ന്യൂഡൽഹി: ഷാരൂഖ് ഖാന്റെ നർമ്മബോധം അദ്ദേഹത്തിന്റെ വ്യക്തിത്വത്തിലെ ആകർഷണീയത പോലെ തന്നെ പ്രശസ്തമാണ്. തന്റെ ഭർത്താവിനേക്കാൾ കൂടുതൽ തനിക്ക് ഇഷ്ടം ഷാരൂഖിനെയാണെന്ന് ഒരു ആരാധക പറഞ്ഞതിന് താരം കൊടുത്ത മറുപടിയാണ് ഇപ്പോള് ഇന്റര്നെറ്റില് ചര്ച്ച. മംഗളൂരുവിൽ ഒരു റിയൽ എസ്റ്റേറ്റ് ഗ്രൂപ്പ് സംഘടിപ്പിച്ച പരിപാടിയിൽ സൂപ്പർതാരം പങ്കെടുത്തപ്പോഴായിരുന്നു ഈ രസകരമായ സംഭവം നടന്നത്.
വേദിയിൽ തന്റെ ഹിറ്റ് ഗാനങ്ങൾക്ക് ചുവടുവെച്ചും കാണികളോട് സംസാരിച്ചും ഷാരൂഖ് ഖാൻ സദസ്സിനെ കയ്യിലെടുത്തു. ഭർത്താവിനേക്കാൾ കൂടുതൽ സ്നേഹം തന്നോടാണെന്ന് ആരാധക പറഞ്ഞപ്പോൾ, “ഇതൊക്കെ തനിച്ചായിരിക്കുമ്പോൾ പറയേണ്ട കാര്യങ്ങളല്ലേ,” എന്ന് ഷാരൂഖ് തമാശയായി മറുപടി നൽകിയത് സദസ്സിൽ വലിയ ചിരിയുണർത്തി.
തുടർന്ന് അദ്ദേഹം ഇങ്ങനെ കൂട്ടിച്ചേർത്തു, “ഇതൊരു സംസാരരീതി മാത്രമാണെന്ന് എനിക്കറിയാം. നിങ്ങളുടെ വികാരങ്ങൾ ഞാൻ മനസ്സിലാക്കുന്നു, നിങ്ങളുടെ ഭർത്താവും അത് മനസ്സിലാക്കുന്നുണ്ടാകും എന്ന് എനിക്കുറപ്പുണ്ട്. ഞാൻ നിങ്ങളെെയെല്ലാം സ്നേഹിക്കുന്നു. നിങ്ങളുടെ ഭർത്താവിനെയും കുടുംബത്തെയും ഞാൻ സ്നേഹിക്കുന്നു. എല്ലാവർക്കും ഒത്തിരി നന്ദി.” കർണാടകയിൽ വരാൻ തനിക്ക് എത്രമാത്രം ഇഷ്ടമാണെന്ന് വ്യക്തമാക്കിക്കൊണ്ട് ഷാരൂഖ് ഖാൻ പറഞ്ഞു, “നന്ദി മംഗളൂരു! ഇവിടെേക്ക് വരുമ്പോൾ എന്താണ് പ്രതീക്ഷിക്കേണ്ടതെന്ന് എനിക്ക് അറിയില്ലായിരുന്നു. എന്നാൽ എയർപോർട്ട് മുതൽ ഇങ്ങോട്ടുള്ള യാത്രയിലുടനീളം നിങ്ങൾ തന്ന സ്നേഹവും ഊഷ്മളതയും ആവേശവുമെല്ലാം വളരെ മികച്ചതായിരുന്നു.”
സിദ്ധാർത്ഥ് ആനന്ദ് സംവിധാനം ചെയ്യുന്ന ‘കിംഗ്’ എന്ന ചിത്രത്തിലാണ് ഷാരൂഖ് ഖാൻ അടുത്തതായി അഭിനയിക്കുന്നത്. ജനുവരിയിൽ ചിത്രത്തിന്റെ റിലീസ് തീയതി താരം പ്രഖ്യാപിച്ചിരുന്നു; 2026 ഡിസംബർ 24-നാണ് ചിത്രം തിയേറ്ററുകളിൽ എത്തുക. ഇൻസ്റ്റാഗ്രാമിൽ പ്രഖ്യാപന വീഡിയോ പങ്കുവെച്ചുകൊണ്ട് അദ്ദേഹം കുറിച്ചു, “24.12.2026-ൽ തിയേറ്ററുകളിൽ ഗർജ്ജിക്കാൻ കിംഗ് തയ്യാറാണ്.”
മുൻപൊരിക്കലും കണ്ടിട്ടില്ലാത്ത വിധം തികച്ചും വ്യത്യസ്തമായ ഒരു ഷാരൂഖ് ഖാൻ ചിത്രമായിരിക്കും ഇതെന്നാണ് ‘കിംഗ്’ നൽകുന്ന വാഗ്ദാനം. സ്റ്റൈലിനും ആക്ഷനും പ്രാധാന്യമുള്ള ഈ ചിത്രം സിദ്ധാർത്ഥ് ആനന്ദിന്റെ ഏറ്റവും ജനപ്രിയമായ പ്രോജക്റ്റുകളിൽ ഒന്നായിരിക്കുമെന്നാണ് പ്രതീക്ഷിക്കുന്നത്. ചിത്രത്തിന്റെ ടൈറ്റിൽ വീഡിയോയിൽ “നൂറു രാജ്യങ്ങളിൽ കുപ്രസിദ്ധൻ, ലോകം നൽകിയത് ഒരൊറ്റ പേര് – കിംഗ്” എന്ന വരികളോടെയാണ് ഷാരൂഖിനെ അവതരിപ്പിക്കുന്നത്.
ടീസറിൽ ഷാരൂഖ് ഖാൻ ഒരു ‘കിംഗ് ഓഫ് ഹാർട്ട്സ്’ കാർഡ് ആയുധമായി ഉപയോഗിക്കുന്നത് ആരാധകർ ശ്രദ്ധിച്ചിരുന്നു. അദ്ദേഹത്തിന്റെ നരച്ച മുടിയും കമ്മലുമൊക്കെ ചേർന്നുള്ള പുതിയ ലുക്ക് ചിത്രത്തെക്കുറിച്ചുള്ള ആകാംഷ വർദ്ധിപ്പിക്കുന്നുണ്ട്. റെഡ് ചില്ലീസ് എന്റർടൈൻമെന്റും മാർഫ്ലിക്സ് പിക്ചേഴ്സും ചേർന്ന് നിർമ്മിക്കുന്ന ‘കിംഗ്’, ഷാരൂഖ് ഖാനും മകൾ സുഹാന ഖാനും ആദ്യമായി ഒന്നിച്ചഭിനയിക്കുന്ന ചിത്രം കൂടിയാണ്. അഭിഷേക് ബച്ചൻ, ദീപിക പദുകോൺ, റാണി മുഖർജി, രാഘവ് ജുയൽ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്.
