മാൻഹട്ടനിലെ അപ്പർ വെസ്റ്റ് സൈഡിൽ നടന്ന ഒരു ബാഗ് മോഷണശ്രമവും അതിനെത്തുടർന്നുണ്ടായ സിനിമാറ്റിക്കായ ചേസിംഗുമാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. ബുധനാഴ്ച രാവിലെ വെസ്റ്റ് 72-ാം സ്ട്രീറ്റിൽ വെച്ചാണ് ഒരു സ്ത്രീയുടെ ബാഗ് മോഷ്ടിക്കപ്പെട്ടത്. എന്നാൽ പതിവ് പോലീസ് ജീപ്പുകൾക്ക് പകരം കുതിരപ്പുറത്തെത്തിയ ന്യൂയോർക്ക് സിറ്റി പോലീസ് ഓഫീസറാണ് മോഷ്ടാവിനെ പിന്തുടർന്ന് പിടികൂടിയത്.
‘കെല്ലി’ എന്ന് പേരുള്ള തന്റെ പോലീസ് കുതിരയുമായി ഓഫീസർ തിരക്കേറിയ തെരുവുകളിലൂടെ കുതിച്ചുപായുന്ന ദൃശ്യങ്ങൾ പോലീസിന്റെ ബോഡി ക്യാമറയിൽ പതിഞ്ഞിട്ടുണ്ട്. വാഹനങ്ങൾക്ക് കടന്നുചെല്ലാൻ ബുദ്ധിമുട്ടുള്ള തിരക്കേറിയ നഗരവീഥികളിൽ കുതിരപ്പടയുടെ സേവനം എത്രത്തോളം ഫലപ്രദമാണെന്ന് തെളിയിക്കുന്നതായിരുന്നു ഈ സംഭവം. വഴിപോക്കരുടെ സഹായത്തോടെ മോഷ്ടാവ് ഓടിയ ദിശ മനസ്സിലാക്കിയ ഓഫീസർ കുതിരപ്പുറത്ത് കുതിച്ചെത്തി പ്രതിയെ തടയുകയായിരുന്നു.
മോഷ്ടാവിനെ പോലീസ് ഉടൻ തന്നെ കസ്റ്റഡിയിലെടുക്കുകയും മോഷ്ടിക്കപ്പെട്ട ബാഗ് തിരികെ വാങ്ങുകയും ചെയ്തു. ഈ സംഭവത്തിൽ ആർക്കും പരിക്കേറ്റിട്ടില്ല. കാൽനടയായും വാഹനങ്ങളിലും മാത്രമല്ല, കുതിരപ്പുറത്തും സുരക്ഷ ഉറപ്പാക്കാൻ തങ്ങൾ സജ്ജമാണെന്ന് വീഡിയോ പങ്കുവെച്ചുകൊണ്ട് എൻ.വൈ.പി.ഡി (NYPD) വ്യക്തമാക്കി. ന്യൂയോർക്ക് പോലീസിലെ ഏറ്റവും പഴക്കമേറിയ വിഭാഗങ്ങളിലൊന്നായ മൗണ്ടഡ് യൂണിറ്റിന്റെ ഈ സാഹസിക നീക്കത്തിന് വലിയ കയ്യടിയാണ് ഓൺലൈനിൽ ലഭിക്കുന്നത്.
