പഞ്ചാബിലെ ലുധിയാനയിൽ കടയിൽ നിന്ന് ഐഫോൺ 17 പ്രോ മാക്സുമായി സ്കൂട്ടറിൽ കടന്നുകളയാൻ ശ്രമിച്ചയാളെ തടയാൻ ശ്രമിക്കുന്നതിനിടെ കട ഉടമയ്ക്ക് പരിക്കേറ്റു. കടയുടമ, മോഷ്ടാവിനെ തടയാൻ ശ്രമിച്ചുകൊണ്ട് സ്കൂട്ടറിന്റെ പിന്നിൽ പിടിക്കുകയും, ഇതേത്തുടർന്ന് റോഡിലൂടെ ഏകദേശം 15 മീറ്ററോളം വലിച്ചിഴയ്ക്കപ്പെടുകയും ചെയ്തു. ഈ ഞെട്ടിക്കുന്ന സംഭവത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.
സ്കൂട്ടറിന്റെ നിയന്ത്രണം നഷ്ടപ്പെട്ട് മോഷ്ടാവ് താഴെ വീണതോടെയാണ് ഈ സംഭവങ്ങൾക്ക് വിരാമമായത്. തുടർന്ന് ഇയാൾ മോഷ്ടിച്ച ഫോണും സ്കൂട്ടറും ഉപേക്ഷിച്ച് സംഭവസ്ഥലത്തുനിന്നും ഓടി രക്ഷപ്പെടുകയായിരുന്നു.
രാവിലെ 11 മണിയോടെ കടയിലെത്തിയ ഇയാൾ ഐഫോൺ തവണവ്യവസ്ഥയിൽ വാങ്ങുന്നതിനെക്കുറിച്ച് അന്വേഷിച്ചിരുന്നു. വിവരങ്ങൾ ചോദിച്ചറിഞ്ഞ ശേഷം ഇയാൾ അവിടെനിന്നും പോയി. ഫോണിനെക്കുറിച്ച് അന്വേഷിച്ച് മണിക്കൂറുകൾക്ക് ശേഷമാണ് ഇയാൾ വീണ്ടും എത്തിയത്.
എന്നാൽ ഉച്ചകഴിഞ്ഞ് 2:55 ഓടെ ഇയാൾ വീണ്ടും കടയിലെത്തി ഫോണുകൾ പരിശോധിക്കുന്നതുപോലെ അഭിനയിച്ചു. ഈ സമയം ഐഫോൺ 17 പ്രോ മാക്സ് എടുത്തു തന്റെ ഷർട്ടിനുള്ളിൽ ഒളിപ്പിച്ച് ഇയാൾ കടയിൽ നിന്നും പുറത്തേക്ക് ഓടുകയായിരുന്നു. ഫോൺ മോഷണം പോയത് മനസ്സിലാക്കിയ കടയുടമ ഉടൻതന്നെ ഇയാളെ തടയാനായി പുറത്തേക്ക് ഓടി.
കടയ്ക്ക് പുറത്തുനിർത്തിയിരുന്ന ആക്ടീവ സ്കൂട്ടറിൽ കയറി രക്ഷപ്പെടാൻ ശ്രമിച്ച മോഷ്ടാവിനെ കടയുടമ പിന്നാലെ ചെന്ന് സ്കൂട്ടറിന്റെ പിന്നിൽ പിടിച്ച് തടയാൻ ശ്രമിച്ചു. എന്നാൽ നിർത്താൻ തയ്യാറാകാതെ മോഷ്ടാവ് സ്കൂട്ടർ വേഗത്തിൽ ഓടിച്ചുപോവുകയും, സ്കൂട്ടറിൽ പിടിത്തം വിടാതെ കടയുടമ റോഡിലൂടെ കുറേ ദൂരത്തേക്ക് വലിച്ചിഴയ്ക്കപ്പെടുകയും ചെയ്തു.
കുറച്ചുദൂരം മുന്നോട്ട് പോയെങ്കിലും സ്കൂട്ടറിന്റെ നിയന്ത്രണം നഷ്ടപ്പെട്ട് മോഷ്ടാവ് താഴെ വീണു. തുടർന്ന് ഐഫോണും സ്കൂട്ടറും അവിടെ ഉപേക്ഷിച്ച് ഇയാൾ ഓടി രക്ഷപ്പെടുകയായിരുന്നു. മോഷണം തടയാനുള്ള ശ്രമത്തിനിടയിൽ കടയുടമ മീറ്റിന്റെ കാലുകളിൽ പരിക്കേൽക്കുകയും ഉരഞ്ഞ് പോറലുകൾ ഉണ്ടാവുകയും ചെയ്തു.
താൻ അപകടത്തിൽ പെട്ടപ്പോൾ ചുറ്റുമുണ്ടായിരുന്ന മറ്റ് കടയുടമകളിൽ പലരും ഇത് കണ്ടിട്ടും തന്നെ സഹായിക്കാൻ തയ്യാറായില്ലെന്ന് മീറ്റ് നിരാശയോടെ പറഞ്ഞു.
സംഭവസ്ഥലത്തെ സിസിടിവി ദൃശ്യങ്ങൾ പരിശോധിച്ചുവരികയാണെന്നും ഇത് പ്രതിയെ തിരിച്ചറിയാൻ സഹായിക്കുമെന്നും പൊലീസ് അറിയിച്ചു. അന്വേഷണത്തെക്കുറിച്ചും പ്രതിയെക്കുറിച്ചുള്ള കൂടുതൽ വിവരങ്ങളും പിന്നീട് വ്യക്തമാകും.
