക് നൽകാതിരുന്നത് അവളുടെ ‘ന്യൂമറോളജി നമ്പർ’ (സംഖ്യാശാസ്ത്ര പ്രകാരമുള്ള നമ്പർ) ശരിയല്ലെന്ന് പറഞ്ഞാണെന്നാണ് വാഗ്മിത അവകാശപ്പെടുന്നത്. വീട് തിരഞ്ഞെടുക്കുന്നത് പോലുള്ള കാര്യങ്ങളിൽ വ്യക്തിപരമായ വിശ്വാസങ്ങളും അന്ധവിശ്വാസങ്ങളും സ്വാധീനം ചെലുത്താമോ എന്നതിനെച്ചൊല്ലി ഇന്റർനെറ്റിൽ വലിയ വാദപ്രതിവാദങ്ങളാണ് ഈ സംഭവം ഉണ്ടാക്കിയിരിക്കുന്നത്.
വീട് കാണാൻ ചെന്നപ്പോഴാണ് കൂട്ടുകാരിയോട് ഉടമസ്ഥ ന്യൂമറോളജി നമ്പർ ചോദിച്ചതെന്ന് വീഡിയോയിൽ പറയുന്നു. മുംബൈയിൽ വാടകയ്ക്ക് എടുക്കാനുള്ള ഒരു അപ്പാർട്ട്മെന്റ് കാണാനാണ് കൂട്ടുകാരി പോയത്. നല്ല വിദ്യാഭ്യാസമുള്ള, മാന്യമായി പെരുമാറുന്ന ഒരു സ്ത്രീയായിരുന്നു ആ വീട്ടുടമസ്ഥ. അതുകൊണ്ട് തന്നെ അവർ പറഞ്ഞ കാരണം കേട്ട് കൂട്ടുകാരി കൂടുതൽ അത്ഭുതപ്പെട്ടുപോയി.
സംസാരിച്ചു തുടങ്ങിയപ്പോൾ തന്നെ “നിങ്ങളുടെ നമ്പർ ഏതാണ്?” എന്നാണ് വീട്ടുടമസ്ഥ ചോദിച്ചത്. ഫോൺ നമ്പറായിരിക്കും ചോദിച്ചതെന്നാണ് കൂട്ടുകാരി ആദ്യം കരുതിയത്. എന്നാൽ ഒരാളുടെ ജനനത്തീയതി വെച്ച് കണക്കാക്കുന്ന ന്യൂമറോളജി നമ്പറാണ് തനിക്ക് അറിയേണ്ടതെന്ന് ആ സ്ത്രീ വ്യക്തമാക്കി.
നമ്പറുകൾ ഒത്തുനോക്കിയ ശേഷം തന്റെ വീട് നാലാം നമ്പറുമായാണ് ബന്ധപ്പെട്ടിരിക്കുന്നതെന്നും എന്നാൽ കൂട്ടുകാരിയുടെ ന്യൂമറോളജി നമ്പർ ഏഴാണെന്നും അവർ പറഞ്ഞു. ഈ രണ്ട് നമ്പറുകൾ തമ്മിൽ ചേരില്ലെന്നും അത് ദോഷം ചെയ്യുമെന്നും വിശ്വസിച്ച വീട്ടുടമസ്ഥ ഫ്ലാറ്റ് വാടകയ്ക്ക് നൽകാൻ കഴിയില്ലെന്ന് അറിയിക്കുകയായിരുന്നു.
ഈ സംഭവത്തിൽ വലിയ ആശ്ചര്യവും ആശയക്കുഴപ്പവും പ്രകടിപ്പിച്ചുകൊണ്ടാണ് ഇൻഫ്ലുവൻസറായ വാഗ്മിത പ്രതികരിച്ചത്. ഒരു വാടകക്കാരിയെ ഒഴിവാക്കാൻ ഇങ്ങനെയൊരു കാരണം പറഞ്ഞതിനെ എങ്ങനെ വിശേഷിപ്പിക്കണമെന്ന് അറിയില്ലെന്ന് പറഞ്ഞ അവർ, തമാശരൂപേണ ഇതിനെ ഒരു തരം മാനസികാവസ്ഥയോടാണ് ഉപമിച്ചത്. ഈ വീഡിയോ പെട്ടെന്ന് തന്നെ ആളുകൾക്കിടയിൽ പടരുകയും, ന്യൂമറോളജിയെക്കുറിച്ചും മുംബൈയിൽ വീട് കിട്ടാനുള്ള ബുദ്ധിമുട്ടുകളെക്കുറിച്ചും പലരും തങ്ങളുടെ അഭിപ്രായങ്ങൾ പങ്കുവെക്കുകയും ചെയ്തു.
നാലും ഏഴും നമ്പറുകൾ തമ്മിലുള്ള പൊരുത്തത്തെച്ചൊല്ലി ഇന്റർനെറ്റിൽ പല അഭിപ്രായങ്ങളാണ് ഉയർന്നുവന്നത്. ചിലർ ഈ തീരുമാനത്തെ തമാശയായി കണ്ടപ്പോൾ, മറ്റ് ചിലർ സംഖ്യാശാസ്ത്ര പ്രകാരം നാലും ഏഴും മികച്ച ഒരു കൂട്ടുകെട്ടാണെന്ന് വാദിച്ചു.
