ന്യൂജേഴ്സിയിൽ പുതുതായി തുടങ്ങിയ ഒരു ഇന്ത്യൻ പലചരക്ക് കടയുടെ ഉദ്ഘാടനത്തോടനുബന്ധിച്ച് ഉണ്ടായ വൻ തിരക്കിന്റെ ദൃശ്യങ്ങൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്. ഉദ്ഘാടന ഓഫറിന്റെ ഭാഗമായി പച്ചക്കറികൾക്കും പഴങ്ങൾക്കും വൻ വിലക്കിഴിവ് പ്രഖ്യാപിച്ചതിനെ തുടർന്ന് സാധനങ്ങൾ വാങ്ങാൻ ആളുകൾ തള്ളിക്കയറുന്നതാണ് വീഡിയോയിലുള്ളത്. ഈ ദൃശ്യങ്ങൾ കണ്ട് ചിലർക്ക് പഴയകാലത്തെ ഓർമ്മകളാണ് ഉണ്ടായതെങ്കിൽ, മറ്റ് ചിലർ ഇത് തികച്ചും നാണംകെട്ട പെരുമാറ്റമാണെന്ന് വിമർശിച്ചു.
സോഷ്യൽ മീഡിയയിൽ വ്യാപകമായി പ്രചരിക്കുന്ന രണ്ട് മിനിറ്റോളം ദൈർഘ്യമുള്ള വീഡിയോയിൽ, ഉൾക്കൊള്ളാൻ കഴിയുന്നതിലും അധികം ആളുകൾ കടയ്ക്കുള്ളിൽ തടിച്ചുകൂടിയതായി കാണാം. പ്രായമായവർ ഉൾപ്പെടെയുള്ള നിരവധി ഉപഭോക്താക്കൾ ഇടുങ്ങിയ ഇടനാഴികളിലൂടെ കഷ്ടപ്പെട്ട് നീങ്ങിക്കൊണ്ട് പ്ലാസ്റ്റിക് കവറുകളിൽ പച്ചക്കറികൾ നിറയ്ക്കുകയാണ്. ഈ ദൃശ്യങ്ങൾ കണ്ട് അവിശ്വസനീയതയോടെ ആളുകൾ ദൈവമേ എന്ന് ആശ്ചര്യപ്പെടുന്നതും കേൾക്കാം.
പ്രവാസികളായ ഇന്ത്യക്കാരുടെ ജീവിതത്തിൽ ഇന്ത്യൻ പലചരക്ക് കടകൾക്ക് വലിയ സ്ഥാനമാണുള്ളത്. സ്വന്തം നാടുമായുള്ള ബന്ധം നിലനിർത്താൻ സഹായിക്കുന്ന പരിചിതമായ ചേരുവകളും ലഘുഭക്ഷണങ്ങളും സുഗന്ധവ്യഞ്ജനങ്ങളും പ്രാദേശിക ഉൽപ്പന്നങ്ങളുമെല്ലാം ഇത്തരം കടകളിലാണ് ലഭിക്കാറുള്ളത്. അതുകൊണ്ടുതന്നെ വലിയതോതിൽ ഇന്ത്യൻ ജനസംഖ്യയുള്ള പ്രദേശങ്ങളിൽ ഇത്തരം ഉദ്ഘാടന ഓഫറുകൾ വൻ ജനക്കൂട്ടത്തെ ആകർഷിക്കാറുണ്ട്. എന്നാൽ ഈ വീഡിയോ ഓൺലൈനിൽ വലിയ അഭിപ്രായവ്യത്യാസങ്ങൾക്കാണ് കാരണമായിരിക്കുന്നത്.
ചിലർക്ക് ഈ അന്തരീക്ഷം വർഷങ്ങൾക്ക് മുമ്പുള്ള ഇന്ത്യയിലെ തിരക്കേറിയ പച്ചക്കറി വിപണികളെ ഓർമ്മിപ്പിച്ചപ്പോൾ, ഈ താരതമ്യം ഇന്നത്തെ ഇന്ത്യയ്ക്ക് ചേർന്നതല്ലെന്ന് മറ്റ് ചിലർ വാദിച്ചു. സൂപ്പർമാർക്കറ്റുകളുടെയും ക്വിക്ക്-കൊമേഴ്സ് പ്ലാറ്റ്ഫോമുകളുടെയും വരവോടെ ഇന്ത്യയിലെ പലചരക്ക് ഷോപ്പിംഗ് രീതികൾ വളരെ കൂടുതൽ സൗകര്യപ്രദവും വ്യവസ്ഥാപിതവുമായി മാറിയെന്ന് പലരും ചൂണ്ടിക്കാണിച്ചു. ആളുകളുടെ ഈ പെരുമാറ്റത്തിനെതിരെ സോഷ്യൽ മീഡിയയിൽ വലിയ തോതിലുള്ള പ്രതികരണങ്ങളാണ് ഉണ്ടാകുന്നത്. തങ്ങൾ ഒരു ഇന്ത്യക്കാരനായതിൽ ലജ്ജിക്കുന്നുവെന്നും ലോകത്തിന് മുന്നിൽ നാണക്കേടുണ്ടാക്കുന്ന ഇത്തരം കാര്യങ്ങളിൽ താൻ പങ്കാളിയാവില്ലെന്നുമാണ് ഒരാൾ കുറിച്ചത്. എവിടെപ്പോയാലും ഇത്തരം പെരുമാറ്റങ്ങൾ ഉണ്ടാകാറുണ്ടെന്നും മല്ലിയില തീർന്നുപോയാലോ എന്ന ഭയമാണ് ഇവർക്കെന്നുമാണ് മറ്റൊരു പരിഹാസം നിറഞ്ഞ കമന്റ്.
ഇന്ത്യയുമായുള്ള താരതമ്യത്തെ എതിർത്തുകൊണ്ട് മറ്റൊരാൾ കുറിച്ചത് ഇങ്ങനെയാണ്: “ഞങ്ങളിപ്പോൾ Blinkit, Instamart, Zepto തുടങ്ങിയ ആപ്പുകൾ വഴിയാണ് പച്ചക്കറികൾ ഓർഡർ ചെയ്യുന്നത്. മെട്രോ നഗരങ്ങളിലെ സൂപ്പർമാർക്കറ്റുകളിൽ പോലും ഇത്രയും അരാജകത്വം ഉണ്ടാകാറില്ല. എൻ.ആർ.ഐകൾ (പ്രവാസി ഇന്ത്യക്കാർ) ചെയ്യുന്ന ഇത്തരം മോശം കാര്യങ്ങളെ എന്തിനാണ് എപ്പോഴും നാട്ടിലെ സാഹചര്യങ്ങളുമായി താരതമ്യം ചെയ്യുന്നത്? ഇന്ത്യയിലെ ഗ്രാമീണ വിപണികൾ പോലും ഇപ്പോൾ ഇതിനേക്കാൾ അച്ചടക്കമുള്ളതാണ്. ഇന്ത്യ ആ പഴയ കാലത്തുനിന്ന് ഒരുപാട് മുന്നോട്ട് പോയിക്കഴിഞ്ഞു.” ഈ അഭിപ്രായത്തെ പിന്തുണച്ചുകൊണ്ട് മറ്റൊരു വ്യക്തി എഴുതിയത്, ഇത് ഇരുപത് വർഷം മുമ്പ് നടന്നിരുന്ന കാര്യങ്ങളാണെന്നും ഇന്ത്യയിലെ ചെറിയ ടൗണുകളിൽ പോലും ഇപ്പോൾ ഇത്തരം കാഴ്ചകൾ ഇല്ലെന്നും, ഈ പ്രവാസികൾ ഇപ്പോഴും പഴയ ഇന്ത്യയിലാണ് ജീവിക്കുന്നതെന്നുമാണ്.
