ചാംപ്യന്‍സ്‌ട്രോഫി ക്രിക്കറ്റിനുള്ള ടീമില്‍ സഞ്ജുസാംസണ് അവസരം കിട്ടുമെന്ന പ്രതീക്ഷയിലായിരുന്നു അദ്ദേഹത്തിന്റെയും മലയാളികളായ ആരാധകരുടെ പ്രതീക്ഷ മുഴുവനും. എന്നാല്‍ സഞ്ജുവിനെ ടീമിലെടുക്കുന്നതിന് പകരം സെലക്ടര്‍മാര്‍ വിശ്വാസം അര്‍പ്പിച്ചത് ഋഷഭ് പന്തിലായിരുന്നു. എന്നാല്‍ ശനിയാഴ്ച ഇന്ത്യന്‍ ടീമിനെ പ്രഖ്യാപിച്ചതിന് പിന്നാലെ സഞ്ജുവിന്റെ ഒഴിവാക്കലിനെ ന്യായീകരിച്ച് ക്രിക്കറ്റ് ഇതിഹാസം സുനില്‍ ഗവാസ്‌ക്കര്‍ രംഗത്ത് വന്നു.
ഫെബ്രുവരി 19 ന് ആരംഭിക്കുന്ന മാര്‍ക്വീ ടൂര്‍ണമെന്റിനുള്ള രണ്ട് വിക്കറ്റ് കീപ്പിംഗ് ഓപ്ഷനുകളായി കെഎല്‍ രാഹുലിനെയും ഋഷഭ് പന്തിനെയും ഇന്ത്യ തിരഞ്ഞെടുത്തപ്പോള്‍ സാംസണെ ടീമില്‍ നിന്ന് ഒഴിവാക്കിയത് പുരികം ഉയര്‍ത്തി. ”വളരെ കടുപ്പമാണ്, കാരണം ആ മനുഷ്യന്‍ അനേകം നൂറുകള്‍ നേടിയിട്ടുണ്ട്. അവനെ പുറത്താക്കാന്‍ ഒരു ന്യായവുമില്ല. പക്ഷേ, കളി മാറ്റിമറിക്കാന്‍ കഴിയുമെന്ന് നമുക്കെല്ലാവര്‍ക്കും അറിയാവുന്ന റിഷഭ് പന്തിനെതിരെയാണ് അദ്ദേഹം മത്സരിച്ചത്. കൂടാതെ പന്ത് ഒരു ഇടംകയ്യനാണ്.സാംസണേ ക്കാള്‍ മികച്ച ബാറ്റര്‍ അല്ലെങ്കിലും അദ്ദേഹം മികച്ച വിക്കറ്റ് കീപ്പറായിരിക്കും.” ഇന്ത്യ ടുഡേയോട് ഗവാസ്‌കര്‍ പറഞ്ഞു.
”സാംസണേക്കാള്‍ കുറച്ച് കൂടി കളി മാറ്റാന്‍ പന്തിന് കഴിയും, അതാണ് സാംസണെ ഒഴിവാക്കാനുള്ള കാരണം. എന്നാല്‍ സാംസണ്‍ നിരാശപ്പെടേണ്ടതില്ല, കാരണം എല്ലാ ഇന്ത്യന്‍ ക്രിക്കറ്റ് പ്രേമികള്‍ക്കും അവനോട് സഹതാപം ഉണ്ടായിരിക്കും.” ഗവാസ്‌കര്‍ കൂട്ടിച്ചേര്‍ത്തു. 50 ഓവര്‍ ഫോര്‍മാറ്റിലെ മികച്ച റെക്കോര്‍ഡ് ഉണ്ടായിരുന്നിട്ടും സെലക്ടര്‍മാര്‍ പലപ്പോഴും അദ്ദേഹത്തെ അവഗണിച്ചു. 2015-ല്‍ ഇന്ത്യയ്ക്കായി അന്താരാഷ്ട്ര അരങ്ങേറ്റം കുറിച്ച സാംസണ്‍, ഒരു ദശാബ്ദത്തിനിടെ 16 ഏകദിനങ്ങള്‍ മാത്രമാണ് കളിച്ചത്, 56.66 ശരാശരിയില്‍ 510 റണ്‍സ് നേടിയിട്ടുണ്ട്. അതില്‍ സെഞ്ചുറിയും മൂന്ന് അര്‍ധസെഞ്ചുറികളും ഉണ്ട്.
