അടുക്കളയിൽ തീപിടിത്തമുണ്ടായപ്പോൾ സമയോചിതമായി ഇടപെട്ട് ഒരു സ്ത്രീയെ രക്ഷപ്പെടുത്തിയ ഡെലിവറി ബോയിക്ക് സോഷ്യൽ മീഡിയയിൽ വ്യാപക കൈയടി. സി.സി.ടി.വി ക്യാമറയിൽ പതിഞ്ഞ ഈ സംഭവത്തിന്റെ ദൃശ്യങ്ങളാണ് ഇപ്പോൾ പ്രചരിക്കുന്നത്. ഡോ. ശിവാംഗി ജോഷി തന്റെ വീടിന്റെ ഗേറ്റിൽ നിന്ന് ഒരു പാർസൽ വാങ്ങുന്നതിനിടയിലാണ് അടുക്കളയിലെ അടുപ്പത്തിരുന്ന പാത്രത്തിൽ നിന്ന് പുക ഉയരുകയും തുടർന്ന് തീ പടരുകയും ചെയ്തത്. പാർസൽ വാങ്ങി അകത്തേക്ക് പോയപ്പോഴാണ് വലിയ രീതിയിൽ തീ പടരുന്നത് ശിവാംഗിയുടെ ശ്രദ്ധയിൽപ്പെട്ടത്.
വീടിനുള്ളിൽ നിന്നുള്ള ബഹളം കേട്ട ഡെലിവറി എക്സിക്യൂട്ടീവ് ഒട്ടും മടിക്കാതെ ഉടൻ തന്നെ വീടിനുള്ളിലേക്ക് ഓടിക്കയറുകയും തീ അണയ്ക്കാൻ സഹായിക്കുകയുമായിരുന്നു. ശനിയാഴ്ച (ഒക്ടോബർ 17) ഒരു സാധാരണ ഡെലിവറി ഓർഡർ സ്വീകരിക്കാൻ വാതിലിലേക്ക് പോയപ്പോഴാണ് സംഭവം നടന്നതെന്ന് ശിവാംഗി വ്യക്തമാക്കി. പെട്ടെന്ന് പടർന്നുപിടിച്ച തീ നിയന്ത്രണവിധേയമാക്കാൻ ശിവാംഗിക്ക് കഴിയാതെ വന്നപ്പോൾ, ഡെലിവറി എക്സിക്യൂട്ടീവ് പെട്ടെന്ന് മുന്നോട്ട് വന്ന് ഒരു തുണി ഉപയോഗിച്ച് തീ അണയ്ക്കുന്നത് പ്രചരിക്കുന്ന വീഡിയോയിൽ കാണാം.
“കഴിഞ്ഞ ദിവസം രാത്രി ഒരു ഡെലിവറി വ്യക്തി ഒരു പാർസൽ നൽകാനായി എന്റെ വീട്ടിൽ വന്നു. ഈ ഒരു ഡെലിവറി എന്റെ ജീവിതത്തിലെ ഏറ്റവും വൈകാരികമായ ഓർമ്മകളിൽ ഒന്നായി മാറുമെന്ന് അദ്ദേഹം കരുതിയിരിക്കില്ല,” വീഡിയോ പങ്കുവെച്ചുകൊണ്ട് ശിവാംഗി കുറിച്ചു.
“എന്റെ അടുക്കളയിൽ തീപിടിത്തമുണ്ടായപ്പോൾ അത് എങ്ങനെ നിയന്ത്രിക്കണമെന്ന് എനിക്ക് അറിയില്ലായിരുന്നു. ഒട്ടും മടിക്കാതെ അദ്ദേഹം എന്നെ സഹായിക്കാൻ മുന്നോട്ട് വന്നു, മനുഷ്യത്വം ഇപ്പോഴും ജീവനോടെയുണ്ടെന്ന് അദ്ദേഹം എന്നെ ഓർമ്മിപ്പിച്ചു.”
ധീരമായ ഇടപെടലിലൂടെ തന്നെ രക്ഷിച്ച ഡെലിവറി ഏജന്റിന് ശിവാംഗി നന്ദി പറഞ്ഞു. ഏറ്റവും ആവശ്യമുള്ള സമയത്ത് അദ്ദേഹം തന്റെ രക്ഷകനായി മാറിയെന്ന് അവർ കൂട്ടിച്ചേർത്തു.
“ചിലപ്പോൾ ആളുകളുടെ രൂപം, ജോലി, പ്രവൃത്തി എന്നിവ വച്ചാണ് നമ്മൾ അവരെ വിലയിരുത്തുന്നത്. എന്നാൽ സത്യം എന്തെന്നാൽ നിങ്ങളുടെ ജോലി നിങ്ങൾ മറ്റുള്ളവരോട് കാണിക്കുന്ന ധൈര്യത്തെയോ മനുഷ്യത്വത്തെയോ നിർവ്വചിക്കുന്നില്ല. മനുഷ്യനെ മനുഷ്യനായി കാണുക. അദ്ദേഹം ശരിക്കും എന്റെ രക്ഷകനായി മാറി, അദ്ദേഹത്തിന്റെ സ്വാർത്ഥതയില്ലാത്ത ഈ പ്രവൃത്തിയെ ഞാൻ ആത്മാർത്ഥമായി അഭിനന്ദിക്കുന്നു.”
“അദ്ദേഹത്തിന് നന്ദി പറയാൻ എന്റെ പക്കൽ അനുയോജ്യമായ വാക്കുകൾ ഉണ്ടാകില്ല, പക്ഷേ അദ്ദേഹം ചെയ്തത് ഞാൻ എപ്പോഴും ഓർക്കും. ചിലർ പാർസലുകൾ ഡെലിവറി ചെയ്യുന്നു, എന്നാൽ മറ്റു ചിലർ നിങ്ങൾക്ക് ഏറ്റവും ആവശ്യമുള്ളപ്പോൾ പ്രതീക്ഷയാണ് നൽകുന്നത്.”
വീഡിയോ വൈറലാവുകയും 7.4 ദശലക്ഷത്തിലധികം ആളുകൾ കാണുകയും ചെയ്തതോടെ, പരിഭ്രമിക്കാതെ സാഹചര്യം വളരെ സമർത്ഥമായി കൈകാര്യം ചെയ്ത ഡെലിവറി ഏജന്റിനെ സോഷ്യൽ മീഡിയ ഉപയോക്താക്കൾ അഭിനന്ദിച്ചു.
“എന്തൊരു സമയോചിതമായ ഇടപെടൽ, തീപിടിത്തം കൈകാര്യം ചെയ്യേണ്ട കൃത്യമായ രീതി ഇതാണ്. ശാന്തമായും ബുദ്ധിപൂർവ്വമായും പ്രവർത്തിച്ചു,” എന്ന് ഒരു ഉപയോക്താവ് കുറിച്ചപ്പോൾ, “അദ്ദേഹം ഒരു പ്രൊഫഷണലിനെപ്പോലെയാണ് തീ അണച്ചത്, എന്തൊരു മനുഷ്യനാണ് അദ്ദേഹം,” എന്ന് മറ്റൊരു ഉപയോക്താവ് അഭിപ്രായപ്പെട്ടു.
“അദ്ദേഹത്തിന്റെ പേരും ജോലി ചെയ്യുന്ന കമ്പനിയും നിങ്ങൾ വ്യക്തമാക്കണം, എങ്കിൽ മാത്രമേ ഈ ധീരമായ പ്രവൃത്തിക്ക് അർഹിക്കുന്ന ആദരം എല്ലാവരിൽ നിന്നും അദ്ദേഹത്തിന് ലഭിക്കൂ,” എന്നായിരുന്നു മൂന്നാമതൊരാളുടെ കമന്റ്.
