വിഖ്യാത സ്പാനിഷ് സംഗീതജ്ഞന്‍ എന്റിക് ഇഗ്‌ളേഷ്യസുമായി പ്രണയത്തിലാണെന്ന് തെറ്റിദ്ധരിപ്പിച്ച് ലോസ് ഏഞ്ചല്‍സിലെ വൃദ്ധയെ ഓണ്‍ലൈന്‍ തട്ടിപ്പുകാര്‍ കബളിപ്പിച്ചു. 63 വയസ്സുള്ള ഗ്വാഡലൂപ്പ് സെപെഡ രണ്ട് പതിറ്റാണ്ടിലേറെയായി എന്റിക് ഇഗ്ലേഷ്യസിന്റെ കടുത്ത ആരാധികയാണ്. ഒരു ദിവസം ഗായകന്‍ സോഷ്യല്‍ മീഡിയയില്‍ തന്നെ സമീപിച്ചപ്പോള്‍ ഗ്വാഡലൂപ്പ് സെപെഡയ്ക്ക് വിശ്വസിക്കാനായില്ല.
ഒരു ഓണ്‍ലൈന്‍ ഫാന്‍ ഗ്രൂപ്പില്‍ വെച്ചാണ് അയാള്‍ അവളെ കണ്ടെത്തിയത്, മുപ്പത് വര്‍ഷമായി ദശലക്ഷക്കണക്കിന് സ്ത്രീകള്‍ സ്വപ്നം കാണുന്ന പുരുഷന്‍ തന്നെ ഒരു വെര്‍ച്വല്‍ ബന്ധത്തിനായി തിരഞ്ഞെടുത്തതില്‍ അവര്‍ക്ക് ഒട്ടും സംശയം തോന്നിയില്ല. രണ്ടുവര്‍ഷം മുമ്പ് ഇവര്‍ പ്രണയത്തിലാകുകയും ചെയ്തു. മറ്റൊരു പുരുഷനുമായി വിവാഹബന്ധം പങ്കിടുമ്പോഴും ഒരു ദിവസം താന്‍ ഇഗ്ലേഷ്യസിനെ വിവാഹം കഴിക്കുമെന്ന് സെപെഡ വിശ്വസിച്ചു. ഭര്‍ത്താവുമായി ബന്ധം വേര്‍പെടുത്തി സ്പാനിഷ് സൂപ്പര്‍സ്റ്റാറുമായി ഒളിച്ചോടാന്‍ അവള്‍ പദ്ധതിയിടുക പോലും ചെയ്തു. എന്നാല്‍ ഒന്നിക്കുന്നതിന് മുമ്പായി കുറച്ച് പണം അയയ്ക്കണമെന്ന് എന്റിക് ആവശ്യപ്പെട്ടു.
രണ്ട് വര്‍ഷത്തിനിടയില്‍, ഗ്വാഡലൂപ്പ് എന്റിക്വയുമായി സന്ദേശം വഴി സംസാരിച്ചു, ഒടുവില്‍ അയാള്‍ക്ക് പണം ആവശ്യമാണെന്ന് കരുതി അവള്‍ ആയിരക്കണക്കിന് ഡോളര്‍ അയച്ചു കൊടുക്കുകയും ചെയ്തു. ഒരു ഘട്ടത്തില്‍, പണം അയയ്ക്കണമെന്ന അവന്റെ നിര്‍ബന്ധം അമിതമായപ്പോള്‍, തനിക്ക് ഇനി ജോലിയില്ലെന്ന് അവര്‍ പറഞ്ഞു. പക്ഷേ തന്നോടൊപ്പം ജീവിക്കണമെന്ന് ശരിക്കും ആഗ്രഹിക്കുന്നുണ്ടെങ്കില്‍ ഭര്‍ത്താവില്‍ നിന്ന് അത് മോഷ്ടിക്കുകയോ മറ്റൊരു ഉറവിടം കണ്ടെത്തുകയോ ചെയ്യണമെന്ന് അയാള്‍ ക്രൂരമായി പറഞ്ഞു.
എന്നാല്‍ ഗ്വാഡലൂപ്പ് സെപെഡയുടെ വഞ്ചന ഒടുവില്‍ ഭര്‍ത്താവ് അറിഞ്ഞു. ഫോണില്‍ നിന്നും സന്ദേശം കണ്ടെത്തുകയായിരുന്നു. ഭര്‍ത്താവ് തട്ടിപ്പിനെക്കുറിച്ച് മനസ്സിലാക്കി. എന്നാല്‍ അത് തട്ടിപ്പാണെന്ന് ഭാര്യയ്ക്ക് മനസ്സിലാക്കിക്കൊടുക്കാന്‍ അദ്ദേഹം ഒരുപാട് പാടുപെട്ടു. യഥാര്‍ത്ഥത്തില്‍ എന്റിക്കല്ല സംസാരിക്കുന്നതെന്നും അവളെ മോശമായി ചിത്രീകരിക്കാന്‍ ശ്രമിക്കുന്ന ആരോ ആണെന്നും അയാള്‍ വിശദീകരിക്കാന്‍ ശ്രമിച്ചു, പക്ഷേ അവര്‍ അത് കേട്ടില്ല. കാര്യങ്ങള്‍ വ്യക്തമായി മനസ്സിലാക്കാനും അംഗീകരിക്കാനും വിസമ്മതിച്ചിട്ടും ഗ്വാഡലൂപ്പിന്റെ ഭര്‍ത്താവ് അവരെ ശരിക്ക് മനസ്സിലാക്കുന്ന നല്ല മനസ്സിനുടമായായിരുന്നു. സത്യം മനസ്സിലാക്കുമെന്ന പ്രതീക്ഷയില്‍, യൂണിവിഷന്റെ പ്രൈമര്‍ ഇംപാക്‌റ്റോ പ്രോഗ്രാമില്‍ പോയി അവളുടെ പ്രണയകഥ പറയുന്നതിനെക്കുറിച്ച് അയാള്‍ക്ക് ഒരു ആശയം തോന്നി.
ആ ഭാഗം വൈറലായി, താമസിയാതെ, എന്റിക് ഇഗ്ലേഷ്യസ് എന്ന പേരില്‍ വേഷമിട്ട ഒരു തട്ടിപ്പുകാരനുമായുള്ള അവളുടെ ബന്ധത്തെക്കുറിച്ച് ലോകം മുഴുവന്‍ അറിഞ്ഞു. ഞെട്ടിപ്പിക്കുന്ന കാര്യം, പബ്ലിക് ടെലിവിഷനില്‍ എത്തിയതിനുശേഷവും, കഴിഞ്ഞ കുറച്ച് വര്‍ഷങ്ങളായി താന്‍ സന്ദേശങ്ങള്‍ കൈമാറുന്നയാള്‍ യഥാര്‍ത്ഥ എന്റിക് ഇഗ്ലേഷ്യസ് അല്ലെന്ന് ഗ്വാഡലൂപ്പിന് ഇപ്പോഴും ബോധ്യപ്പെട്ടിട്ടില്ല. തന്റെ ഭാര്യയോട് സംസാരിക്കുന്നത് താനല്ലെന്ന് വ്യക്തമാക്കാന്‍ അവളുടെ ഭര്‍ത്താവ് സ്പാനിഷ് ഗായകനോട് അഭ്യര്‍ത്ഥിച്ചു.
ഈ അസാധാരണ കഥയോട് എന്റിക് ഇതുവരെ പ്രതികരിച്ചിട്ടില്ല. എന്നാല്‍ ആരാധകര്‍ ജാഗ്രത പാലിക്കണമെന്നും സമാനമായ തട്ടിപ്പുകള്‍ തടയാന്‍ തന്റെ ഔദ്യോഗിക ചാനലുകളെ മാത്രം വിശ്വസിക്കണമെന്നും നിര്‍ദ്ദേശിച്ചുകൊണ്ട് അവര്‍ അടുത്തിടെ ഇന്‍സ്റ്റാ ഗാമില്‍ പോസ്റ്റ് ചെയ്തു. ഹോളിവുഡ് ഹാര്‍ട്ട്‌ത്രോബ് ബ്രാഡ് പിറ്റുമായി ഒരു ഓണ്‍ലൈന്‍ ബന്ധത്തിലാണെന്ന് വിശ്വസിച്ച് വര്‍ഷങ്ങളോളം 63 വയസ്സുള്ള ഒരു ഫ്രഞ്ച് സ്ത്രീ തട്ടിപ്പിനിരയായിരുന്നു. ഏകദേശം 800,000 ഡോളറാണ് അവര്‍ക്ക് നഷ്ടമായത്.
