ഒരു സ്കൂൾ കുട്ടിയും ഓട്ടോ ഡ്രൈവറും തമ്മിലുള്ള സ്നേഹപ്രകടനത്തിന്റെ വീഡിയോ സോഷ്യൽ മീഡിയയിൽ വൈറലായതോടെ നിരവധി പേരുടെ മനസ്സ് നിറച്ചിരിക്കുകയാണ്. നമ്മുടെ ദൈനംദിന ജീവിതത്തിലെ സാധാരണ യാത്രകൾ എങ്ങനെയാണ് പരസ്പര കരുണയുടെയും സ്നേഹത്തിന്റെയും നിമിഷങ്ങളായി മാറുന്നത് എന്ന് കാണിക്കുന്നതാണ് ഈ ചെറിയ വീഡിയോ.
എക്സ് (X) പ്ലാറ്റ്ഫോമിൽ പങ്കുവെക്കപ്പെട്ട വീഡിയോയിൽ, ഒരു ചെറിയ കുട്ടി തന്റെ അനിയത്തിയെ സ്കൂളിൽ കൊണ്ടാക്കാനായി ഓട്ടോറിക്ഷയിൽ യാത്ര ചെയ്യുന്നത് കാണാം. അനിയത്തിയുടെ അതേ സ്കൂളിൽ പഠിക്കുന്ന മറ്റൊരു പെൺകുട്ടിയും ഇവർക്കൊപ്പം ഓട്ടോയുടെ പിൻസീറ്റിൽ ഉണ്ടായിരുന്നു.
സ്കൂളിൽ എത്തിയപ്പോൾ രണ്ട് പെൺകുട്ടികളും വണ്ടിയിൽ നിന്നിറങ്ങി സ്കൂളിലേക്ക് നടന്നു. എന്നാൽ ആൺകുട്ടി എല്ലാവരുടെയും യാത്രാക്കൂലി നൽകാനായി വണ്ടിയിൽ തന്നെ തുടർന്നു. അവൻ പണം എടുത്തു കൊടുത്തപ്പോൾ, രണ്ട് പെൺകുട്ടികളും അവന്റെ സഹോദരിമാരാണോ എന്ന് ഓട്ടോ ഡ്രൈവർ ചോദിച്ചു.
അതിൽ ഒരാൾ മാത്രമാണ് തന്റെ അനിയത്തിയെന്നും മറ്റേ പെൺകുട്ടിക്ക് സ്കൂളിൽ പോകാൻ വൈകുന്നത് കണ്ടപ്പോൾ തങ്ങൾക്കൊപ്പം കൂട്ടിയതാണെന്നും ആ കുട്ടി വളരെ വിനയത്തോടെ മറുപടി നൽകി.
കുട്ടിയുടെ കരുണയും ഉത്തരവാദിത്തബോധവും ഓട്ടോ ഡ്രൈവറുടെ മനസ്സ് തൊട്ടു. അതോടെ അവനിൽ നിന്നും പണം വാങ്ങേണ്ടതില്ലെന്ന് അദ്ദേഹം തീരുമാനിച്ചു. പണം വാങ്ങാൻ കൂട്ടാക്കാതിരുന്ന അദ്ദേഹം, എപ്പോഴും സന്തോഷത്തോടെയിരിക്കാൻ കുട്ടിയെ ആശീർവദിക്കുകയും ആ പണം ഉപയോഗിച്ച് എന്തെങ്കിലും വാങ്ങി അനിയത്തിയുമായി പങ്കിട്ടു കഴിക്കാൻ പറയുകയും ചെയ്തു.
തന്റെ കുട്ടിക്കാലത്ത് അപരിചിതരായ ആളുകളോട് ലിഫ്റ്റ് ചോദിച്ച് യാത്ര ചെയ്തിരുന്ന കാര്യങ്ങൾ ഈ നിമിഷം ഓർമ്മിപ്പിച്ചതായി ഡ്രൈവർ വീഡിയോയിൽ പങ്കുവെക്കുന്നുണ്ട്. ആ കുട്ടികളുടെ സന്തോഷം കാണുന്നതാണ് തനിക്ക് ഏതൊരു പണത്തേക്കാളും വലുതെന്നും അദ്ദേഹം കൂട്ടിച്ചേർത്തു.
വീഡിയോ ഇന്റർനെറ്റിൽ വൈറലായതോടെ ആൺകുട്ടിയുടെയും ഓട്ടോ ഡ്രൈവറുടെയും നന്മയെ പുകഴ്ത്തി നിരവധി പേരാണ് രംഗത്തെത്തിയത്. “ഇത്ര ചെറിയ പ്രായത്തിൽ തന്നെ അവൻ ഒരു മാതൃകാ പുരുഷനായി മാറിയിരിക്കുന്നു” എന്നാണ് ഒരാൾ കമന്റ് ചെയ്തത്. “ഇത് കണ്ടപ്പോൾ എന്റെ സ്വന്തം കുട്ടിക്കാലമാണ് ഓർമ്മ വന്നത്” എന്ന് മറ്റൊരാളും കുറിച്ചു.
