ഗുജറാത്തിലെ സൂറത്തിൽ, ഒരു ബഹുനില കെട്ടിടത്തിന്റെ ഏഴാം നിലയിലെ പൂട്ടിക്കിടന്ന ഫ്ലാറ്റിൽ ആത്മഹത്യയ്ക്ക് ശ്രമിച്ച യുവാവിനെ അതിസാഹസികമായി രക്ഷിച്ച് ഒരു പോലീസ് കോൺസ്റ്റബിൾ ജനങ്ങളുടെയും അധികൃതരുടെയും വലിയ പ്രശംസ പിടിച്ചുപറ്റി. സൂറത്തിലെ ലസ്കാന പ്രദേശത്ത് ജൂൺ 8-നാണ് ഈ നാടകീയ സംഭവങ്ങൾ അരങ്ങേറിയത്. തന്റെ ഭർത്താവ് ആത്മഹത്യയ്ക്ക് ശ്രമിക്കുന്നതായി ഒരു സ്ത്രീ സൂറത്ത് സിറ്റി പോലീസ് കൺട്രോൾ റൂമിൽ അടിയന്തിര സഹായം അഭ്യർത്ഥിച്ചതിനെ തുടർന്ന് ‘ഡയൽ 112’ റെസ്പോൺസ് ടീം ഉടൻ തന്നെ സ്ഥലത്തെത്തുകയായിരുന്നു. അഗ്നിശമന സേനയും ആംബുലൻസും ഇവർക്കൊപ്പം ഉണ്ടായിരുന്നു.
പോലീസ് സ്ഥലത്തെത്തിയപ്പോൾ ഫ്ലാറ്റിന്റെ വാതിൽ അകത്ത് നിന്ന് പൂട്ടിയ നിലയിലായിരുന്നു. സമയം ഒട്ടും കളയാനില്ലാതിരുന്നതിനാൽ, ലസ്കാന പോലീസ് സ്റ്റേഷനിലെ കോൺസ്റ്റബിൾ ശൈലേഷ് ചുദാസാമയും ഡ്രൈവർ കൃപാൽസിങ് ഗോഹിലും ചേർന്ന് തൊട്ടടുത്ത ഫ്ലാറ്റിലെ താമസക്കാരുടെ സഹായത്തോടെ ജനലിലൂടെ അകത്ത് കടക്കാൻ ഒരു പദ്ധതി തയ്യാറാക്കി. ഒട്ടും മടിക്കാതെ, കെട്ടിടത്തിന് പുറത്തെ സുരക്ഷാ ഗ്രില്ലിലൂടെ അതീവ അപകടകരമായ രീതിയിൽ വലിഞ്ഞുകയറിയാണ് കോൺസ്റ്റബിൾ ശൈലേഷ് ആ ഫ്ലാറ്റിന്റെ ജനലരികിൽ എത്തിയത്. തുടർന്ന് അകത്തു കടന്ന അദ്ദേഹം യുവാവിനെ കണ്ടെത്തുകയായിരുന്നു. വിഷപദാർത്ഥം കഴിച്ച യുവാവ് അവശനിലയിലായിരുന്നെന്നും, ബാക്കി വന്ന വിഷം താൻ പിടിച്ചുവാങ്ങിയെന്നും ശൈലേഷ് പറഞ്ഞു.
യുവാവിനെ കണ്ടെത്തിയ ഉടൻ തന്നെ പോലീസ് സംഘം കെട്ടിടത്തിന് താഴെയെത്തിച്ചു. ആംബുലൻസ് വരാൻ കാത്തുനിൽക്കാതെ പോലീസിന്റെ വാഹനത്തിൽ തന്നെ ഇയാളെ കാംറെജിലെ ആശുപത്രിയിലേക്ക് കൊണ്ടുപോയി. യാത്രാമധ്യേ ആംബുലൻസ് എത്തിയതോടെ ഇയാളെ അതിലേക്ക് മാറ്റി അടിയന്തിര ചികിത്സ ലഭ്യമാക്കി. സൂറത്തിലെ ഡയമണ്ട് ഫാക്ടറിയിൽ ജോലി ചെയ്യുന്ന ഈ യുവാവ് കൃത്യസമയത്ത് പോലീസ് ഇടപെട്ടതു കൊണ്ട് മാത്രമാണ് ജീവനോടെ രക്ഷപെട്ടത്. ഇയാൾ ഇപ്പോൾ ആശുപത്രിയിൽ ചികിത്സയിലാണ്.
ഈ സാഹസിക രക്ഷാപ്രവർത്തനത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചതോടെ പോലീസുകാരുടെ ധീരതയെയും സമയോചിതമായ ഇടപെടലിനെയും അഭിനന്ദിച്ച് നിരവധി ആളുകൾ രംഗത്തെത്തി. ജീവൻ രക്ഷിക്കാൻ സ്വന്തം ജീവൻ പോലും പണയം വെച്ച ഉദ്യോഗസ്ഥരെ അഭിനന്ദിച്ചുകൊണ്ട് ഗുജറാത്ത് ആഭ്യന്തര സഹമന്ത്രി ഹർഷ സംഘവിയും രംഗത്തെത്തിയിട്ടുണ്ട്.
