വിശ്രമജീവിതം നയിക്കേണ്ട 73-ാം വയസ്സിലും സാഹസികതയെ നെഞ്ചിലേറ്റിയ ഒരു മുത്തശ്ശിയുടെ വീഡിയോ സോഷ്യൽ മീഡിയയിൽ തരംഗമാവുകയാണ്. ഹിമാചൽ പ്രദേശിലെ ബീർ ബില്ലിംഗിൽ നിന്ന് ആത്മവിശ്വാസത്തോടെ പാരാഗ്ലൈഡിംഗ് നടത്തുന്ന ഇവരുടെ ദൃശ്യങ്ങൾ, ആഗ്രഹങ്ങൾക്കും ആവേശത്തിനും പ്രായം ഒരു തടസ്സമല്ലെന്ന് തെളിയിക്കുന്നു.
പാരാഗ്ലൈഡിംഗ് ഇൻസ്ട്രക്ടറായ അരുൺ സിംഗ് പങ്കുവെച്ച ഈ വീഡിയോയിൽ, പറന്നുയരുന്നതിന് മുൻപ് വളരെ ശാന്തമായാണ് മുത്തശ്ശി സംസാരിക്കുന്നത്. തന്റെ പ്രായം വെളിപ്പെടുത്തിയപ്പോൾ ഇൻസ്ട്രക്ടർ പോലും അത്ഭുതപ്പെട്ടുപോയി. നേരത്തെ മസൂറിയിൽ ചെറിയ രീതിയിലുള്ള ഫ്ലൈയിംഗ് ആക്ടിവിറ്റികൾ ചെയ്തിട്ടുണ്ടെന്നും പുതിയ കാര്യങ്ങൾ പരീക്ഷിക്കുന്നതിലെ താല്പര്യമാണ് തന്നെ ഇവിടെ എത്തിച്ചതെന്നും അവർ പറയുന്നു. പേടിക്ക് പകരം വല്ലാത്തൊരു ആകാംക്ഷയും ആവേശവുമാണ് അവരുടെ മുഖത്ത് പ്രകടമാകുന്നത്. ഇൻസ്ട്രക്ടറുടെ നിർദ്ദേശങ്ങൾ കൃത്യമായി പാലിച്ചുകൊണ്ട് തികഞ്ഞ ആത്മവിശ്വാസത്തോടെയാണ് അവർ പറന്നുയരാൻ തയ്യാറെടുക്കുന്നത്.
ലോകത്തിലെ തന്നെ മികച്ച പാരാഗ്ലൈഡിംഗ് കേന്ദ്രങ്ങളിലൊന്നായ ഹിമാചൽ പ്രദേശിലെ കാംഗ്ര താഴ്വരയിലുള്ള ബീർ ബില്ലിംഗിലായിരുന്നു ഈ സാഹസികത. പർവ്വതനിരകളുടെ മനോഹരമായ കാഴ്ചകൾക്കിടയിലൂടെ ആകാശത്തേക്ക് പറന്നുയർന്ന മുത്തശ്ശിയുടെ ധൈര്യത്തെ സോഷ്യൽ മീഡിയ ഒന്നടങ്കം അഭിനന്ദിക്കുകയാണ്. രണ്ട് ലക്ഷത്തിലധികം ആളുകൾ കണ്ടുകഴിഞ്ഞ ഈ വീഡിയോയിൽ, “യഥാർത്ഥ പ്രചോദനം” എന്നാണ് പലരും അവരെ വിശേഷിപ്പിക്കുന്നത്. പ്രായം കൂടുന്തോറും സാഹസികതകളിൽ നിന്ന് പിൻമാറണം എന്ന പൊതുധാരണയെ തിരുത്തിക്കുറിക്കുന്നതാണ് മുത്തശ്ശിയുടെ ഈ യാത്ര. ശാരീരികമായും മാനസികമായും സജീവമായിരിക്കുന്നത് വാർദ്ധക്യകാലത്തെ സന്തോഷകരമാക്കുമെന്നും, ധൈര്യവും ജിജ്ഞാസയും പ്രായത്തിനൊപ്പം ഇല്ലാതാകുന്നവയല്ലെന്നുമുള്ള ശക്തമായ സന്ദേശമാണ് ഈ 73-കാരി ലോകത്തിന് നൽകുന്നത്.
