10 മില്യണ്‍ പൗണ്ട് (ഏകദേശം 12.5 മില്യണ്‍ ഡോളര്‍) വിലമതിക്കുന്ന ആഭരണങ്ങളും ബാഗുകളും മോഷണം പോയ സംഭവത്തില്‍ പ്രതിയെ പിടികൂടുന്നതിനും ശിക്ഷിക്കുന്നതിനും സഹായിക്കുന്ന വിവരങ്ങള്‍ നല്‍കുന്നവര്‍ക്ക് 1.5 ദശലക്ഷം പൗണ്ട് പാരിതോഷികം. മോഷണം പോയ ആഭരണങ്ങളില്‍ ചിലത് ഹൈ സൊസൈറ്റി ആര്‍ട്ട് കളക്ടറും മള്‍ട്ടി കോടീശ്വരനുമായ ഷഫീറ ഹുവാങ്ങിന്റെതാണെന്ന് വിശ്വസിക്കപ്പെടുന്നു. വടക്കന്‍ ലണ്ടനിലെ അവന്യൂ റോഡിലെ ഒരു വീട്ടില്‍ ഡിസംബര്‍ 7 ന് മോഷ്ടാവ് അതിക്രമിച്ചുകയറിയായിരുന്നു മോഷണം.
ഈ സമയം വീട്ടില്‍ താമസിക്കുന്നവര്‍ പുറത്തായിരുന്നു. 150,000 പൗണ്ട് വിലമതിക്കുന്ന ഹെര്‍മിസ് ക്രോക്കഡൈല്‍ കെല്ലി ഹാന്‍ഡ്ബാഗുകളും 15,000 പൗണ്ട് പണവും 10.4 മില്യണ്‍ പൗണ്ട് ബെസ്പോക്ക് ആഭരണങ്ങളും പ്രതി കൈക്കലാക്കിയതായി പോലീസ് പറഞ്ഞു. 20നും 30-നും ഇടയില്‍ പ്രായമുള്ള ആളാണ് പ്രതിയെന്ന് കരുതുന്നു. ഇരുണ്ട ഹൂഡിയും കാര്‍ഗോ പാന്റും ബേസ്‌ബോള്‍ തൊപ്പിയും ധരിച്ച് രണ്ടാം നിലയിലെ ജനല്‍ വഴി അയാള്‍ വീടിനകത്തേക്ക് കടന്നു.
നെക്ലേസുകള്‍, 10.73 കാരറ്റ് ഡയമണ്ട് മോതിരം, ചോപാര്‍ഡ് ഡയമണ്ട് കമ്മലുകള്‍, 150,000 പൗണ്ട് (1.6 കോടി രൂപ) വിലമതിക്കുന്ന ഹെര്‍മിസ് ക്രോക്കഡൈല്‍ കെല്ലി ഹാന്‍ഡ്ബാഗുകള്‍ എന്നിവ എടുത്തവയില്‍ ഉള്‍പ്പെടുന്നു. കാതറിന്‍ വാംഗില്‍ നിന്നുള്ള ചിത്രശലഭങ്ങളുടെ ആകൃതിയിലുള്ള പിങ്ക് നീലക്കല്ലിന്റെ കമ്മലുകള്‍, ഡി ബിയേഴ്‌സിന്റെ രണ്ട് ബട്ടര്‍ഫ്‌ലൈ ഡയമണ്ട് മോതിരങ്ങള്‍, ഉയര്‍ന്ന നിലവാരമുള്ള വാന്‍ ക്ലീഫ് & ആര്‍പെല്‍സില്‍ നിന്നുള്ള നിരവധി കഷണങ്ങള്‍, ക്രോം ഹാര്‍ട്ട്‌സിലെ രണ്ട് സ്വര്‍ണ്ണ വളകള്‍ എന്നിവയെല്ലാമാണ് മോഷ്ടിക്കപ്പെട്ടത്. നിരവധി ഇനങ്ങള്‍ അദ്വിതീയമായിരുന്നു, അവയെ എളുപ്പത്തില്‍ തിരിച്ചറിയാന്‍ കഴിയും. കവര്‍ച്ച ‘മുന്‍കൂട്ടി ആസൂത്രണം ചെയ്ത പ്രൊഫഷണല്‍ ജോലി’ ആണെന്ന് കുടുംബത്തിന്റെ വക്താവ് മെട്രോയോട് പറഞ്ഞു.
