ഹൃദയാരോഗ്യം വിലയിരുത്തുന്നതിനായി ലോകമെമ്പാടുമുള്ള ദശലക്ഷക്കണക്കിന് ആളുകളാണ് ഓരോ വർഷവും കൊളസ്ട്രോൾ പരിശോധന നടത്തുന്നത്. ഈ പരിശോധനകളിൽ ഭൂരിഭാഗവും അളക്കുന്നത് ‘മോശം കൊളസ്ട്രോൾ’ എന്ന് വിളിക്കപ്പെടുന്ന എൽ.ഡി.എൽ (LDL) കൊളസ്ട്രോളിന്റെ അളവാണ്. ഹൃദ്രോഗ സാധ്യത മനസ്സിലാക്കുന്നതിനും രോഗികൾക്ക് സ്റ്റാറ്റിൻ പോലുള്ള മരുന്നുകൾ നൽകണോ എന്ന് തീരുമാനിക്കുന്നതിനും പതിറ്റാണ്ടുകളായി ഡോക്ടർമാർ ആശ്രയിക്കുന്നത് ഈ എൽ.ഡി.എൽ പരിശോധനയെയാണ്. ഈ പരിശോധന അനേകം ഹൃദയാഘാതങ്ങളും പക്ഷാഘാതങ്ങളും തടയാൻ സഹായിച്ചിട്ടുണ്ടെങ്കിലും, പുതിയൊരു പഠനം പറയുന്നത് ഇത് മാത്രം മതിയേക്കില്ല എന്നാണ്.
പ്രശസ്തമായ ജാമാ (JAMA) ജേണലിൽ പ്രസിദ്ധീകരിച്ച സമീപകാല പഠനമനുസരിച്ച്, ‘അപ്പോലിപോപ്രോട്ടീൻ ബി’ (apoB) എന്നറിയപ്പെടുന്ന മറ്റൊരു രക്തപരിശോധനയിലൂടെ ഹൃദയാഘാതവും പക്ഷാഘാതവും വരാൻ സാധ്യതയുള്ളവരെ കൂടുതൽ കൃത്യമായി കണ്ടെത്താൻ കഴിഞ്ഞേക്കും. എൽ.ഡി.എൽ പരിശോധന കൊളസ്ട്രോളിന്റെ ആകെ അളവ് മാത്രം നോക്കുമ്പോൾ, ‘അപ്പോബി’ പരിശോധന രക്തത്തിലുള്ള ഹാനികരമായ കൊളസ്ട്രോൾ കണികകളുടെ (Particles) കൃത്യമായ എണ്ണമാണ് അളക്കുന്നത്. അതായത്, സാധാരണ കൊളസ്ട്രോൾ പരിശോധനയിൽ എൽ.ഡി.എൽ അളവ് സാധാരണ നിലയിലാണെന്ന് കാണിക്കുന്ന ചിലരിൽ പോലും, ഹൃദ്രോഗത്തിന് കാരണമാകുന്ന അപകടകരമായ ഇത്തരം കണികകളുടെ എണ്ണം വളരെ കൂടുതലായിരിക്കാം. അതുകൊണ്ടുതന്നെ പല സാഹചര്യങ്ങളിലും ‘അപ്പോബി’ പരിശോധനയാണ് കൂടുതൽ കൃത്യമായ ഫലം നൽകുന്നത്.
ഒരു സാധാരണ കൊളസ്ട്രോൾ പരിശോധനയിൽ ടോട്ടൽ കൊളസ്ട്രോൾ, എൽ.ഡി.എൽ കൊളസ്ട്രോൾ, നല്ല കൊളസ്ട്രോളായ എച്ച്.ഡി.എൽ (HDL), ട്രൈഗ്ലിസറൈഡുകൾ എന്നിവയാണ് അളക്കുന്നത്. ഇതിൽ എൽ.ഡി.എൽ കൊളസ്ട്രോൾ കൂടുന്നത് ധമനികളിൽ കൊഴുപ്പ് അടിഞ്ഞുകൂടാൻ കാരണമാകും. കാലക്രമേണ ഇത് രക്തക്കുഴലുകളെ ഇടുങ്ങിയതാക്കുകയും ഹൃദയാഘാത സാധ്യത വർദ്ധിപ്പിക്കുകയും ചെയ്യും. എന്നാൽ കൊളസ്ട്രോൾ ശരീരത്തിലുടനീളം സഞ്ചരിക്കുന്നത് ചെറിയ കണികകൾക്കുള്ളിലാണ്. ഒരേ അളവിൽ എൽ.ഡി.എൽ കൊളസ്ട്രോൾ ഉള്ള രണ്ട് വ്യക്തികളിൽ ഈ കണികകളുടെ എണ്ണം വ്യത്യസ്തമായിരിക്കാം. ഈ കണികകളോരോന്നും ധമനികളിൽ കൊഴുപ്പ് അടിയാൻ കാരണമാകുന്നതിനാൽ കൊളസ്ട്രോളിന്റെ അളവ് മാത്രം നോക്കുന്നത് യഥാർത്ഥ അപകടസാധ്യത വെളിപ്പെടുത്തണമെന്നില്ല. കൊളസ്ട്രോൾ കുറയ്ക്കുന്നതിനുള്ള മരുന്നുകളുടെ അളവ് നിശ്ചയിക്കാൻ ‘അപ്പോബി’ പരിശോധന ഉപയോഗിക്കുന്നത് നിലവിലെ രീതികളേക്കാൾ കൂടുതൽ ഹൃദയാഘാതങ്ങളും പക്ഷാഘാതങ്ങളും തടയാൻ സഹായിക്കുമെന്ന് പഠനത്തിന് നേതൃത്വം നൽകിയ നോർത്ത് വെസ്റ്റേൺ യൂണിവേഴ്സിറ്റിയിലെ അസിസ്റ്റന്റ് പ്രൊഫസറായ സിയാരൻ കോഹ്ലി-ലിഞ്ച് പറയുന്നു.
അപകടകരമായ എല്ലാ കൊളസ്ട്രോൾ കണികകളിലും കാണപ്പെടുന്ന ഒരു പ്രോട്ടീനാണ് അപ്പോലിപോപ്രോട്ടീൻ ബി. ഇത്തരം ഓരോ കണികയിലും ഒരു ‘അപ്പോബി’ തന്മാത്ര വീതം അടങ്ങിയിരിക്കുന്നതിനാൽ, രക്തത്തിൽ എത്രത്തോളം അപകടകരമായ കണികകളുണ്ടെന്ന് കൃത്യമായി എണ്ണാൻ ഈ പരിശോധനയിലൂടെ സാധിക്കും. കൊളസ്ട്രോളിന്റെ അളവിന് പകരം ഈ കണികകളുടെ എണ്ണം അറിയുന്നത് ഒരു വ്യക്തിയുടെ ഹൃദ്രോഗ സാധ്യതയുടെ വ്യക്തമായ ചിത്രം നൽകുമെന്നാണ് വിദഗ്ദ്ധർ കരുതുന്നത്. പ്രത്യേകിച്ച് പ്രമേഹം, അമിതവണ്ണം, മെറ്റബോളിക് സിൻഡ്രോം, ഉയർന്ന ട്രൈഗ്ലിസറൈഡ് എന്നിവയുള്ളവരിൽ എൽ.ഡി.എൽ കൊളസ്ട്രോൾ സാധാരണ നിലയിലാണെങ്കിൽ പോലും ഹാനികരമായ കണികകളുടെ എണ്ണം കൂടുതലായിരിക്കാം. ഇത്തരം സാഹചര്യങ്ങളിൽ സാധാരണ പരിശോധനകളിൽ മറഞ്ഞിരിക്കുന്ന അപകടസാധ്യതകൾ കണ്ടെത്താൻ ‘അപ്പോബി’ ടെസ്റ്റിന് കഴിയും.
കംപ്യൂട്ടർ മോഡലിംഗിന്റെ സഹായത്തോടെ ഗവേഷകർ നടത്തിയ പഠനത്തിൽ, സ്റ്റാറ്റിൻ മരുന്നുകൾ കഴിക്കാൻ യോഗ്യരായ മുതിർന്നവരിൽ ചികിത്സ നിശ്ചയിക്കാൻ എൽ.ഡി.എൽ പരിശോധനയേക്കാൾ ‘അപ്പോബി’ നിലവാരം ഉപയോഗിക്കുന്നതാണ് കൂടുതൽ ഫലപ്രദമെന്ന് കണ്ടെത്തി. ഇത് ഡോക്ടർമാരെ കൃത്യമായ സമയത്ത് ശക്തമായ മരുന്നുകൾ നൽകാൻ സഹായിക്കുകയും അതുവഴി ആയിരക്കണക്കിന് ഹൃദ്രോഗ സംഭവങ്ങൾ തടയാൻ സാധിക്കുകയും ചെയ്യും. എന്നാൽ നിലവിലുള്ള കൊളസ്ട്രോൾ പരിശോധനകൾ പൂർണ്ണമായും പ്രയോജനരഹിതമാണെന്ന് ഈ പഠനം പറയുന്നില്ല.
വിലക്കുറവും എളുപ്പത്തിൽ ലഭ്യമാണെന്നതു കൊണ്ടും ഇപ്പോഴും പ്രാഥമിക പരിശോധനയായി ഡോക്ടർമാർ സാധാരണ ലിപിഡ് പ്രൊഫൈൽ തന്നെയാണ് ഉപയോഗിക്കുന്നത്. എന്നാൽ പ്രമേഹം, അമിതവണ്ണം, ഉയർന്ന ട്രൈഗ്ലിസറൈഡ് എന്നിവയുള്ളവർക്കും, കുടുംബത്തിൽ കടുത്ത ഹൃദ്രോഗ പാരമ്പര്യമുള്ളവർക്കും, മറ്റ് രോഗസാധ്യതകൾ ഉണ്ടായിട്ടും എൽ.ഡി.എൽ സാധാരണ നിലയിലായിരിക്കുന്നവർക്കും ‘അപ്പോബി’ പരിശോധന ഏറെ പ്രയോജനം ചെയ്യും. ചുരുക്കത്തിൽ, സാധാരണ കൊളസ്ട്രോൾ പരിശോധനയ്ക്ക് ഒരു പകരക്കാരനായല്ല, മറിച്ച് ഹൃദയാരോഗ്യം കൂടുതൽ കൃത്യമായി വിലയിരുത്താനുള്ള ഒരു അധിക സഹായമായാണ് ‘അപ്പോബി’ ടെസ്റ്റിനെ കാണേണ്ടത്.
