ഫിറ്റ്നസ് പ്രേമികളെ പ്രചോദിപ്പിക്കാൻ ഒരവസരവും കൈവിടാത്ത താരമാണ് ശിൽപ ഷെട്ടി. പതിവുപോലെ തന്റെ ‘മൺഡേ മോട്ടിവേഷൻ’ വീഡിയോയുമായി വീണ്ടുമെത്തിയിരിക്കുകയാണ് നടി. ഇത്തവണ ഡംബെല്ലിന് മുകളിൽ ബാലൻസ് ചെയ്താണ് ശിൽപ കാഴ്ചക്കാരെ അമ്പരപ്പിക്കുന്നത്. യോഗയിൽ നിന്നുൾക്കൊണ്ട ഒരു സാധാരണ വ്യായാമമുറയെ കൂടുതൽ കഠിനമായ രീതിയിലാണ് താരം അവതരിപ്പിച്ചിരിക്കുന്നത്.
യോഗയും സ്ട്രെങ്ത് ട്രെയിനിംഗും സമന്വയിപ്പിച്ചുള്ള വ്യായാമങ്ങളിലൂടെ ശ്രദ്ധേയയായ ശിൽപ, ‘വി-സിറ്റ് ഹോൾഡ്’ (V-Sit Hold) എന്ന വ്യായാമത്തിന്റെ അഡ്വാൻസ്ഡ് പതിപ്പാണ് വീഡിയോയിൽ പങ്കുവെച്ചിരിക്കുന്നത്. വെറും നിലത്തിരുന്ന് ചെയ്യുന്നതിന് പകരം, ഒരു ഡംബെല്ലിന് മുകളിൽ ഇരുന്ന് ശരീരം സന്തുലിതമാക്കിയാണ് ശിൽപ ഇത് ചെയ്തത്. ഇത് വയറിലെ പേശികളുടെ കരുത്ത് മാത്രമല്ല, ശരീരത്തിന്റെ സ്ഥിരതയും ഏകാഗ്രതയും കൂടി പരിശോധിക്കുന്ന ഒന്നാണ്.
യോഗയിലെ പ്രശസ്തമായ നൗകാസനത്തിന് (Boat Pose) സമാനമായ വ്യായാമമാണിത്. ഇടുപ്പെല്ലുകളിൽ ശരീരം സന്തുലിതമാക്കി നിർത്തി, കാലുകളും ഉടലും മുകളിലേക്ക് ഉയർത്തി ‘V’ ആകൃതിയിലാണ് ഈ ആസനം ചെയ്യുന്നത്. ഇതിന്റെ സാധാരണ രൂപം തന്നെ വയറിലെ പേശികൾക്ക് വലിയൊരു വ്യായാമമാണെന്നിരിക്കെ, വളരെ ഇടുങ്ങിയ ഒരു ഡംബെല്ലിന് മുകളിൽ ഇരുന്ന് ഇത് ചെയ്യുന്നത് ഇതിന്റെ കാഠിന്യം ഇരട്ടിയാക്കുന്നു.
ശിൽപ ഷെട്ടിയുടെ അഭിപ്രായത്തിൽ, ‘വി-സിറ്റ് ഹോൾഡ്’ വ്യായാമം ശരീരത്തിന് നിരവധി ആരോഗ്യഗുണങ്ങൾ നൽകുന്നുണ്ട്. ഇത് വയറിലെ പേശികളെ ശക്തമാക്കുന്നതിനൊപ്പം ശരീരത്തിന്റെ സന്തുലിതാവസ്ഥയും സ്ഥിരതയും മെച്ചപ്പെടുത്താൻ സഹായിക്കും. അടിവയറ്റിലെ പേശികൾ, ഇടുപ്പ്, നട്ടെല്ലിന് ബലം നൽകുന്ന പേശികൾ എന്നിവയെല്ലാം ഒരേസമയം ഇതിലൂടെ ഉത്തേജിപ്പിക്കപ്പെടുന്നു.
ശരീരത്തിന്റെ ഏകോപനം, ശരിയായ പോസ്ചർ (ഇരുപ്പും നിൽപ്പും), പൂർണ്ണമായ നിയന്ത്രണം എന്നിവ മെച്ചപ്പെടുത്താൻ ഈ വ്യായാമം സഹായിക്കുമെന്ന് താരം വ്യക്തമാക്കുന്നു. ഇത് പതിവായി പരിശീലിക്കുന്നത് കായികക്ഷമത വർദ്ധിപ്പിക്കാനും ശരീര ചലനങ്ങൾ കൂടുതൽ സുഗമമാക്കാനും സഹായിക്കും. ശാരീരിക ഗുണങ്ങൾക്ക് പുറമെ, മികച്ച ഏകാഗ്രതയും ശരീരത്തെക്കുറിച്ചുള്ള ബോധവും വളർത്താനും പരിക്കുകൾ ഏൽക്കാനുള്ള സാധ്യത കുറയ്ക്കാനും ഇത് സഹായിക്കുമെന്ന് ശിൽപ കൂട്ടിച്ചേർത്തു.
